ក្រោយរងការរិះគន់យ៉ាងខ្លាំងក្លា ពីសំណាក់មហាជនដែលជាអ្នកស្រលាញ់ និងអភិរក្សសត្វព្រៃដ៏កម្រៗ ឥឡូវនេះ នារីដែលដើរតួធ្វើម្ហូបសត្វព្រៃទាំងនោះក្នុងវីដេអូ Youtube និងប្តីរបស់នាងដែលអ្នកថត បានចូលខ្លួនសារភាពទោសកំហុសរបស់ពួកគេហើយ នៅថ្ងៃទី១០ ខែឧសភា ឆ្នាំ២០១៨ នេះបើយោងតាមការផ្សាយផ្ទាល់នៅលើទំព័រហ្វេសប៊ុកផ្លូវការរបស់ក្រសួងបរិស្ថាន ។
ចំណាត់ការរបស់ក្រសួងបរិស្ថានធ្វើឡើងនៅពេលនេះ គឺបន្ទាប់ពីឆាណែល Youtube មួយមានឈ្មោះថា «Natural Life TV» បានបង្ហោះវីដេអូមួយដោយបង្ហាញពីសកម្មភាពនារីវ័យក្មេងដ៏ស្រស់ស្អាតខាងលើ បានយកសត្វព្រៃជាច្រើនប្រភេទ មកចម្អិនជាអាហារ ក្នុងគោលបំណងទាក់ទាញការចូលមើលឲ្យបានច្រើន ដើម្បីទទួលលុយពីការផ្សាយពាណិជ្ជកម្មរបស់ក្រុមហ៊ុន Google Adsense ។
ទោះយ៉ាងណា នៅចំពោះមុខមន្ត្រីបរិស្ថាន ស្ត្រីវ័យក្មេងរូបនេះ និងស្វាមីរបស់នាង បានសារភាពថា សត្វទាំងនោះមិនមែនពួកគេជាអ្នកសម្លាប់ឡើយ ពោលទិញតពីគេ ហើយយកមកថតវីដេអូ និងរូបភាពដើម្បីបង្ហោះតាម Toutube និង Facebook គោលបំណងស្វែងរកថវិកាតែប៉ុណ្ណោះ។ នៅរសៀលថ្ងៃនេះ ពួកគេទាំង២នាក់ បានធ្វើកិច្ចសន្យានៅចំពោះមុខមន្ត្រីក្រសួងបរិស្ថានពីទោសកំហុសរបស់ពួកគេ ហើយនឹងបញ្ឈប់ទង្វើបែបនេះទៅទៀត ៕ ចន្ទី