ភាពតានតឹងរវាងកងទ័ពអ៊ីស្រាអែល និងអ៊ីរ៉ង់ នៅស៊ីរី កាន់តែពុះកញ្ជ្រោល ខណៈពេលម្សិលមិញនេះ (10/5) អ៊ីស្រាអែលបានចោទប្រកាន់ថា អ៊ីរ៉ង់បានបាញ់កាំជ្រួចចំនួន ២០គ្រាប់ ផ្ទួនៗគ្នា ទៅលើទីតាំងរបស់អ៊ីស្រាអែល នៅតំបន់ខ្ពង់រាប Golan ។
តាម Washington Post ប្រសិនបើការចោទប្រកាន់របស់អ៊ីស្រាអែលជាការពិតនោះនេះជាលើកដំបូងហើយ ដែលអ៊ីរ៉ង់បានវាយប្រហារដោយផ្ទាល់ ពុំមែនដូចលើកមុនៗ តែងយកក្រុមឧទ្ទាម Hezbollah ធ្វើជាខែល ។
កាំជ្រួចការពារដែនអាកាសអ៊ីស្រាអែល វាយស្កាត់កាំជ្រួចរបស់អ៊ីរ៉ង់ដែលកំពុងបាញសំដៅមករក ។
អ្នកនាំពាក្យម្នាក់របស់កងទ័ពអ៊ីស្រាអែល ឲ្យដឹងថា បណ្តាកាំជ្រួចដែល Quds ជាអង្គភាពពិសេសមួយចំណុះកងកម្លាំង ខ្មាន់បដិវត្តន៍អ៊ីរ៉ង់បានបាញ់បង្ហោះ ។ ប្រព័ន្ធការពារកាំជ្រួចរបស់អ៊ីស្រាអែលបាញ់ស្កាត់បានកាំជ្រួចមួយចំនួនដែលហោះសំដៅមករកទីតាំងខ្លួន ហើយភាគីអ៊ីស្រាអែលពុំមាននរណារងរបួសទេ។
ជាការឆ្លើយតបអ៊ីស្រាអែលបានបាញ់កាំជ្រួចរាប់សិបគ្រាប់ទៅកាន់ទីតាំងនៅស៊ីរី និងបានបាញ់ចំគោលដៅមួយចំនួនជាអាទិ៍ ៖ ស្ថានីយ៍រ៉ាដាមួយ កាំភ្លើងការពារដែនអាកាសមួយចំនួន រួមទាំងឃ្លាំងគ្រាប់បណ្តោះអាសន្នមួយផងដែរ ។
សង្គ្រាមកាំជ្រួចរវាងអ៊ីរ៉ង់ និង អ៊ីស្រាអែល ប្រព្រឹត្តទៅពុំបានមួយថ្ងៃផង នៅពេលដែលប្រធានាធិបតីអាមេរិក ដូណាល់ ត្រាំ ប្រកាសពីការដកខ្លួនចេញពីកិច្ចព្រមព្រៀងនុយក្លេអ៊ែរជាមួយអ៊ីរ៉ង់ ត្រូវបានចុះហត្ថលេខាកាលពីឆ្នាំ ២០១៥ ៕ សូយន
