ភ្នំពេញ៖ ក្រសួងសុខាភិបាល បានចេញសេចក្តីជូនព័ត៌មានស្តីពី ករណីជំងឺរាតត្បាត នៅស្រុកកែវសីមា ខេត្តមណ្ឌលគិរី ដែលមានចំនួនអ្នកជំងឺសរុបដែលបានពិនិត្យមានចំនួន៨៤នាក់ ដែលក្នុងចំនួននេះ មានតែចំនួន១១នាក់ទេ ដែលមានរោគសញ្ញាជាករណីជំងឺផ្តាសាយធំ រីឯអ្នកជំងឺចំនួន៧៣នាក់ គាត់មានអារម្មណ៍ភ័យខ្លាច នឹងព្រឹត្តិការណ៍នៅភូមិអាលច ក្នុងខេត្តក្រចេះ ។
នៅក្នុងសេចក្តីប្រកាសព័ត៌មាន នៅថ្ងៃទី១០ ខែឧសភា ឆ្នាំ២០១៨នេះរបស់ក្រសួងសុខាភិបាល បានបញ្ជាក់ថា “នៅព្រឹកថ្ងៃទី១០ ខែឧសភា ឆ្នាំ២០១៨ តាមរយៈការអង្កេតស្រាវជ្រាវ ក្រុមការងារបានឆ្លើយតបបន្ទាន់ គឺមានករណីអ្នកជំងឺមកពីភូមិខាងលើ បានសំរាកព្យាបាលនៅមន្ទីរពេទ្យបង្អែក ស្រុកស្នូល នៅថ្ងៃទី៩ ខែឧសភា ឆ្នាំ២០១៨ ចំនួន២៦ករណី ហើយរាល់ករណីមកសម្រាកពេទ្យជាករណីសង្ស័យថា ជាជំងឺផ្តាសាយធំ និងមានសភាពស្រាល ដែលពួកគាត់បានចេញទៅមូលដ្ឋានមួយចំនួនអស់ហើយ ក្រោយបានសម្រាកព្យាបាលចំនួន៣-៤ម៉ោងប៉ុណ្ណោះ។ បន្ទាប់មក ក្រុមការងាររួមទាំងគ្រូពេទ្យដែលមានថ្នាំពេទ្យមួយចំនួនធំ បានបន្តដំណើរចុះទៅពិនិត្យហេតុការណ៍ផង និងផ្តល់ការព្យាបាលផ្ទាល់នៅភូមិខាងលើ។ រហូតដល់ថ្ងៃទី១០ខែឧសភា ឆ្នាំ២០១៨ ក្រុមគ្រូពេទ្យចុះពិនិត្យនិងព្យាបាលជំងឺដល់ទីកន្លែងបានចំនួន៥៨នាក់ ស្រី៣០នាក់។ ចំនួនអ្នកជំងឺសរុបដែលបានពិនិត្យមានចំនួន៨៤នាក់ ស្រី៤៧នាក់ ដែលក្នុងចំនួននេះ មានតែចំនួន១១នាក់ ស្រី៧នាក់ ទេ ដែលមានរោគសញ្ញាជាករណីជំងឺផ្តាសាយធំ រីឯអ្នកជំងឺចំនួន៧៣នាក់ គាត់មានអារម្មណ៍ភ័យខ្លាច នឹងព្រឹត្តិការណ៍នៅភូមិអាលច ក្នុងខេត្តក្រចេះ ទើបមានស្ថានភាពបែបជា ស្រឺត ផង និងមានបញ្ហាសុខភាព ផ្សេងៗផង ដូចជា ឈឺក្បាល រាកតិចតួច ឈឺក្រពះ ឬគ្រាន់តែវិលមុខ ឬទន់ដៃជើង អស់កម្លាំងជាដើម ហើយអ្នកមានរោគសញ្ញាទាំងនោះមិនមានរកឃើញជំងឺធ្ងន់ធ្ងរគួរឲ្យកត់សម្គាល់ និងមិនមានរកឃើញរោគសញ្ញាពុលទឹកនោះឡើយ។
ដូច្នេះដើម្បីការពារសុខភាពផ្ទាល់ខ្លួន និងក្រុមគ្រួសាររបស់ខ្លួន លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអំពាវនាវដល់ប្រជាពលរដ្ឋទាំងអស់ចូលរួមអនុវត្តន៍ការពារកុំឲ្យឆ្លងជំងឺឆ្លង ក៏ដូចជាការពារការចម្លងរោគតាមចំណីអាហារ។
លោក ស្វាយ សំអ៊ាង អភិបាលខេត្តមណ្ឌលគិរី បានប្រាប់ឲ្យដឹងថា នៅថ្ងៃទី១០ ខែឧសភា ឆ្នាំ២០១៨នេះ ប្រជាពលរដ្ឋចំនួន៨៤នាក់ ដែលធ្លាក់ខ្លួនឈឺជាបន្ដបន្ទាប់ ដោយសារជំងឺរាតត្បាតនៅស្រុកកែវសីមានោះ បានចាកចេញពីមន្ទីរពេទ្យទៅផ្ទះរៀងៗខ្លួនជិតអស់ហើយ ក្រោយសុខភាពវិលមកដូចដើមវិញ។
បើតាមលោកអភិបាលខេត្ត ប្រជាពលរដ្ឋដែលកំពុងបន្ដតាមដានសុខភាពនៅមន្ទីរពេទ្យបង្អែកស្រុកស្នួល ខេត្តក្រចេះ មានតែប្រមាណ២០នាក់ទៀតតែប៉ុណ្ណោះ ហើយមិនយូរនោះទេ ពួកគាត់នឹងអាចចាកចេញពីមន្ទីរពេទ្យបានហើយ។ លោកអភិបាលខេត្ត រួមជាមួយក្រុមការងារ បាននាំយកអំណោយមួយចំនួន និងចុះសួរសុខទុក្ខផ្ទាល់ទាំងនៅក្នុងភូមិកើតហេតុ ទាំងនៅក្នុងមន្ទីរពេទ្យផងដែរ។
សូមរំលឹកថា ករណីនេះបានផ្ទុះឡើងនៅភូមិព្រះ ឃុំស្រែឈូក ស្រុកកែវសីមា នៅថ្ងៃទី៩ ខែឧសភា ឆ្នាំ២០១៨ ដំបូងឡើយមានតែឲ្យមនុស្សប្រុសស្រី១៤នាក់ រងនូវអាការៈក្អូតចង្អោរ ប៉ុន្តែគិតត្រឹមម៉ោង១ថ្ងៃទី១០ ខែឧសភា បានកើនឡើងដល់ជាង៨០នាក់៕ ដោយ៖បញ្ញាស័ក្តិ
