យោងតាម The Sun ស្ត្រី២នាក់ដែលត្រូវបានគេជឿថាជាប្រពន្ធ និងស្រីស្នេហ៍ បានព្រួតដៃគ្នាវាយធ្វើបាបបុរសម្នាក់ដែលត្រូវជាប្តីរបស់ស្ត្រីម្នាក់ក្នុងចំណោមអ្នកទាំងពីរឡើងទ្រោមតែម្តង ស្ថិតនៅទីកន្លែងសាធារណៈមួយនៅក្នុងប្រទេសចិន ។
វីដេអូដែលត្រូវបានថតដោយអ្នកចោមរោមឈរមើល បានបង្ហាញឲ្យឃើញបុរសម្នាក់ ត្រូវបានស្ត្រី២នាក់ចាប់ហែកខោអាវខ្ទេចខ្ទីរ ខណៈស្ត្រីម្នាក់បានប្រើកណ្តាប់ដៃ និងម្នាក់ទៀតបានប្រើកៅអីឈើ ព្រួតវាយឡើងទ្រោម នៅចំពោះមុខមហាជនដែលមានការស្លុតរន្ធត់ និងហួសចិត្តជាខ្លាំង ។
ចាប់តាំងពីវីដេអូនៃហេតុការណ៍ដ៏គួរឲ្យភ្ញាក់ផ្អើលនេះ ត្រូវបានបង្ហោះនៅលើបណ្តាញសង្គម Weibo របស់ចិន ដែលទទួលការចូលទស្សនាជាង ៥ លាន ក្នុងនោះមានអ្នកខមិនម្នាក់បាននិយាយថា៖ «យ៉ាងហោចណាស់ ស្ត្រីទាំងពីរនេះបានដឹងថានរណាជាអ្នកបង្កបញ្ហានេះឡើង» ។ អ្នកដទៃទៀតបានខមិនថា «វាពិតជាគួរឲ្យភ្ញាក់ផ្អើលមែនទែន នៅពេលដែលរឿងនេះបានកើតឡើងនៅចំពោះភ្នែកក្មេងៗ» ។ ហើយអ្នកផ្សេងៗទៀត បានសម្តែងការសើចដ៏ហួសចិត្ត ៕ ចន្ទី