ភ្នំពេញ៖ អភិបាលរាជធានីភ្នំពេញលោកឃួង ស្រេងបានស្នើអោយស្ថាប័នរដ្ឋនិងក្រុមហ៊ុនឯកជន ដាច់ខាតត្រូវដាក់លូប្រអប់អោយបានធំ នៅពេលធ្វើផ្លូវឆ្លងកាត់ប្រឡាយទួលពង្រ២ មកកាន់ស្ថាប័ននិងក្រុមហ៊ុនរបស់ខ្លួនបដើម្បីធ្វើយ៉ាងណាកុំអោយចរន្តទឹកស្ទះ ពេលមានភ្លៀងធ្លាក់ម្តងៗ បណ្តាលអោយលិចលង់ផ្ទះប្រជាពលរដ្ឋនោះ។
ការស្នើបែបនេះរបស់អភិបាលរាជធានីភ្នំពេញធ្វើឡើងកាលពីព្រឹកថ្ងៃទី១០ ឧសភា ពោលគឺក្រោយពីលោកដឹកនាំមន្ត្រីចុះពិនិត្យលទ្ធភាពតទឹកស្អាតជូនប្រជាពលរដ្ឋនៅសង្កាត់ភ្លើងឆេះរទេះនិងបន្តទៅពិនិត្យមើលប្រឡាយទួលពង្រ២នេះ។ លោកថា ផ្លូវចូលទៅកាន់ស្ថាប័នរដ្ឋ ក្រុមហ៊ុននិងផ្ទះល្វែងដែលឆ្លងកាត់ប្រឡាយទួលពង្រ២នេះមានចំនួន៣៥ ទីតាំង ហើយផ្លូវឆ្លងកាត់ប្រឡាយទាំងនេះមិនបានដាក់លូអោយបានត្រឹមត្រូវនៅឡើយទេ ។ ដូច្នេះទេលោកឃួង ស្រេងបានស្នើអោយស្ថាប័នរដ្ឋនិងក្រុមហ៊ុនឯកជនទាំងអស់ ដាច់ខាតត្រូវដាក់លូប្រអប់អោយបានធំ ដើម្បីរំដោះទឹកអោយបានលឿន។
ជុំវិញបញ្ហាប្រឡាយនេះលោកអភិបាលរាជធានីភ្នំពេញក៏បានបញ្ជាក់ថា នឹងកោះប្រជុំមួយនៅពេលឆាប់ៗនេះដើម្បីដោះស្រាយបញ្ហានេះអោយបានល្អ។
ប្រឡាយទួលពង្រ២ មានប្រវែង ៦១១០ម៉ែត្រ ទទឹង ៩ម៉ែត្រ ចាប់ពីផ្លូវជាតិលេខ៣ ដល់ប្រឡាយបឹងហារ ក្នុងខណ្ឌពោធិ៍សែនជ័យទៅដល់ព្រំប្រទល់ខណ្ឌដង្កោ។ប្រឡាយនេះមានសារៈសំខាន់លើកាត់បន្ថយនូវការលិចលង់ នៅតំបន់មុខសាលាក្តីខ្មែរក្រហម ផ្លូវជាតិលេខ៤។
គួរបញ្ជាក់ថា ក្នុងគម្រោងរបស់រដ្ឋបាលរាជធានីភ្នំពេញ គឺបានដាក់ចេញជាផែនការ ដោយឱ្យមន្ទីរសាធារណការនិងដឹកជញ្ជូនរាជធានីភ្នំពេញធ្វើការសិក្សាបច្ចេកទេស លើបញ្ហាដោះស្រាយទឹកលិចចំនួន ៥គម្រោង លើចំនួន ៥តំបន់ក្នុងរាជធានីភ្នំពេញនៅឆ្នាំ២០១៨នេះ។
តំបន់លិចទឹកទាំង៥កន្លែងដែលត្រូវដោះស្រាយនេះរួមមានទី១-តំបន់ផ្លូវជាតិលេខ ៤ មុខសាលាក្តីខ្មែរក្រហម ដោយកំពុងជីកភ្ជាប់ប្រឡាយស្របផ្លូវរថភ្លើង ប្រឡាយជើងឯក និងប្រឡាយទួលពង្រ។ទី២-តំបន់មហាវិថីសហព័ន្ឋរុស្ស៊ី ខាងជើងព្រលានយន្តហោះ។
គម្រោងដាក់លូប្រអប់ក្នុងសាច់ផ្លូវតាំងកសាង ចាប់ពីមហាវិថីសហព័ន្ឋរុស្ស៊ីទៅភ្ជាប់ប្រឡាយទួលសំពៅនិង១ខ្សែទៀតទៅភ្ជាប់ប្រឡាយចំការឳឡឹក។ ទី៣-តំបន់ខាងត្បូងនិងខាងកើតព្រលានយន្តហោះ។គម្រោងនឹងដាក់លូប្រអប់ទំហំ ៦.៨ម៉ែត្រ និង ៤.៨ម៉ែត្រ ដើម្បីដោះទឹកលិចនៅផ្លូវ ស ឡា ផ្លូវ ណ័រប្រ៊ីត ផ្លូវដួង ងៀប ភូមិថ្មគោល ប្រឡាយលូ៥ បុរី អូរបែកក្អម បុរី ស ឡា។ទី៤-គម្រោងស្ថាបនាប្រឡាយបេតុងស្ទឹងមានជ័យ និងផ្លូវអបប្រឡាយនិងទី៥-គម្រោងស្តារលូ នៅក្នុងខណ្ឌចំការមន ដូនពេញ ៧មករា និងទួលគោក។
ដើម្បីដោះស្រាយបាននូវការលិចលង់នេះដែរ រដ្ឋបាលរាជធានីភ្នំពេញក៏បានដាក់ចេញជា គម្រោងសាងសង់ស្ថានីយ៍បូមទឹកថ្មីចំនួន៤កន្លែងទៀតផងដែរ ដូចជា នៅគឺទី១ស្ថានីយ៍បុរី១០០ខ្នង ទី២ស្ថានីយ៍លូ ៥ ទី៣ស្ថានីយ៍បឹងទំពុន និងទី៤ស្ថានីយ៍ទួលសំពៅ ដែលបង្កើនសមត្ថភាពបូមទឹកបាន៣ដង៕ ដោយ៖បញ្ញាស័ក្តិ