វីដេអូនៃព្រះសង្ឃមួយអង្គនៅក្នុងប្រទេសថៃ និមន្តបិណ្ឌបាត ដោយមាន «កូនសិស្ស» គួរឲ្យស្រលាញ់ដើរតាមពីក្រោយ បានកំពុងទទួលការចាប់អារម្មណ៍ជាខ្លាំង នៅលើបណ្តាញសង្គម ។ ហើយអ្វីដែលធ្វើឲ្យគ្រប់គ្នាមានការភ្ញាក់ផ្អើលនោះ គឺសត្វជ្រូក១ក្បាល ។
ព្រះសង្ឃព្រះនាម Wichai Vichaiyah ដែលមានព្រះជន្ម ៥៧ ឆ្នាំ បានមានសង្ឃដីការថា ជ្រូកញីទិញមកពីប្រទេសវៀតណាម១ក្បាលនេះ ដែលមានឈ្មោះថា Lilly ត្រូវបានព្រះអង្គចិញ្ចឹមវាតាំងពីតូចនៅក្នុងវត្ត Chonburi ។
ក្នុងអំឡុងពេល១ខែ ព្រះតេជ្ជគុណ Wichai បានស្លៀកតុបតែងឲ្យ Lilly ជាមួយអាវពណ៌ផ្កាឈូក និងដាក់តុក្កតាខ្លាឃ្មុំអង្គុយលើខ្នងរបស់វា ធ្វើដំណើរទៅកាន់ពិធីបុណ្យទានផ្សេងៗនៅក្នុងតំបន់ ។
មនុស្សម្នាបានមកប្រមូលផ្តុំគ្នា ដើម្បីមើល Lilly ខណៈព្រះតេជ្ជគុណ Wichai បានយកវាដើរតាមក្នុងអំឡុងពេលបិណ្ឌបាត នៅតាមដងផ្លូវ ។
ព្រះតេជ្ជគុណ Wichai បានសង្ឃដីការបន្តថា៖ «នៅពេលមនុស្សឃើញ Lilly ពួកគេពិតជាចូលចិត្តវាយ៉ាងខ្លាំង ហើយសូម្បីផ្តល់ចំណីដល់វាផងដែរ» ៕ ចន្ទី