ខេត្តព្រះសីហនុ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានគាំទ្ររាល់សកម្មភាព របស់ស្ថាបនិកអភិវឌ្ឍ “កោះឋានសួគ៌ ឆ្នេរភ្លោះកោះរ៉ុង”មានទីតាំងនៅលើកោះរ៉ុងក្រុង-ខេត្តព្រះសីហនុ ថាជាការរួមចំណែកទាក់ទាញភ្ញៀវទេសចរជាតិ-អន្តរជាតិ ឲ្យចូលមកទស្សនាប្រទេសកម្ពុជា ពិសេសចូលមកទស្សនាខេត្តព្រះសីហនុនាបណ្តាឆ្នាំខាងមុខៗ ជាមួយប្រមុខដឹកនាំរាជរដ្ឋាភិបាល។
កាលពីថ្ងៃព្រហស្បតិ៍ ទី១០ ខែឧសភា ឆ្នាំ២០១៨ សម្តេចកិត្តិព្រឹទ្ធបណ្ឌិត ប៊ុន រ៉ានី បានអញ្ជើញទៅទស្សនាសមិទ្ធផលថ្មី ដែលស្ថាបនាឡើងដោយកូនខ្មែរមានឈ្មោះថា «ម៉ាហ្វីយ៉ា រីស៊តកម្ពុជា, Mafiya’s Resort Cambodia» មានទីតាំងនៅ«កោះឋានសួគ៌ ឆ្នេរភ្លោះកោះរ៉ុង» នៃសង្កាត់កោះរ៉ុង ក្រុង–ខេត្តព្រះសីហនុ។
នាឱកាសនោះ សម្តេច ប៊ុន រ៉ានី បានធ្វើដំណើរទស្សនានៅជុំវិញបរិវេណ «ឆ្នេរកោះឋានសួគ៌» ហើយបានកោតសរសើរដល់ស្ថាបនិក ឬអ្នកបង្កើតឲ្យមានឆ្នេរកម្សាន្តថ្មីថា មានបរិស្ថាន អនាម័យល្អ តាមបែបធម្មជាតិ ជាពិសេសមានសេវាស្នាក់នៅមានលក្ខណៈស្តង់ដារ អាហារទទួលទានឆ្ងាញ់ពិសារ មានសន្តិសុខល្អ និងសេវាដឹកជញ្ជូនភ្ញៀវទេសចរមានសុវត្ថិភាពល្អ។
ដំណើរទស្សនកិច្ចនោះ សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន បានកោតសរសើរ និងលើកទឹកចិត្តដល់ស្ថាបនិករួមគ្នាបង្កើត «កោះឋានសួគ៌ ឆ្នេរភ្លោះកោះរ៉ុង» ដែលបានស្ថាបនា ឲ្យមានឆ្នេរកម្សាន្ត ដែលមានបរិស្ថានអនាម័យល្អ តាមបែបធម្មជាតិ និងមានសុវត្ថិភាព សម្រាប់ភ្ញៀវទេសចរ ប្រកបដោយការទទួលខុសត្រូវខ្ពស់។
ងាកមក លោកឧកញ៉ា ទៀ វិចិត្រ ស្ថាបនិកអភិវឌ្ឍឆ្នេរកម្សាន្តមានឈ្មោះថា «កោះឋានសួគ៌ ឆ្នេរភ្លោះកោះរ៉ុង» និងជាម្ចាស់ទីកន្លែងស្នាក់នៅមានឈ្មោះថា «ម៉ាហ្វីយ៉ា រីស៊តកម្ពុជា, Mafiya’s Resort Cambodia» ក៏បានបង្ហោះសារនៅតាមបណ្តាញសង្គមហ្វែសប៊ុក (Facebook) ផ្ទាល់ខ្លួនថា លោកពិតជាមានមោទនភាពបំផុត ដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានអញ្ជើញមកកម្សាន្តនៅ «ម៉ាហ្វីយ៉ា រីស៊ត ឆ្នេរឋានសួគ៌ កោះរ៉ុង» នាឱកាសនេះ។
លោកឧកញ៉ា ទៀ វិចិត្រ បានចាត់ទុកស្នាមញញឹម របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ថាបានធ្វើឲ្យបុគ្គលិកបំរើការងារនៅ «កោះឋានសួគ៌» ទាំងអស់ចងចាំទុកក្នុងបេះដូងជារៀងរហូត។
លោកឧកញ៉ា ទៀ វិចត្រ ស្ថាបនិក “កោះឋានសួគ៌ឆ្នេរភ្លោះកោះរ៉ុង” និងជាប្រធានក្រុមហ៊ុនជីធីវីស៊ី ស្ពីដប៊ូតកម្ពុជា (G.T.V.C, Speed Boat Cambodia) កន្លងមកនេះ បានផ្តល់សម្ភាសដល់អ្នកយកព័ត៌មាន www.cen.com.kh ប្រចាំខេត្តព្រះសីហនុថា នៅក្នុងព្រះរាជពិធីបុណ្យចម្រើនព្រះជន្ម ព្រះមហាក្សត្រ នៅថ្ងៃទី១៣– ១៤ ខែឧសភា ឆ្នាំ២០១៨នេះ “ម៉ាហ្វីយ៉ា រីស៊តកម្ពុជា” មានបញ្ចុះតម្លៃសេវាលើឧបករណ៍កម្សាន្តមួយចំនួន ជូនភ្ញៀវទេសចរជាតិ-អន្តរជាតិ ដែលចូលមកទស្សនា «កោះឋានសួគ៌»។
ពិសេសជាងនេះទៀត លោកឧកញ៉ា ទៀ វិចិត្រ បានអះអាងថា សមិទ្ធផលថ្មី “ម៉ាហ្វីយ៉ា រីស៊តកម្ពុជា” ដែលជាផ្ទះ ឬកន្លែងស្នាក់នៅទើបសង់រួចថ្មីៗ មានទីធ្លាធំទូលាយ លាយឡំដោយដើមឈើ ផ្កាភ្ញី និងភ្លើងចម្រុះពណ៌ ប្រកបដោយផាសុកភាព នឹងរង់ចាំស្វាគមន៍ការចូលមកស្នាក់នៅ របស់ភ្ញៀវទេសចរក្នុងតម្លៃសមរម្យ និងមានសុវត្ថិភាពសន្តិសុខល្អ។
លោកឧកញ៉ាឲ្យដឹងថា ទាំងសោភ័ណភាពឆ្នេរខ្សាច់នៅលើ “កោះឋានសួគ៌” និង “ម៉ាហ្វីយ៉ា រីស៊ត” គឺមានបរិស្ថាន សោភ័ណភាពតាមបែបធម្មជាតិ មានអនាម័យល្អ មានអាហារទទួលទានឆ្ងាញ់ពិសារ និងមានសម្ភារៈ ឬឧបរកណ៍ជាច្រើនប្រភេទ សម្រាប់ផ្តល់ជម្រើសជូនភ្ញៀវទេសចរ ដែលចូលមកសម្រាកលំហែកម្សាន្ត និងស្នាក់នៅ «ម៉ាហ្វីយ៉ា រីស៊ត» ក្នុងតម្លៃសមរម្យ។
អ្នកគ្រប់គ្រង ឬទទួលមើលការខុសត្រូវនៅលើ “កោះឋានសួគ៌” បានឲ្យដឹងដែរថា សម្រាប់ភ្ញៀវទេសចរជាតិ-អន្តរជាតិ ដែលចូលមកកម្សាន្តខេត្តព្រះសីហនុ និងចង់ធ្វើដំណើរទៅកម្សាន្ត នៅ”កោះឋានសួគ៌” ហើយចង់ជ្រើសយកទីកន្លែងស្នាក់នៅ “ម៉ាហ្វីយ៉ា រីស៊ត” គឺអាចទិញសំបុត្រធ្វើដំណើរតាមរយៈក្រុមហ៊ុន G.T.V.C, Speed Boat Cambodia ឬចូលទៅផេក Page: GTVC Speedboat Cambodia និងទិញសំបុត្រនៅក្រុមហ៊ុន អាយលែន ស្ពីដហ្វឺរី ខេមបូឌា ឬចូលទៅផេក Page: Island speed ferry cambodia។
ក្នុងនោះប្រសិនបើភ្ញៀវទេសចរជាតិ-អន្តរជាតិ ចង់កក់បន្ទប់ស្នាក់នៅជាមួយ “ម៉ាហ្វីយ៉ា រីស៊ត” គឺអាចទាក់ទងតាមលេខទូរស័ព្ទដោយផ្ទាល់ ឬចូលក្នុងកាន់ផេក Page: Mafiya’s Resort Cambodia។
ភ្ញៀវទេសចរ ពិសេសភ្ញៀវជាតិភាគច្រើន ដែលបានទៅទស្សនាតាមតំនប់ឆ្នេរមួយចំនួននាខេត្តព្រះសីហនុ បានបង្ហាញអារម្មណ៍ពេញចិត្តឆ្នេរកម្សាន្តមានឈ្មោះថា “កោះឋានសួគ៌ ឆ្នេរភ្លោះកោះរ៉ុង” ដែលប្រតិបត្តិករទេសចរខេត្តនេះរួមគ្នាអភិវឌ្ឍបម្រើដល់វិស័យទេសចរណ៍ថា មានបរិស្ថានអនាម័យល្អ ឆ្នេរធំទូលាយ មានខ្សាច់សក្បុស និងមានទឹកសមុទ្រថ្លាឆ្លុះគួរជាទីគយគន់មិនចេះជិនណាយ។
ថ្មីៗនេះក៏មានគូស្វាមីភរិយាទើបរៀបការថ្មោងថ្មី និងមានគូស្នេហ៍មួយចំនួន បានជ្រើសយក “កោះឋានសួគ៌” សម្រាប់ដំណើរកម្សាន្ត និងជ្រើសយក “ម៉ាហ្វីយ៉ា រីស៊តកម្ពុជា” សម្រាប់រាត្រីទឹកឃ្មុំ របស់ពួកគេ ដ៏ផ្អែមត្រជាក់ចិត្តផងដែរ។
ងាកទៅភ្ញៀវទេសចរជាអនិកជនខ្មែរគ្រួសារ ដែលធ្វើដំណើរមកពីប្រទេសអូស្ត្រាលី និងបាននាំក្រុមគ្រួសារទៅកម្សាន្តតាមកោះនានា ហើយចុងក្រោយ បានចូលទៅកម្សាន្ត «កោះឋានសួគ៌ឆ្នេរភ្លោះកោះរ៉ុង» និងស្នាក់នៅ “ម៉ាហ្វីយ៉ា រីស៊ត កម្ពុជា” កាលពីសប្តាហ៍មុន បានកោតសរសើរការថែរក្សាបរិស្ថាននៅតាមឆ្នេរកោះឋានសួគ៌ របស់ស្ថានិកឆ្នេរនេះថា មានអនាម័យល្អ និងមានសោភ័ណភាពស្រស់ត្រកាល សមការដាក់ឈ្មោះឆ្នេរនេះថាជា “កោះឋានសួគ៌” ពិតមែន។
ភ្ញៀវទេសចរក្រុមនេះ ផ្តល់សម្ភាសដល់អ្នកយកព័ត៌មាន www.cen.com.kh ដែលចុះទៅដល់ឆ្នេរកោះឋានសួគ៌ក្នុងទឹកមុខរីករាយ និងសម្ដីមួយៗថា បរិស្ថាននៅជុំវិញឆ្នេរទើបអភិវឌ្ឍថ្មីនេះមានឆ្នេរធំទូលាយ មានខ្សាច់សក្បុស មានទឹកថ្លាឆ្លុះ និងហ៊ុមព័ទ្ធដោយចម្ការដូង ផ្កាភ្ញីចម្រុះពណ៌ ព្រៃកោងកាង ភ្លើងបំភ្លឺ និងព្រៃឈើធម្មជាតិមានពណ៌ខៀវស្រងាត់។ ពិសេសជាងនេះ ការជ្រើសយកផ្ទះ ឬកន្លែងសម្រាកនៅ “ម៉ាហ្វីយ៉ា រីស៊តកម្ពុជា” ពិតជាការចំណាយលុយមិនខកបំណងនោះទេ។
ឆ្នេរសមុទ្រខេត្តព្រះសីហនុ មានប្រវែងជាង ១៧១គីឡូម៉ែត្រ (១៧១.៣៥គីឡូម៉ែត្រ) មានខ្សាច់សស្អាត ទឹកសមុទ្រថ្លាឆ្លុះ ឆ្នេររាក់ ទឹកធ្លាក់ មច្ឆាសមុទ្រ ផ្កាថ្ម ឧទ្យានជាតិ និងមានកោះចំនួន៣២ មានជីវចម្រុះធម្មជាតិស្រស់ស្អាត ជាសក្ដានុពលក្នុងការអភិវឌ្ឍវិស័យទេសចរណ៍ នាខេត្តព្រះសីហនុ ក៏ដូចជានៅក្នុងព្រះរាជាណាចក្រកម្ពុជា៕ ដែន សីមា