មនុស្សចាស់៣នាក់ និងក្មេងៗ៤នាក់ ត្រូវបានឃើញស្លាប់ក្នុងលំនៅស្ថាន ហើយនេះជាហេតុការណ៍បាញ់សម្លាប់ដ៏អាក្រក់ក្នុងអំឡុងពេល ២០ឆ្នាំកន្លងមកនៅប្រទេសអូស្ត្រាលី ។
លំនៅស្ថានដែលកើតមានករណីបាញ់ប្រហារ ។
ប៉ូលិសនៅប្រជុំជន Osmington ភាគនិរតីអូស្ត្រាលី នៅថ្ងៃទី ១១ ខែឧសភា (ម៉ោងតំបន់) បានបញ្ជាក់ថា មានករណីផ្ទុះអាវុធនៅផ្ទះមួយ ។ ពេលទៅដល់ពួកគេឃើញមនុស្សពេញវ័យ ២រូបស្លាប់នៅខាងក្រៅផ្ទះ ហើយខាងក្នុងគឺជនរងគ្រោះ ៥នាក់ទៀត ក្នុងនោះមានក្មេងៗ៤នាក់ ។ អ្នកទាំងអស់បានស្លាប់ទៅហើយ ។
នាយប៉ូលិសតំបន់អូស្ត្រាលីប៉ែកខាងលិច បានពណ៌នាថា នេះជាករណីឧក្រិដ្ឋកម្មគួរឲ្យតក់ស្លុត ។ “ពួកគេបានស្លាប់ដោយគ្រាប់កាំភ្លើង ប៉ុន្តែខ្ញុំពុំអាចប្រាប់លំអិតបានទេ” ។ ប៉ូលិសរកឃើញកាំភ្លើង ២ដើមនៅកន្លែងកើតហេតុ ។
ប៉ូលិសកំពុងថ្លឹងថ្លែងសន្និដ្ឋានថា នេះជាការសម្លាប់មនុស្សរួចធ្វើអត្តឃាត ហើយគេក៏ពុំរកឃើញមានជនល្មើសណាមួយផ្សេងទៀតឡើយ ៕
ប្រជុំជន Osmington នៅអូស្ត្រាលី ។