សៀមរាប ៖ ដើម្បីចៀសវាងការខូចខាតផលប្រយោជន៍ ពីការទិញលក់ កាន់កាប់ ដីពីឈ្មួញទុច្ចរិត អាជ្ញាធរជាតិអប្សរា បានបញ្ជាក់ជាថ្មីថា រាល់ការសាងសង់ទាំងអស់ ក្នុងតំបន់អង្គរ ត្រូវមានការអនុញ្ញាពីអាជ្ញាធរជាតិអប្សរាជា។
អាជ្ញាធរជាតិអប្បរា នាថ្ងៃទី១១ ខែឧសភា ឆ្នាំ២០១៨នេះ ចេញសេចក្ដីជូនដំណឹងពន្យល់ប្រាប់សាធារណជន ក្នុងន័យទប់ស្កាត់កុំឲ្យចាញ់បោកតាមការផ្សព្វផ្សាយភូតកុហក លើបណ្ដាញព័ត៌មានសង្គម ដែលអះអាងថា មានការកាត់ដីមួយចំនួនចេញពីតំបន់អង្គរ ស្ថិតនៅភូមិអញ្ចាញ សង្កាត់នគរធំ ក្រុងសៀមរាប ហើយថែមទាំងអាចសាងសង់សំណង់ស្រាលៗ ដូចជាលំនៅដ្ឋានបានទៀតផង។ អាជ្ញាជាតិអប្សរា នឹងចាត់វិធានការតាមផ្លូច្បាប់ ចំពោះបុគ្គលណាដែលនៅបន្តភូតកុហកសាធារណជន ក្នុងគោលបំណងកេងចំណេញដីធ្លីក្នុងតំបន់រមណីយដ្ឋានអង្គរ ហើយបានអំពាវនាវដល់សាធារណជនទាំងអស់ សូមកុំចាញ់កលល្បិចបោកប្រាសរបស់បុគ្គលមួយក្តាប់តូច។
អាជ្ញាជាតិអប្សរា បានបញ្ជាក់ថា គ្មានការកាត់ដីចេញពីតំបន់អង្គរ ដូចការផ្សព្វផ្សាយបោកប្រាសនោះឡើយ។
សេចក្ដីជូនដំណឹងរបស់អាជ្ញាធរជាតិអប្សរា៖ស្របតាមជំពូកមួយ មាត្រា៤នៃព្រះរាជក្រឹត្យលេខ០០១ន.ស ចុះថ្ងៃទី២៨ខែឧសភាឆ្នាំ១៩៩៤ ស្តីពីការកំណត់និងការចាត់ចែងគ្រប់គ្រងតំបន់សៀមរាមអង្គរ និងប្រការ១ និងប្រការ២ នៃសេចក្តីសម្រេចលេខ៧០សសរ ចុះថ្ងៃទី១៦ខែវិច្ឆិកា ឆ្នាំ២០០៤ ស្តីពីការកំណត់បទដ្ឋាននៃការប្រើប្រាស់ដីធ្លីនៅតំបន់១ និងតំបន់២ ក្នុងតំបន់រមណីយដ្ឋានសៀមរាបអង្គរ ហាមឃាត់លើសកម្មភាពទិញលក់ដីរបស់ឈ្មួញក្នុងគោលដៅធ្វើអាជីវកម្មយកចំណេញសម្រាប់ក្រុមហ៊ុន ឬបុគ្គល ឬការទិញ លក់សម្រាប់យកទៅសាងសង់សណ្ឋាគារ ភោជនីយដ្ឋាន ខារ៉ាអូខេ ជាដើម។ល។៕ ដោយ៖បញ្ញាស័ក្តិ