តាកែវ៖ ទីតាំងផលិតស្ករត្នោតក្លែងក្លាយចំនួន៤៣ទីតាំង នៅក្នុងឃុំចំនួន៣ របស់ស្រុកបាទី ខេត្តតាកែវ ដែលផលិតគ្មានស្តង់ដារ បច្ចេកទេស និងក្លែងក្លាយលាយជាមួយសារធាតុផ្សំជាច្រើនមុខដើម្បីបង្កើនបរិមាណ ជាពិសេសមិនមានវត្ថុធាតិដើមពីទឹកត្នោត ត្រូវបានអាជ្ញាធរស្រុក សហការជាមួយមន្ត្រីជំនាញកាំកុងត្រូល និងមន្ទីរជំនាញឧស្សាហកម្ម សិប្បកម្មខេត្ត ចុះបិទចោលទាំងស្រុង និងធ្វើការរឹបអូសនូវសម្ភារៈ សម្រាប់ផលិតស្ករត្នោតក្លែងក្លាយ នៅព្រឹកថ្ងៃសុក្រទី១១ ខែឧសភា ឆ្នាំ២០១៨នេះ ។
លោក ភួន ឈីម អភិបាលស្រុកបាទី បានថ្លែងថា នាកន្លងមក អាជ្ញាធស្រុក និងមន្ត្រីជំនាញ មានការយោគយល់ច្រើន ដោយបានចុះមកអប់រំ និងបានធ្វើការណែនាំ ឲ្យសិប្បកម្មទាំង៤៣ទីតាំង នៅក្នុងឃុំទាំង៣ នៃស្រុកបាទីនេះ បញ្ឈប់សកម្មភាពផលិតស្កត្នោតក្លែងក្លាយ ក៏ប៉ុន្តែម្ចាស់សិប្បកម្មមិនបានគោរពទៅតាមការណែនាំរបស់អាជ្ញាធនោះទេ ដូច្នេះថ្ងៃនេះក៏បានចុះមកបិទដោយផ្ទាល់ និងបានធ្វើការរឹបអូសសម្ភារៈកែច្នៃមួយចំនួន យកទៅរក្សាទុកនៅសាលាស្រុក។
លោកអភិបាលស្រុកបាទី បានថ្លែងបន្តថា នឹងមិនបណ្ដែតបណ្ដោយឲ្យមានការលួចផលិតស្ករត្នោតក្លែងក្លាយសារជាថ្មីនោះទេ ហើយអាជ្ញាធក៏នឹងធ្វើការឃ្លាំមើលចំពោះទីតាំង ផលិតស្ករត្នោតក្លែងក្លាយទាំងអស់នេះ។ លោក ភួន ឈីម ក៏បានព្រមានទៅដល់ម្ចាស់ទីតាំងទាំងនោះថា បើសិនជាម្ចាស់ទីតាំងណានៅតែបន្តលួចផលិត នឹងចាត់វិធានការណ៍តាមផ្លូវច្បាប់ ដោយកសាងសំណុំរឿងបញ្ជូនទៅកាន់តុលាការ។
យោងតាមមន្ត្រីជំនាញ នៃមន្ទីរឧស្សាហកម្ម និងសិប្បកម្មខេត្តតាកែវ បានឲ្យដឹងថា ទីតាំងផលិតស្កត្នោតកន្លែងក្លាយនេះ សុទ្ធតែពុំមានច្បាប់អនុញ្ញាតនោះទេ ហើយកន្លងមកលោកទេសរដ្ឋមន្ត្រី ចម ប្រសិទ្ធិ បានសម្រេចឲ្យបិទទីតាំងផលិតស្ករត្នោតក្លែងក្លាយនេះ តាំងពីឆ្នាំ២០១៧មកម្ល៉េះ ប៉ុន្តែម្ចាស់សិប្បកម្មនៅតែបន្តលួចផលិតទាំងខុសច្បាប់។
លោក ប៉ោ លាងគង់ ប្រធានសាខាកាំកុងត្រូលខេត្តតាកែវ បានឲ្យដឹងដែរថា ការផលិតស្ករត្នោតក្លែងក្លាយនេះធ្វើឲ្យប៉ះពាល់សុខភាព ប្រជាពលរដ្ឋយ៉ាងខ្លាំង ព្រោះការផលិតគ្មានអនាម័យ គ្មានបច្ចេកទេសត្រឹមត្រូវ ម្យ៉ាងទៀតពួកគាត់មិនបានយកវត្ថុធាតុដើមទឹកត្នោតយកមកកផលិតនោះទេ គឺគ្រាន់តែយកស្ករស ប្រេងឆា ទឹកមិនស្អាត នឹងមានម៉ូទ័រសម្រាប់កូរស្ករទាំងនោះ កែច្នៃចេញជាស្ករត្នោត។ ដូច្នោះដើម្បីលុបបំបាត់កុំឲ្យកើតមានឡើង ពិសេសមិនឲ្យមានការធ្វើចរាចរណ៍ដែលនាំឲ្យប៉ះពាល់សុខភាពនោះ អាជ្ញាធរមានតែចុះបិទទីតាំង និងធ្វើការដកហូតសម្ភារៈទាំងនេះតែម្តង៕ ដោយ ៖ បញ្ញាស័ក្តិ