រាជធានីភ្នំពេញ៖ មន្ត្រីរៀបចំបុណ្យជាតិ-អន្តរជាតិ និងសមត្ថកិច្ចចម្រុះ ប្រចាំការការពារសន្តិសុខសណ្តាប់ធ្នាប់ ជូន ព្រះរាជពិធីបុណ្យអុំទូកឆ្នាំនេះ បានអះអាងថា ព្រះរាជពិធីបុណ្យអុំទូករយៈពេល ៣ថ្ងៃ ដែលបានចាប់ផ្តើម នៅថ្ងៃព្រហស្បតិ៍ ទី២ ខែវិច្ឆិកា ឆ្នាំ២០១៧ បានដំណើរការធម្មតា និងរលូន ស្របតាមកម្មវិធី ដែលបានព្រាងទុក។ ប៉ុន្តែវេទិកា នៅមុខព្រះបរមរាជវាំង ហាក់ពុំសូវឃើញមានប្រជាពលរដ្ឋមកចូលរួមទស្សនាការប្រណាំទូក ង ឲ្យបានច្រើនចុះករនោះទេ។
មន្ត្រីគណៈកម្មាធិការជាតិរៀបចំបុណ្យជាតិ-អន្តរជាតិ បានឲ្យដឹងថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលបានចាប់ផ្តើម នៅថ្ងៃទី២ ខែវិច្ឆិកា នៅតាមដងទន្លេសាប ទល់មុខព្រះបរមរាជវាំង រាជធានីភ្នំពេញ មិនសូវមានប្រជាពលរដ្ឋទស្សនាទេ ប៉ុន្តែបានដំណើរការជាធម្មតា និងមានសុវត្ថិភាពល្អ។
មន្ត្រីរៀបចំបុណ្យជាតិ ស្នើមិនបញ្ចេញឈ្មោះ បានព្យាករណ៍ទុកមុនថា បុណ្យអុំទូកឆ្នាំនេះ ទំនងជាមិនសូវមានប្រជាពលរដ្ឋមកពីតាមបណ្តាខេត្ត នៅទូទាំងប្រទេស ធ្វើដំណើរមកចូលរួមទស្សនាការប្រណាំងទូក នៅទន្លេចតុមុខ មុខព្រះបរមរាជវាំង រាជធានីភ្នំពេញ ច្រើនកុះករនោះទេ។
ចំណែក កម្លាំងសមត្ថកិច្ចនគរបាល និងកងរាជអាវុធហត្ថ ដែលប្រចាំការ នៅតាមច្រកចេញចូល នៅតាមគោលដៅជាយ រាជធានីភ្នំពេញមួយចំនួន មានផ្លូវជាតិលេខ៣ ផ្លូវជាតិលេខ៤ និងផ្លូវជាតិលេខ ៥ ជាដើម បានឲ្យដឹងថា ថ្ងៃដំបូង នៃព្រះពិធីបុណ្យអុំទូកឆ្នាំនេះ ពិតជាមិនសូវឃើញមានរថយន្តដឹកប្រជាពលរដ្ឋ មកពីតាមបណ្តាខេត្តនានា ចូលរាជធានីភ្នំពេញច្រើនទេ។ ប៉ុន្តែបែរជាមានប្រជាពលរដ្ឋ ធ្វើដំណើរតាមរថយន្តច្រើនបន្តកន្ទុយគ្នា បានចាកចេញពីរាជធានីភ្នំពេញមានចំនួនច្រើនទៅវិញ។
សមត្ថកិច្ចចម្រុះ ដែលប្រចាំការនៅតាមគោលដៅនានា ចេញ និងចូលមករាជធានីភ្នំពេញ បានឲ្យដឹងថា នៅថ្ងៃចាប់ផ្តើម ព្រះរាជពិធីបុណ្យអុំទូកឆ្នាំនេះ មិនមានចរាចរណ៍កកស្ទះធ្ងន់ធ្ងរឡើង ជាពិសេសបញ្ហាសន្តិសុខ គឺកម្លាំងចម្រុះគ្រប់ស្ថាប័ន បានសហការគ្នា ពង្រឹងសកម្មភាពល្បាត និងដាក់ពង្រាយការពារសុវត្ថិភាព ជូនភ្ញៀវជាតិអន្តរជាតិ ដែ លចូលមកទស្សនា ការប្រណាំងទូកនេះ មានការទទួលខុសត្រូវខ្ពស់នៅតាមគោលដៅនីមួយៗ ដោយមិនទាន់ឃើញកើតមាន នូវបទល្មើសផ្សេងៗ គួរឲ្យកត់សម្គាល់នោះទេ។
ព្រះរាជពិធីបុណ្យអុំទូក ឬប្រណាំងទូក ង មានរយៈពេល ៣ថ្ងៃ ចាប់ពីថ្ងៃទី២ ដល់ថ្ងៃទី៤ ខែវិច្ឆិកា ឆ្នាំ២០១៧។
គណៈកម្មាធិការជាតិរៀបចំបុណ្យជាតិអន្តរជាតិ បង្ហាញថា កម្មវិធីប្រណាំងទូក នៅតាមថ្ងៃនីមួយៗ ចាប់ផ្តើមនៅម៉ោង ១១ព្រឹក រហូតដល់ម៉ោង ៥ និង៣០នាទី នៅតាមដងទន្លេសាប មុខព្រះបរមរាជវាំង រាជធានីភ្នំពេញ។ ការប្រណាំងទូកនេះ មានចំនួន ២ជើង គូដដែល ដោយគ្រាន់តែដូរខ្សែទឹកខាងក្នុង ឲ្យទៅខាងក្រៅ និងខាងក្រៅ ដូរមកខាងក្នុង។
ព្រះរាជពិធីបុណ្យអុំទូកឆ្នាំនេះ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ស្តេចយាងទត ការប្រណាំងទូក នៅមុខព្រះបរមរាជវាំង និងព្រះរាជប្រទានភ្លើងទៀនជ័យ លើប្រទីបព្រះបរមរាជវាំង នៅម៉ោង ៦ និង ៣០នាទីល្ងាច ដោយមានវត្តមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិតជាភរិយា ព្រមទាំងថ្នាក់ដឹកនាំជាន់ខ្ពស់ក្នុងជួររាជរដ្ឋាភិបាលជាច្រើនរូបទៀតអញ្ជើញចូលរួម។
ព្រះរាជពិធីបុណ្យអុំទូកឆ្នាំ២០១៧នេះ មានប្រទីបចំនួន ១៣ គឺ៖ ប្រទីបព្រះបរមរាជវាំង ប្រទីបព្រឹទ្ធសភា ប្រទីបរដ្ឋសភា ប្រទីបរាជរដ្ឋាភិបាល ប្រទីបក្រសួងយុត្តិធ៌ម ប្រទីបក្រសួងការពារជាតិ ប្រទីបក្រសួងមហាផ្ទៃ ប្រទីបក្រសួងសេដ្ឋកិច្ច និងហិរញ្ញវត្ថុ ប្រទីបក្រសួងឧស្សាហកម្ម និងសិប្បកម្ម ប្រទីបក្រសួងពាណិជ្ជកម្ម ប្រទីបក្រសួងទេសចរណ៍ ប្រទីបក្រសួងរ៉ែ និងឋាមពល និងប្រទីបសាលារាជធានីភ្នំពេញ។
គណៈកម្មាធិការជាតិរៀបចំបុណ្យជាតិអន្តរជាតិ បង្ហាញថា ព្រះរាជពិធីបុណ្យអុំទូកឆ្នាំនេះ មានទូកសរុបចំនួន ១៣៧គូ ឬស្នើ ២៧៤ទូក នៅទូទាំងប្រទេសកម្ពុជា បានមកចូលរួមប្រកួតប្រជែង៕ ដោយ ៖ សត្យា
