រដ្ឋការឥណ្ឌូណេស៊ី បានចេញបញ្ជាឲ្យជម្លៀសពលរដ្ឋ ក្រោយពេលភ្នំភ្លើង Merapi លើកោះ Java បានបញ្ចេញកម្សួលផ្សែងធូលីឡើងលើដល់ទៅ ៥.៥០០ម៉ែត្រ ។
Sutopo Purwo Nugroho អ្នកជំនាញនៃអាជ្ញាធរកាត់បន្ថយគ្រោះមហន្តរាយឥណ្ឌូណេស៊ី សំណូមពរឲ្យពលរដ្ឋរស់នៅក្នុងវិជ្ជមាត្រ 5km ពីភ្នំភ្លើង Merapi ត្រូវចាកចេញទៅកាន់កន្លែងសុវត្ថិភាព ក្រោយពេលកំពូលភ្នំភ្លើងចាប់ផ្តើមបង្ហៀរកម្អែរនៅវេលាម៉ោង ៧និង៣០នាទី ព្រឹកថ្ងៃទី ១១ ខែឧសភា (ម៉ោងតំបន់) ។
មានពលរដ្ឋប្រមាណ ១២.០០០នាក់ រស់នៅជុំវិញភ្នំភ្លើងនេះ តែពុំទាន់ដឹងមានប៉ុន្មាននាក់ ត្រូវជម្លៀសចេញទេ ។ តាមអ្នកនាំពាក្យរូបនេះ មនុស្ស ១២០នាក់ កំពុងស្ថិតនៅលើភ្នំ ខណៈពេលភ្នំភ្លើងផ្ទុះ ត្រូវបានសង្គ្រោះមានសុវត្ថិភាពហើយ ។
កម្សួលធូលីផ្សែងនៅព្រឹកថ្ងៃទី ១១ ខែឧសភា ។
Merapi ជាភ្នំភ្លើងមួយក្នុងចំណោមភ្នំភ្លើងមានសកម្មភាពជាញឹកញាប់បំផុតនៅឥណ្ឌូណេស៊ី ។ ការផ្ទុះកាលពីឆ្នាំ ២០១០ គេបានជម្លៀសមនុស្ស ២៨០.០០០នាក់ ហើយមានមនុស្សស្លាប់ ៣៥០នាក់ ។ វាក៏ជាការផ្ទុះខ្លាំងបំផុតគិតចាប់ពីឆ្នាំ ១៩៣០ មក ។
ប្រទេសឥណ្ឌូណេស៊ីជាប្រជុំកោះមួយ ដែលមានកោះរហូតដល់ទៅជាង ១៧.០០០កោះ ទាំងតូចទាំងធំ ហើយក៏ស្ថិតនៅលើក្រវាត់ភ្នំភ្លើងប៉ាស៊ីហ្វិក ។ បច្ចុប្បន្នភ្នំភ្លើងជិត ១៣០ កំពុងមានសកម្មភាព ៕