មង្គលការជនជាតិចិនទំនើបៗ ត្រូវបានគេដឹងថា រៀបចំធ្វើឡើងយ៉ាងធំដុំ ដែលតែងតែពាក់ព័ន្ធនឹងប្រភេទផ្ទាំងទស្សនីយភាពដ៏អធឹកអាធមផ្សេងៗមួយចំនួន ។ ប៉ុន្តែ សម្រាប់ពិធីមង្គលការថ្មីមួយនេះវិញ ពិតជាធ្វើឲ្យអ្នកទស្សនាស្លុតរន្ធត់ជំនួសជាខ្លាំង ជាមួយនឹងទិដ្ឋភាពបំផ្ទុះផាវដ៏ខ្លាំងក្លាប្រៀបដូចទីកន្លែងកំពុងរងសង្គ្រាមអីចឹង ។
យោងតាមប្រភពព័ត៌មានបានឲ្យដឹងថា គូស្នេហ៍មួយនៅក្នុងប្រទេសចិន បានសម្រេចចិត្តឲ្យមានការបំផ្ទុះឡើង នៅក្នុងថ្ងៃដ៏ពិសេសរបស់ពួកគេ ដោយប្រើប្រាស់ផាវផ្សេង ក្នុងអំឡុងធ្វើពិធីនៃមង្គលការរបស់ពួកគេ ។
នៅក្នុងខ្សែវីដេអូខ្លី ដែលត្រូវបានបង្ហោះឡើងដំបូងនៅលើ LiveLeak បានបង្ហាញឲ្យឃើញទីកន្លែងអាពាហ៍ពិពាហ៍មួយ ហាក់ដូចបញ្ចប់ត្រឹមពាក់កណ្តាលទី នៅក្នុងសមរភូមិសង្គ្រាមដ៏សាហាវមួយ ដែលពោរពេញដោយផ្សែងផុសផុលឡើងងងឹតឈ្លប់ និងភាពចលាចលតែម្តង ។
ភ្ញៀវចូលរួមអាចត្រូវបានឃើញនាំគ្នាគុបប្រភេទផាវផ្សេងៗ ខណៈគូស្វាមីភរិយា និងហែហមរបស់ពួក បានឆ្លងកាត់នៅក្នុងក្បួនដង្ហែរមួយ ។ ទោះយ៉ាងណា ពុំមានសេចក្តីរាយការណ៍ថា មាននរណាម្នាក់ទទួលរងរបួសពីការបំផ្ទុះដ៏ធំនេះទេ ៕ ចន្ទី