ភ្នំពេញ ៖ មានពិធីចុះហត្ថលេខាលើអនុស្សរណៈនៃកិច្ចសហប្រតិបត្តិការរវាងរដ្ឋបាលរាជធានីភ្នំពេញ និងសមាគមអន្តរជាតិអភិបាលក្រុង ប្រើប្រាស់ភាសារបារាំង(AIMF) ត្រូវបានធ្វើឡើងនៅរាជធានីភ្នំពេញនារសៀលថ្ងៃទី១១ឧសភាដែលចុះហត្ថលេខាដោយលោកឃួង ស្រេង អភិបាលនៃគណៈអភិបាលរាជធានីភ្នំពេញ និងលោកព្យ៊ែ បៃយ៉េ លេខាអចិន្ត្រៃយ៍របស់(AIMF)។
ក្នុងឱកាសនោះលោកឃួង ស្រេងបានថ្លែងថា៖អនុស្សរណៈនេះផ្តោតសំខាន់ទៅលើគំនិតផ្តួចផ្តើមចំនួន២គឺទី១៖គំនិតផ្តួចផ្តើមបេតិកភណ្ឌទីក្រុង និងការអភិវឌ្ឍប្រកបដោយចេរភាពសម្រាប់ទីក្រុងអាស៊ីអាគ្នេយ៍។ទី២៖គំនិតផ្តួចផ្តើមដើម្បីសុខភាព និងអនាម័យល្អក្នុងទីក្រុងដោយក្នុងក្របខ័ណ្ឌសហប្រតិបត្តិការសម្រាប់ការអនុវត្តគំនិតផ្តួចផ្តើមទាំង២នេះ រដ្ឋបាលរាជធានីភ្នំពេញ នឹងទទួលបានទឹកប្រាក់ចំនួន១៤៣.៥០០អ៊ឺរ៉ូពីភាគីសមាគម(AIMF)។
លោកអភិបាលបន្តថា ៖ បច្ចុប្បន្នទោះបីរាជធានីភ្នំពេញកំពុងតែរីករាយទទួលនូវសមិទ្ធផល និងផ្លែផ្កាលើគ្រប់វិស័យក្រោមឆត្រសន្តិភាព ដែលជាគុណបំណាច់ដ៏ធំធេងមិនអាចកាត់ថ្លៃបានកើតចេញពីកិច្ចខិតខំប្រឹងប្រែងដ៏សែនលំបាករបស់រាជរដ្ឋាភិបាលក៏ដោយ ក៏ថ្នាក់ដឹកនាំរដ្ឋបាលរាជធានីភ្នំពេញនៅតែបន្តបំពេញបេសកកម្មរបស់ខ្លួនយ៉ាងខ្ជាប់ខ្ជួនជានិច្ច ពោលគឺប្រែក្លាយទីក្រុងដែលធ្លាប់តែកម្សត់នេះ ឲ្យទៅជារាជធានីរមនាសម្រាប់ប្រជាជនគ្រប់លំដាប់ថ្នាក់ស្នាក់អាស្រ័យ ជាទីក្រុងទំនើប១ប្រកបដោយផាសុខភាព និងសុវត្ថិភាព អំណោយផលសម្រាប់ការរស់នៅប្រកបអាជីវកម្ម វិនិយោគដោយការជឿជាក់។
ជាមួយគ្នានោះដែរលោកអភិបាលក៏បានថ្លែងអំណរគុណដល់ស្ថាប័នAIMF ដែលបានជ្រើសរើសរាជធានីភ្នំពេញ ដើម្បីបង្កើតការិយាល័យប្រចាំតំបន់អាស៊ាននៅក្នុងទីក្រុងភ្នំពេញ ដើម្បីបង្កភាពងាយស្រួលក្នុងការទំនាក់ទំនងផ្ទាល់ រវាងការិយាល័យនៅក្នុងទីក្រុងភ្នំពេញ និងការិយាល័យកណ្តាលនៅក្នុងទីក្រុងប៉ារីសប្រទេសបារាំង សម្រាប់សមាគមអភិបាលក្រុងនិយាយភាសាបារាំង។
ដែលសន្និបាទAIMF នឹងប្រារព្វធ្វើឡើងនៅទីក្រុងនីល ប្រទេសបារាំង នាថ្ងៃទី៥-៦ខែវិច្ឆិកា២០១៨ខាងមុខនេះដោយផ្តោតសំខាន់ពាក់ព័ន្ធនិងលើវិស័យកីឡា ខណៈដែលទីក្រុងភ្នំពេញ ជាសមាជិកAIMFនេះផង ហើយអភិបាលរាជធានីភ្នំពេញ ក៏ជាសមាជិកអចិន្ត្រៃយ៍ AIMF ដែលមានឥទ្ធិពលនៅក្នុងតំបន់ផងដែរនោះ៕ ដោយ៖បញ្ញាស័ក្តិ