ភ្នំពេញ៖ យោងតាមរបាយការណ៍នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី១១ ខែមេសា ឆ្នាំ២០១៨ មានករណីគ្រោះថ្នាក់ចរាចរ នៅទូទាំងប្រទេសកើតឡើងចំនួន១០លើក បណ្ដាលឲ្យមនុស្សស្លាប់៧នាក់ រងរបួសស្រាល៤នាក់ និងរបួសធ្ងន់៧នាក់។
នៅក្នុងហេតុការណ៍គ្រោះថ្នាក់ចរាចរទាំង១០លើកនេះ បណ្ដាលឲ្យខូតខាតម៉ូតូចំនួន១២គ្រឿង រថយន្តតូច៤គ្រឿង រថយន្ដធុនធំ២គ្រឿង និងគោយន្ដ១គ្រឿង ហើយមូលហេតុដែលបណ្ដាលឲ្យកើត មានគ្រោះថ្នាក់ចរាចរ រួមមានមិនគោរពសិទ្ធិ ល្មើសល្បឿន បត់គ្រោះថ្នាក់ ស្រវឹង និងប្រជែង។
រយៈពេល១១ថ្ងៃ ខែឧសភា ឆ្នាំ២០១៨នេះ មានករណីគ្រោះថ្នាក់ចរាចរកើតឡើងចំនួន៨៨លើក បណ្ដាលឲ្យមនុស្សស្លាប់៤៣នាក់ របួសធ្ងន់ចំនួន៨៨នាក់ និងរបួសស្រាលចំនួន៣១នាក់៕ ដោយ៖បញ្ញាស័ក្តិ