នេះជាខណៈពេលដ៏រន្ធត់មួយ ដែលបុរសម្នាក់បានព្យាយាមចាប់កូនក្មេងម្នាក់អូសនាំយកទៅ ប៉ុន្តែ សំណាងណាស់ ដែលគ្រានោះក្មេងប្រុសម្នាក់ត្រូវជាបង បានខំប្រឹងតតាំងដើម្បី «រំដោះ» ប្អូនប្រុសតូចរបស់គេពីកណ្តាប់ដៃរបស់បុរសនោះ ។
បុរសស្ថិតក្នុងសម្លៀកបំពាក់ពណ៌ខ្មៅ ដែលក្រោយមកត្រូវបានអាជ្ញាធរបញ្ជាក់ថាមានឈ្មោះ Zhu អាចត្រូវបានមើលឃើញក្នុងរូបភាពដ៏គួរឲ្យរន្ធត់ ដើរឆ្លងកាត់កូនក្មេងមួយក្រុម ដោយចូលទៅចាប់កូនក្មេងម្នាក់ក្នុងចំណោមនោះ និងបន្ទាប់មក ក៏បានអូសដៃវាទៅជាមួយ ។
ភ្លាមៗនោះ បន្ទាប់បានដឹងថា ប្អូនប្រុសតូចរបស់ខ្លួនត្រូវបាននាំយកទៅ ក្មេងប្រុសម្នាក់ត្រូវជាបង ក៏បានស្ទុះដេញតាមជនចាប់ជំរិតនោះ និងចាប់ទាញប្អូនរបស់ខ្លួនត្រឡប់មកវិញ ។
Zhu បន្ទាប់មក បានដើរចេញពីកន្លែងកើតហេតុ ក្នុងឥរិយាបទហាក់ដូចជាគ្មានរឿងអ្វីកើតឡើង ។
យោងតាមរបាយការណ៍ប្រព័ន្ធផ្សព្វផ្សាយក្នុងស្រុក ឪពុកម្តាយរបស់ក្មេងប្រុសរងគ្រោះនោះបានរាយការណ៍ពីហេតុការណ៍នេះ ទៅប៉ូលីស Fenggang ដែលភ្លាមៗនោះបានតាមដានសង្ស័យ ។ នៅរសៀលនាថ្ងៃកើតហេតុនោះ Zhu ត្រូវបានចាប់ខ្លួនទៅកាន់ប៉ុស្ត៍ប៉ូលីស ។
នៅពេលសួរចម្លើយ Zhu បានអះអាងថា រូបគេគ្មានចេតនាចាប់ក្មេងប្រុសនោះទេ ព្រោះគាត់គ្រាន់តែចង់ «លេងជាមួយវា» ប៉ុណ្ណោះ ។
ខណៈពេលនោះ អាជ្ញាធរមានសមត្ថកិច្ច ក៏ពុំទាន់ដាក់ការចោទប្រកាន់ប្រឆាំងនឹងជនសង្ស័យនេះទេ ព្រោះរង់ចាំការស៊ើបអង្កេតបន្ថែម ៕ ចន្ទី