អតីតនាយករដ្ឋមន្ត្រីម៉ាឡេស៊ី Najib Razak ដែលទើបនឹងចាញ់ការបោះឆ្នោតកាលពីពេលថ្មីៗនេះ ព្រមទាំងប្រពន្ធរបស់គាត់ ត្រូវបាន អាជ្ញាធរម៉ាឡេស៊ីហាមប្រាមមិនឲ្យចាកចេញពីប្រទេស។ នេះបើតាមការចេញផ្សាយរបស់សារព៌តមាន BBC នៅថ្ងៃរសៀលនេះ។
នាយករដ្ឋមន្រ្តីថ្មីរបស់ប្រទេសម៉ាឡេស៊ី Mahathir Mohamad វ័យ ៩២ឆ្នាំ
ការហាមប្រាមមិនឲ្យចាកចេញពីប្រទេសម៉ាឡេស៊ីនេះ កើតឡើង ក្រោយពេលលោក Najib Razak បានថ្លែងថា លោក ព្រមទាំងក្រុមគ្រួសារមានគំរោងដើរកំសាន្តនៅក្រៅប្រទេស នៅថ្ងៃសៅរ៍នេះ។
លោកថ្លែងនៅក្នុងបណ្តាញទំនាក់ទំនងសង្គមរបស់លោកដូច្នេះថា លោកត្រូវបានអាជ្ញធរអន្តោប្រវេសន៍ជូនដំណឹងថា គ្រួសាររបស់លោក មិនត្រូវបានអនុញ្ញាតិឲ្យធ្វើដំណើរកំសាន្តក្រៅប្រទេសនោះទេ។
ចំពោះបំរាមនេះវិញ អតីតនាយករដ្ឋមន្ត្រីវ័យ ៦៤រូបនេះ បានបញ្ជាក់ថា លោកនឹងធ្វើតាមបំរាម។
លោក Najib Razak កំពុងរងការចោទប្រកាន់ថា បានបន្លំលុយចំនួន ៧០០លានដុល្លាអាមេរិច ពីមូលនិធីវិនិយោគទុនរបស់រដ្ឋ កាលពីឆ្នាំ ២០១៥ ប៉ុន្តែការចោទប្រកាន់នេះ ត្រូវបានលោក បដិសេធ។
លោក Najib Razak អតីតនាយករដ្ឋមន្រ្តី ដែលទើបនឹងចាញ់ការបោះឆ្នោត
សូមបញ្ជាក់ថា នាយករដ្ឋមន្ត្រីថ្មីរបស់ប្រទេសម៉ាឡេស៊ីឈ្មោះ Mahathir Mohamad ទើបតែបានចូលស្បថកាន់តំណែងកាលពីថ្ងៃព្រហស្បតិ៍កន្លងទៅ បន្ទាប់ពីឈ្នះការបោះឆ្នោតកាលពីពេលថ្មីៗនេះ និងបានក្លាយជាមេដឹកនាំវ័យចំណាស់បំផុតក្នុងពិភពលោក ខណៈលោកបច្ចុប្បន្នមានអាយុ ៩២ឆ្នាំ។
Mahathir Mohamad ធ្លាប់ជាអតីតនាយករដ្ឋមន្ត្រីរបស់ប្រទេសម៉ាឡេស៊ី ប៉ុន្តែកាលពីពេលថ្មីៗនេះ បានចេញពីការចូលការវិវត្តន៍ និងបានចូលជាមួយបក្សប្រឆាំង ដើម្បីប្រកួតប្រជែងជាមួយនឹងលោក Najib Razak ហើយទីបំផុតលោកទទួលបានជ័យជំនះក្នុងការបោះឆ្នោត៕ សុភ័ក្ត្រ