ខេត្តស្វាយរៀង ៖ នៅថ្ងៃសៅរ៍ ១៣រោជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១២ ខែ ឧសភា ឆ្នាំ ២០១៨ ក្រុមការងារសាខា ដឹកនាំដោយលោក ម៉ែន វិបុល ប្រធានគណៈកម្មាធិការសាខា បាននាំយកអំណោយមនុស្សធម៌របស់សាខា ទៅចែកជូនគ្រួសារដែលរងគ្រោះដោយសារខ្យល់កន្ត្រាក់ បណ្តាលឲ្យរលំផ្ទះទាំងស្រុង ៨ ខ្នង នៃគ្រួសារ ប៉ះពាល់មួយផ្នែក ៤ ខ្នង នៃគ្រួសារ សរុប ១២ ខ្នង នៃគ្រួសារ នៅស្រុករំដួលមកពីឃុំ ជ្រុងពរពេល ៧ គ្រួសារ ឃុំសង្កែ ៣ គ្រួសារ និងឃុំស្វាយចេក ២ គ្រួសារ ។
នៅថ្ងៃដរដែលនោះដែរ លោកស្រី ដួង វណ្ណា អនុប្រធានកិត្តិយសសាខា បានបន្តនាំយកអំណោយមនុស្សធម៌ចែកជូនគ្រួសាររងគ្រោះដោយសារខ្យល់កន្ត្រាក់បណ្តាលឲ្យរលំផ្ទះទាំងស្រុង ៩ ខ្នង នៃគ្រួសារ ប៉ះពាល់មួយផ្នែក ៨ ខ្នង នៃគ្រួសារ សរុប ១៧ ខ្នង នៃគ្រួសារ នៅស្រុកចន្ទ្រា មកពីឃុំ ចន្ទ្រា ១៤ គ្រួសារ ឃុំទួលស្តី ៣ គ្រួសារ ។
ក្នុងឱកាសនោះលោក ម៉ែន វិបុល ប្រធានគណៈកម្មាធិការសាខា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីអាណិតអាសូរ និងការសោកស្តាយចំពោះ ឧបទ្ទវហេតុដែលបានបំផ្លាញលំនៅដ្ឋាន និងទ្រព្យសម្បត្តិរបស់បងប្អូន ដែលបង្ករដោយគ្រោះធម្មជាតិ នាពេលនេះ ។
អំណោយដែលបានចែកជូនដល់គ្រួសាររងគ្រោះទាំងស្រុង ១៧ គ្រួសារ ក្នុង ១ គ្រួសារទទួលបាន អង្ករ ៣០ គក្រ កៅស៊ូតង់ ១ ធុងទឹកជ័រ ១ ឆ្នាំងបាយ សម្ល ២ កន្ទេលបត់ ១ មី ១ កេស ទឹកស៊ីអ៊ីវ ១ យួ ត្រី ខ ១០ កំប៉ុង ឃីត ១ កញ្ចប់មាន មុង ១ ភួយ ១ មុង ១ ក្រម៉ា ១ សារុង ១ និងថវិកា ២០០,០០០ រៀល ។ គ្រួសារប៉ះពាល់មួយផ្នែក ១២ គ្រួសារ ក្នុង ១ គ្រួសារទទួលបាន អង្ករ ៣០ គក្រ កន្ទេលបត់ ១ មី ១ កេស ទឹកស៊ីអ៊ីវ ១ យួ ត្រី ខ ១០ កំប៉ុង ឃីត ១ កញ្ចប់មាន មុង ១ ភួយ ១ មុង ១ ក្រម៉ា ១ សារុង ១ និងថវិកា ៥០,០០០ រៀល ។ ឧបត្ថម្ភដល់ទារកអាយុ ៣ ខែ ២ នាក់ក្នុងម្នាក់ថវិកា ១០០,០០០ រៀល ឧបត្ថម្ភថវិកា ៥០០,០០០ រៀល ដល់លោកយាយ ម៉ា សឿង អាយុ ៨៣ ដែលរងរបួស សម្រាប់ព្យាបាលជម្ងឺ ៕ វ៉ៃកូ