ព្រៃវែង ៖ព្រឹកថ្ងៃទី១២ ខែឧសភា ឆ្នាំ២០១៨នេះ ចៅក្រមស៊ើបសួរនៃអយ្យការអមសាលាដំបូងខេត្តបានចេញដីកាបង្គាប់ឱ្យឃុំខ្លួនជនសង្ស័យម្នាក់ ជាកូនប្រុសលោកឧត្ដមសេនីយ៍ត្រី ឌឹម យ៉ារ៉ុប ស្នងការងនគរបាលខេត្តព្រៃវែង ពីបទ អំពើរំលោភសេពសន្ថវៈស្ថានទម្ងន់ទោសដោយសារមធ្យោបាយប្រើប្រាស់ បង្ខាំងដោយខុសច្បាប់ និងសញ្ចារកម្មស្ថានទម្ងន់ ទាក់ទងទៅនឹងជនរងគ្រោះ តាមមាត្រា ២៤០ចំណុច១ មាត្រា២៥៣ចំណុច៣ មាត្រា២៨៩នៃក្រមព្រហ្មទណ្ឌ ព្រឹត្តនៅភូមិរោង ឃុំចាម ស្រុកកំពង់ត្របែក ខេត្តព្រៃវែង កាលពីថ្ងៃទី១៧ខែវិច្ឆិកា ឆ្នាំ២០១៧ កាលពីថ្ងៃទី១៤ ខែមករា ឆ្នាំ២០១៨។
លោកសាំង សេរី ចៅក្រមស៊ើបសួរនៃសាលាដំបូងខេត្តព្រៃវែង នៅថ្ងៃទី១២ខែឧសភានេះ បានបញ្ជាក់ថា យោងតាមដីកាសន្និដ្ឋានបញ្ជូនរឿងឲ្យស៊ើបសួរលេខ១១៨អក/ពវ១៨ ចុះថ្ងៃទី១២ខែឧសភា ឆ្នាំ២០១៨ បានឃើញមាត្រា ២០៣ មាត្រា២០៤ មាត្រា២០៥ និងមាត្រា២០៦ នៃក្រមនីតិវិធីព្រហ្មទណ្ឌ។ បានឃើញដីកាសម្រេចឲ្យឃុំខ្លួនបណ្តោះអាសន្នលេខ១៥៨ចុះថ្ងៃទី១២ខែឧសភាឆ្នាំ២០១៨។ បានបញ្ជាឲ្យភ្នាក់ងារមានសមត្ថកិច្ចនៃកម្លាំងសាធារណៈធ្វើការនាំខ្លួនជនត្រូវចោទដែលមានឈ្មោះឌឹម មករា ទៅពន្ធនាគារ ឬមណ្ឌលឃុំខ្លួនខេត្តព្រៃវែង ដោយអនុវត្តន៍ឲ្យបានត្រឹមត្រូវតាមនីតិវិធីច្បាប់។ លោកចៅក្រម ក៏បានបង្គាប់ឲ្យប្រធានពន្ធនាគារ ឬមណ្ឌលឃុំខ្លួនខេត្តព្រៃវែង ទទួលជននេះ និងឃុំជននេះរហូតដល់មានបទបញ្ជាថ្មីសម្រេចផ្សេងៗពីនេះ។ លោកចៅក្រម ក៏បានបង្គាប់ឲ្យគ្រប់ភ្នាក់ងារនៃកម្លាំងសាធារណៈទាំងអស់ នៅពេលត្រូវបានបង្ហាញដីកានេះសហការអនុវត្តន៍ឲ្យបានតាមច្បាប់។
សូមបញ្ជាក់ថា បន្ទាប់ពីមានបទបញ្ជាយ៉ាងម៉ឺងម៉ាត់របស់លោកនាយឧត្តមសេនីយ៍ សន្តិបណ្តិត នេត សាវឿន អគ្គស្នងការនគរបាលជាតិ ដល់មន្ត្រីជំនាញចុះស្រាវជ្រាវ និងមានវិធានផ្លូវច្បាប់ ប្រសិនបើរកឃើញបានប្រព្រឹត្តដូចអ្វីដែលចោទប្រកាន់ពីបែកធ្លាយរឿងអាស្រូវកូនប្រុសបង្កើតរបស់ស្នងការរង ស្នងការដ្ឋាននគរបាលខេត្តព្រៃវែង ដែលជាមន្ត្រីនគរបាលឋានន្តរស័ក្តិអនុសេនីយ៍ទោ បានរងការចោទប្រកាន់ថាបានចាប់បង្ខាំងនារីម្នាក់ទុករំលោភសេពសន្ថវៈរួចលក់បន្តទៅឲ្យបុរសផ្សេងទៀតនោះ។
លោកឧត្តសេនីយ៍ទោ ស្រេង ជា ស្នងការនគរបាលខេត្តព្រៃវែង បានឱ្យដឹងថា បន្ទាប់ពីទទួលពាក្យបណ្តឹងជនរងគ្រោះភ្លាមលោកបានសុំគោលការណ៍ថ្នាក់លើនឹងបាចាត់កម្លាំងចុះស្រាវជ្រាវស៊ើបអង្កេតភ្លាមៗរហូតឃាត់ខ្លួនជនសង្ស័យនៅថ្ងៃទី១០ ខែឧសភា ឆ្នាំ២០១៨។ ជនសង្ស័យឈ្មោះ ឌឹម មករា ភេទប្រុស អាយុ៣៣ឆ្នាំ ជនជាតិខ្មែរ រស់នៅភូមិរោង ឃុំចាម ស្រុកកំពង់ត្របែក ខេត្តព្រៃវែង។ បន្ទាប់ពីឃាត់ខ្លួន កម្លាំងជំនាញបានកសាងសំណុំរឿង បញ្ជូនទៅសាលាដំបូងខេត្តព្រៃវែង កាលពីថ្ងៃទី១១ ខែឧសភា និងបន្តរហូតដល់ព្រឹកថ្ងៃទី១២ ខែឧសភា ឆ្នាំ២០១៨នេះ ចៅក្រមស៊ើបសួរ នៃអយ្យការអមសាលាដំបូងខេត្តព្រៃវែង បានចេញដីកាបង្គាប់ឱ្យឃុំខ្លួនជនសង្ស័យពីបទ អំពើរំលោភសេពសន្ថវៈស្ថានទម្ងន់ទោសដោយសារមធ្យោបាយប្រើប្រាស់ បង្ខាំងដោយខុសច្បាប់ និងសញ្ចារកម្មស្ថានទម្ងន់។
សូមរំលឹកថា កាលពីថ្ងៃទី៩ ខែឧសភា ឆ្នាំ២០១៨ នារីរងគ្រោះម្នាក់ដាក់ពាក្យប្ដឹងនៅអធិការរដ្ឋាននគរបាលស្រុកកំពង់ត្របែក ដោយចោទប្រកាន់មកលើបុរសម្នាក់មានតួនាទីជាមន្ត្រីនគរបាលខេត្តព្រៃវែង ឈ្មោះ ឌឹម មករា ជាមន្ត្រីនគរបាលឋានន្តរស័ក្តិអនុសេនីយ៍ទោ ជាកូនប្រុសបង្កើតរបស់លោក ឧត្ដមសេនីយ៍ត្រី ឌឹម យ៉ារ៉ុប ស្នងការរង នៃស្នងការនគរបាលខេត្តព្រៃវែង។
នារីរងគ្រោះបានប្ដឹងចោទប្រកាន់លើ ឈ្មោះ ឌឹម មករា បង្ខាំងទុក និងចាប់រំលោភនាងអស់រយៈពេលជាង៤ខែ និងគ្រោងលក់នាងឲ្យទៅប្រុសផ្សេងទៀត ព្រមទាំងគំរាមកំហែងបាញ់សម្លាប់ ៕ ដោយ៖បញ្ញាស័ក្តិ
