ខេត្តកណ្តាល ៖ នគរបាលស្រុកអង្គស្នួល បានឃាត់ជនសង្ស័យពីរនាក់ ដែលរថយន្តឡិចស៊ីស៣០០មួយគ្រឿង ពណ៌ស គ្មានស្លាកលេខ ហើយឆែកឆេររកឃើញថ្នាំញៀនមួយចំនួន និងកាំភ្លើងខ្លីមួយដើម កាលពីវេលាថ្ងៃទី១១ ឧសភា ស្ថិតនៅលើផ្លូវជាតិលេខ៤ ត្រង់ចំណុចភូមិត្រពាំងរាំង ឃុំព្រៃពួច ស្រុកអង្គស្នួល ខេត្តកណ្តាល ។
នគរបាលស្រុកអង្គស្នួល បានឲ្យដឹងថា ការឃាត់ខ្លួនជនសង្ស័យទាំងពីរនាក់នោះ ក្នុងដែលអធិការនគរបាលស្រុកអង្គស្នួល ដឹកនាំដោយលោកវរសេនីយ៍ មាន សំណាង និងកម្លាំងជំនាញគ្រឿងញៀន សហការជាមួយកម្លាំងសណ្តាប់ធ្នាប់ចរាចរ បានដាក់គោលដៅរឹតបន្តឹងច្បាប់ចរាចរណ៍នៅលើដងផ្លូវ។ នគរបានឆែកមនុស្សប្រុស២នាក់នោះ រកឃើញ ថ្នាំញៀន១កញ្ចប់ ស្មើនឹង១ជី អាវុធខ្លីម៉ាកកា៥៩មួយដើម បង់១គ្រាប់៤គ្រាប់ ស្រោមអាវុធខ្លីចំនួន ៤ និងថង់វេចខ្ចប់ថ្នាំញៀន ដែកកេះជាច្រើននៅកាបូបស្ពាយ ។
ជនសង្ស័យឈ្មោះហួត មឿន ហៅប៉ាវ ហៅម៉ន អាយុ៣៤ឆ្នាំជាអ្នកលក់ម៉ូតូ មានទីលំនៅបច្ចុប្បន្ន នៅភូមិចំរើនផល ឃុំពោធិ៍ម្រាម ស្រុកបរសេដ្ឋខេត្តកំពង់ស្ពឺ និងឈ្មោះធឿស សំអាង អាយុ២៨ឆ្នាំ ជាជាងឡាន មានទីលំនៅភូមិអង្គមេត្រី ឃុំស្រលាំងគ្រើល ខេត្តកំពង់ស្ពឺ ។
ជនសង្ស័យឈ្មោះហួន មឿន បានសារភាពថា ថ្នាំញៀននេះ ខ្លួនបានទិញពីជនមិនស្គាល់ឈ្មោះនៅភ្នំពេញ ទិញម្តងៗចំនួនប្រមាណ៤០០ដុល្លារ ដើម្បីយកទៅលក់បន្ត។ ចំណែកអាវុធខ្លី ឈ្មោះថន ភេទប្រុស នៅតាខ្មៅ ជាអ្នកឱ្យប្រើ ៕ ដោយ៖បញ្ញាស័ក្តិ