កណ្តាល៖ កូនតិរច្ឆាន ស្រវឹងស្រា រករឿងក្នុងគ្រួសារ វាយឪពុកបង្កើតខ្លួនឯងរយះក្បាលហូរឈាមស្រោចខ្លួន បណ្តាលឲ្យរងរបួសយ៉ាងធ្ងន់ធ្ងរ ដែលករណីនេះ កើតហេតុនៅថ្ងៃសៅរ៍ ទី១២ ខែឧសភា ឆ្នាំ២០១៨ វេលាម៉ោង១៨និង៣០នាទី នៅចំណុចភូមិព្រែកស្លែង ឃុំតាលន់ ស្រុកស្អាង ខេត្តកណ្តាល។
នគរបាលមូលដ្ឋានស្រុកស្អាង បានឲ្យដឹងថា ជនរងគ្រោះជាឪពុកឈ្មោះត្រឹក គិន ភេទប្រុស អាយុ ៧២ឆ្នាំ ជនជាតិខ្មែរ មុខរបរជរា មានទីលំនៅនៅភូមិព្រែកស្លែង ឃុំតាលន់ ស្រុកស្អាង ខេត្តកណ្តាល។ ជនសង្ស័យជាកូនឈ្មោះគិន សុគន្ធ ភេទប្រុស អាយុ២៩ឆ្នាំ ជនជាតិខ្មែរ មុខរបរកម្មករសំណង់ មានទីលំនៅ ភូមិព្រែកស្លែង ឃុំតាលន់ ស្រុកស្អាង ខេត្តកណ្តាល។
នគរបាលមូលដ្ឋាន បានបញ្ជាក់ពីសភាពរឿងហេតុនេះថា នៅថ្ងៃ ខែ ឆ្នាំវេលាម៉ោង កើតហេតុខាងលើឈ្មោះគិន សុគន្ធ ស្រវឹងស្រា ហើយមកផ្ទះរបស់ខ្លួនរកកូនឈ្មោះសុគន្ធ ម៉េងហុង អាយុ៦ឆ្នាំ មិនឃើញ ក៏ដើរមកសួរប្រពន្ធឈ្មោះយ៉ា សារ៉ាន់ ដែលកំពុងនៅផ្ទះឪពុកក្មេក ឈ្មោះត្រឹក គិន ដើម្បីរកកូន ពេលនោះឈ្មោះយ៉ា សារ៉ាន់ ឆ្លើយថា កូនទៅជាមួយយាយបាត់ហើយ ពេលនោះឈ្មោះ គិន សុគន្ធ បានច្រឡោតខឹង ក៏យករំពាត់ឫស្សី ទំហំប៉ុនមេជើង វាយអំពូលអគ្គិសនី ដែលបំភ្លឺនៅក្រោមផ្ទះឪពុក បែកអំពូលមួយ បណ្តាលឲ្យដាច់ចរន្តអគ្គិសនីងងឹតឈឹង ភ្លាមនោះឈ្មោះត្រឹក គិន ជាឪពុក ក៏ដើរចេញមកក្រៅបន្ទប់ ស្រាប់តែឈ្មោះ គិន សុគន្ធ ក៏វាយមួយដំបងទៀតចំក្បាលឪពុក បណ្ដាលឲ្យមុតហូរឈាមសន្លប់តែម្តង។
ក្រោយពេលទទួលបានព័ត៌មានខាងលើភ្លាម សមត្ថកិច្ចនគរបាលប៉ុស្តិ៍តាលន់ បានចុះអន្តរាគមន៍ដល់កន្លែងកើតហេតុ រួចឃាត់ខ្លួនឈ្មោះគិន សុគន្ធ មកប៉ុស្តិ៍រដ្ឋបាលដើម្បីសាកសួរ ចំណែកជនរងគ្រោះ បានបញ្ជូនទៅកាន់មណ្ឌលសុខភាពតាលន់ ដោយសភាពជំងឺធ្ងន់ធ្ងរ ក៏បញ្ជូនបន្តទៅកាន់មន្ទីពេទ្យឯកជនសុខាបញ្ញាក្រុងតាខ្មៅ ពិនិត្យឃើញអ្នកជំងឺមានសភាពធ្ងន់ធ្ងរ ព្រមទាំងក្រុមគ្រួសារពុំមានលទ្ធភាពព្យាបាល ទើបសម្រេចបញ្ជូនជនរងគ្រោះត្រឡប់មកផ្ទះវិញ។
បច្ចុប្បន្នជនសង្ស័យបានឃាត់ខ្លួន នៅអធិការដ្ឋាននគរបាលស្រុកស្អាង ដើម្បីបន្តអនុវត្តតាមនីតិវិធី៕ ដោយ៖បញ្ញាស័ក្តិ