ព្រៃវែង៖ មានករណីគ្រោះថ្នាក់ចរាចររវាងម៉ូតូបុកជាមួយរថយន្តក្នុងទិសដៅបញ្ច្រាសគ្នា បណ្តាលឲ្យមនុស្ស៣នាក់ ស្លាប់យ៉ាងរន្ធត់នៅនឹងកន្លែង ខណៈអ្នកបើកបររថយន្តបានរត់គេចខ្លួនបាត់ ស្រមោល ទាំងមិនទាន់ដឹងថាអ្នកណាខុសអ្នកណាត្រូវ បន្សល់ទុកតែសាកសពទាំងបី នៅលើចញ្ចើមផ្លូវ វេលាម៉ោង៥៖៣០នាទីថ្ងៃទី១៣ ខែឧសភា ឆ្នាំ២០១៨ ចំណុចផ្លូវជាតិលេខ១ ចន្លោះគីឡូម៉ែត្រលេខ៨០-៨១ ភូមិបឹងស្នោ ឃុំល្វា ស្រុកព្រះស្តេច ខេត្តព្រៃវែង។
សមត្ថកិច្ចមូលដ្ឋាន បានបញ្ជាក់ថា ម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1CW-5490 បើកដោយឈ្មោះ មុក សុលាប ក្នុងទិសដៅពីកើតទៅលិច បញ្ច្រាសទិសគ្នា លុះមកដល់ចំណុចខាងលើ ក៏បានបុករថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3C-7377 ពេញទំហឹង បណ្តាលឲ្យភាគីខាងម៉ូតូស្លាប់៣នាក់តែម្តង។ រីឯរថយន្ត HYUNDAI បានក្រឡាប់ផ្ញារជើង ក្រោយកើតហេតុភ្លាមអ្នកបើករថយន្តបានគេចខ្លួនបាត់ស្រមោល បន្សល់ទុកតែ រថយន្តនៅចញ្ចើមថ្នល់។
បើតាមរបាយរណ៍របស់សមត្ថកិច្ច បានឱ្យដឹងថា ជនរងគ្រោះដែលបានស្លាប់នៅក្នុងករណីគ្រោះថ្នាក់ចរាចរខាងលើមានឈ្មោះ មុក សុលាប ភេទប្រុស អាយុ១៨ឆ្នាំ រស់នៅភូមិកន្សោមអក ឃុំកន្សោមអក ស្រុកកំពង់ត្របែក ខេត្តព្រៃវែង ជាអ្នកបើកបរម៉ូតួ និងមានអ្នករួមដំណើរពីរនាក់ទៀត ទី១/ឈ្មោះ មុក សំណាង ភេទប្រុស អាយុ ១៨ឆ្នាំ រស់នៅភូមិឃុំជាមួយគ្នា និងទី២.ឈ្មោះ វ៉ា រដ្ឋា ភេទប្រុស អាយុ១៩ឆ្នាំ រស់នៅភូមិបល្ល័ង្ក ឃុំកន្សោមអក ស្រុកកំពង់ត្របែក ខេត្តព្រៃវែង។
បច្ចុប្បន្នសមត្ថកិច្ចបានប្រគល់សពជូនក្រុមគ្រួសារយកទៅធ្វើបុណ្យ តាមប្រពៃណី រីឯរថយន្ត និងម៉ូតូនៅកន្លែងកើតហេតុរង់ចាំរថយន្តស្ទូចយកមករក្សាទុកនៅប៉ុស្តិ៍ល្វា៕ ដោយ ៖ បញ្ញាស័ក្តិ