កំពង់ធំ៖ នាយកសាលាបឋមសិក្សាព្រៃតាហ៊ូ ដែលបង្ហោះខ្លឹមសារប្រមាថព្រះចេស្តាព្រះមហាក្សត្រ នៅលើបណ្តាញសង្គមហ្វេសប៊ុក ត្រូវបានលោកឃន សុកល ប្រធាននិងជាចៅក្រមស៊ើបសួរនៃសាលាដំបូងខេត្តកំពង់ធំ សម្រេចចេញដីកាបង្គាប់ឲ្យឃុំខ្លួនជាបណ្តោះអាសន្ន នៅល្ងាចថ្ងៃទី១៣ ខែឧសភា ឆ្នាំ២០១៨។
ក្នុងខ្លឹមសារនៃដីកា លោកឃន សុកល បានបញ្ជាក់ថា ការចេញដីកាឃុំខ្លួនជនត្រូវចោទរូបនេះ យោងតាមដីកាសន្និដ្ឋានបញ្ជូនរឿងឲ្យស៊ើបសួរលេខ ៩៤២ អក/២០១៨ ចុះថ្ងៃទី១៣ខែឧសភា ឆ្នាំ២០១៨ របស់តំណាងអយ្យការអមសាលាដំបូងខេត្តកំពង់ធំ និងបានឃើញសំណុំរឿងព្រហ្មទណ្ឌស៊ើបសួរទាក់ទងនឹងជនត្រូវចោទ ឃាង ណាវី អាយុ៥០ឆ្នាំ មានមុខងារជានាយកសាលាបឋមសិក្សាព្រៃតាហ៊ូ ក្នុងសង្កាត់ព្រៃតាហ៊ូ ក្រុងស្ទឹងសែន ត្រូវបានសមត្ថកិច្ចឃាត់ខ្លួន កាលពីថ្ងៃទី១២ ខែឧសភា ឆ្នាំ២០១៨ ដែលត្រូវបានដាក់ឲ្យស្ថិតនៅក្រោមការពិនិត្យពីបទ ប្រមាថចំពោះអង្គព្រះមហាក្សត្រ។
បើតាមដីកាបង្គាប់ឱ្យឃុំខ្លួនបណ្តោះអាសន្ន របស់ លោក ឃន កុសល ប្រធាន និងជាចៅក្រមស៊ើបសួរ នៃសាលាដំបូងខេត្តកំពង់ធំ បានឱ្យដឹងថា តុលាការបានសម្រេចចោទប្រកាន់ បុគ្គលរូបនេះពីបទ ប្រមាថចំពោះអង្គព្រះមហាក្សត្រ ដែលមានចែងឲ្យផ្តន្ទាទោសតាមមាត្រា ៤៣៧ (ស្ទួន) នៃច្បាប់ស្តីពីវិសោធនកម្មក្រមព្រហ្មទណ្ឌ។
លោកវរសេនីយ៍ត្រី ញ៉ែម ឈុនលី អធិការនគរបាលក្រុងស្ទឹងសែន បានប្រាប់ថា ជននេះបានប្រមាថព្រះមហាក្សត្រ នៅលើបណ្តាញសង្គមហ្វេសប៊ុក បានប្រើប្រាស់គណនីឈ្មោះ គ្រូប្រពន្ធសរ ដើម្បីបង្ហោះខ្លឹមសារល្មើសច្បាប់។
យោងតាម ក្រមព្រហ្មទណ្ឌ នៃព្រះរាជាណាចក្រកម្ពុជា ដែលទើបនឹងត្រូវបានវិសោធនកម្មថ្មីៗនេះ បានបន្ថែមមាត្រាកំណត់ទោសប្រមាថអង្គព្រះមហាក្សត្រ ត្រង់ជំពូកទី១ មាតិកាទី១ នៃគន្ថីទី៤ មាត្រាស្ទូន៤៣៧ថ្មី ដោយបានចែងថា «ការប្រមាថចំពោះអង្គព្រះមហាក្សត្រ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាទឹកប្រាក់ពី ២លានរៀល ទៅ១០លានរៀល។
ចំពោះនីតីបុគ្គលក៏អាចត្រូវបានផ្តនា្ទទោស ពិន័យជាប្រាក់ ១០លានរៀល ទៅ៥០លានរៀល ព្រមទាំងទោសបន្ថែមមួយ ឬច្រើន ក្នុងករណីដែលតុលាការរកឃើញថា មានពិរុទ្ធភាពពាក់ព័ន្ធនឹងការប្រមាថចំពោះអង្គព្រះមហាក្សត្រ។
ប្រធានតុលាការខេត្តកំពង់ធំ បានចេញសេចក្តីសម្រេច បញ្ជាឲ្យភ្នាក់ងារមានសមត្ថកិច្ចនៃកងកម្លាំងសាធារណៈធ្វើការនាំខ្លួនជនត្រូវចោទដែលមានឈ្មោះ ឃាង ណាវី ទៅពន្ធនាគារខេត្តកំពង់ធំ ដោយអនុវត្តន៍ឲ្យបានត្រឹមត្រូវតាមនីតិវិធីនៃច្បាប់ ។ បង្គាប់មកប្រធានពន្ធនាគារខេត្តកំពង់ធំ ឲ្យទទួលយកនិងឃុំខ្លួនជននេះ រហូតដល់មានបទបញ្ជាថ្មីសម្រេចផ្សេងពីនេះ។
នៅថ្ងៃទី១៣ខែឧសភានេះ យោងតាមបទបញ្ជារបស់ប្រធានតុលាការខេត្តកំពង់ធំនោះ ឧត្តមអគ្គានុរក្ស តាម វៃ ប្រធានពន្ធនាគារខេត្តកំពង់ធំ បានទទួលយកជនត្រូវចោទ មកឃុំខ្លួនក្នុងពន្ធនាគារខេត្តកំពង់ធំ តាមបទបញ្ជារួចរាល់ហើយ៕ ដោយ៖បញ្ញាស័ក្តិ
