រដ្ឋមន្ត្រីការបរទេសអាមេរិច Mike Pompeo បានថ្លែងកាលពីថ្ងៃអាទិត្យម្សិលមិញនេះថា អាមេរិចអាចនឹងអនុញ្ញាតឲ្យមានការបណ្តាក់ទុកលក្ខណៈឯកជននៅក្នុងប្រទេសកូរ៉េខាងជើង ក្នុងលក្ខ័ណប្រទេសនេះលុបបំបាត់អាវុធនុយក្លេអ៊ែរទាំងស្រុង។
ថ្លែងនៅក្នុងកិច្ចសម្ភាសន៍ជាមួយនឹង Fox News លោកបញ្ជាក់ថា អ្នកវិនិយោគទុកអាមេរិចអាចនឹងជួយកសាងប្រព័ន្ធថាមពលរបស់កូរ៉េខាងជើង។
ការថ្លែងដូច្នេះ កើតឡើងបន្ទាប់ពីលោក Mike Pompeo ទើបតែបានធ្វើដំណើរទៅកាន់ទីក្រុងព្យុងយ៉ាងកាលពីសប្តាហ៍មុន ដើម្បីរៀបចំជំនួបកំពូលរវាង លោក ដូណាល់ ត្រាំ និងលោក គីម ជុងអ៊ុន ដែលនឹងធ្វើឡើងនៅក្នុងខែមិថុនាខាងមុខ ក្នុងប្រទេសសិង្ហបុរី។
សហរដ្ឋអាមេរិចក៏បានប្រកាសផងដែរថា ខ្លួននឹងជួយស្តារសេដ្ឋកិច្ចរបស់ប្រទេសកូរ៉េខាងជើងឲ្យរីកចម្រើន បើរដ្ឋមួយនេះព្រមបំបាត់អាវុធប្រល័យលោករបស់ខ្លួនចោលទាំងស្រុង។
សូមបញ្ជាក់ថា ស្ថានភាពនៅឧបទ្វីបកូរ៉េ ហាក់មានភាពល្អប្រសើរឡើង ក្រោយពេលកូរ៉េខាងជើងបានប្តេជ្ញាចិត្តបោះបង់អាវុធប្រល័យលោករបស់ខ្លួនលោក និងបន្ទាប់ពីមានជំនួបកំពូលរវាងមេដឹកនាំកូរ៉េខាងត្បូង ម៉ូន ជេអ៊ីន និង គីម ជុងអ៊ុនកាលពីពេលថ្មីៗនេះ៕ សុភ័ក្ត្រ