ករណីជម្លោះជេរបញ្ចោគ្នាស្ទើរបែកផ្សែង ឬក៏អាចឈានដល់ការប្រើអំពើហិង្សាដាក់គ្នា រវាងអ្នកលក់ និងអ្នកទិញ យូរៗគេតែងប្រទះឃើញកើតឡើងគួរឲ្យហួសចិត្ត ដោយសារតែរឿងរ៉ាវជាពិសេសការ «តតម្លៃគ្នា» មិនត្រូវ ។
ជាក់ស្តែង ដូចក្នុងករណីថ្មីៗនេះអីចឹង អ្នកលក់ម្នាក់ដែលត្រូវបានគេដឹងថាជាអាជីវករលក់ដូរនៅតូបមួយក្នុងផ្សារបឹងកេងកង បានរងទទួលនូវការរិះគន់យ៉ាងចាស់ដៃតែម្តង បន្ទាប់ពីវីដេអូដ៏ខ្លីមួយបានបង្ហាញស្ត្រីអាជីវកររូបនោះ បានតាមរករឿងជាមួយអតិថិជនស្រីម្នាក់ ដែលបានសួរតម្លៃកាបូបរបស់នាង ប៉ុន្តែ បែរជាដើរចេញដោយពុំតថ្លៃ សូម្បីតែមួយម៉ាត់ ។
នៅក្នុងវីដេអូ ស្ត្រីជាអាជីវកររូបនោះ បាននិយាយទៅកាន់នារីអតិថិជនអត់តថ្លៃម្នាក់នោះយ៉ាងដូច្នេះថា៖ «អូនសួរកាបូបខ្ញុំហើយ អូនអត់ត យល់អ្ហេ…. អត់បានទេអូន ការដើរផ្សារសួរថ្លៃ គឺត្រូវតែត….» ។
ទោះយ៉ាងណា ជម្លោះរវាងអ្នកទាំងពីរពុំដឹងថាយ៉ាងមេចយ៉ាងម៉ានោះទេ ព្រោះវីដេអូឃ្លីបដ៏ខ្លីត្រូវបានបញ្ចប់ ខណៈស្ត្រីអាជីវករនោះបានស្ទុះចាប់ឆក់យកទូរស័ព្ទពីដៃនារីនោះ ដែលកំពុងព្យាយាមថតពីសកម្មភាពរបស់ខ្លួនបែបនេះ ។
ទាក់ទងនឹងករណីនេះផងដែរ ខ្ញុំក៏សូមចូលរួមបញ្ចេញមតិខ្លះៗ៖ ក្នុងនាមយើងជាអ្នកលក់ដូរ ឬជាអ្នកបម្រើសេវាដល់អតិថិជន គួរណាស់រៀបប្ញកពា ក៏ដូចជាឥរិយាបទឲ្យបានសមរម្យ និងជាពិសេរគួរណាប្រកាន់ខ្ជាប់នូវភាពអត់ធ្មត់ឲ្យបានច្រើន ចំពោះរឿងរ៉ាវដ៏តូចណសមួយដែលមិនគួរធ្វើឡើង ចំពោះនរណាម្នាក់ ជាពិសេសអតិថិជនរបស់ខ្លួន ដើម្បីរក្សាតម្លៃសេចក្តីថ្លៃថ្នូររកស៊ីទៅថ្ងៃខាងមុខទៀតប្រកបដោយភាពល្អប្រសើរ ៕ ចន្ទី