ក្នុងសម័យកាលប្រើប្រាស់សម្ភារៈនិយមដ៏ទំនើបៗនេះ គេតែងសង្កេតឃើញក្មេងស្រីវ័យជំទង់ៗមួយចំនួន បានកំពុងដើរនូវផ្លូវដ៏ខុសឆ្គងជាច្រើន ដែលប្រាសចាកពីសីល៌ធម៌អប់រំសាលារៀន ក៏ដូចជានៅក្នុងសង្គមគ្រួសាររបស់ពួកគេតែម្តង ដែលក្នុងនោះដូចជាការដើរហើរគេចសាលារៀន, ធ្វើខ្លួនជាស្ទាវដ៏អស្ចារ្យតាមបក្ខពួកនិយម ទៅប្រព្រឹត្តនូវអំពើពាលាអាវ៉ាសែផ្សេងៗដែលសង្គមស្អប់ខ្ពើម ។
ជាការពិតណាស់ ជាមួយនឹងការប្រើប្រាស់សម្ភារៈទំនើបៗ ក្នុងនោះក្មេងស្រីជំទង់ៗដែលជាអ្នកមានមួយចំនួន ត្រូវបានគេប្រទះឃើញជិះម៉ូតូនៅលើដងផ្លូវសាធារណៈយ៉ាងសាហាវៗ ដោយសូម្បីតែពុំពាក់មួកសុវត្ថិភាព ដើម្បីការពារអាយុជីវិតពីគ្រោះថ្នាក់កើតឡើងជាយថាហេតុណាមួយនោះឡើយ ។
ជាក់ស្តែងថ្មីៗនេះ យុវជន២នាក់បានចែករំលែកនូវវីដេអូដ៏រន្ធត់មួយ បង្ហាញឲ្យឃើញក្មេងស្រីជំទង់២នាក់ ជិះម៉ូតូហ្សូមមឺ Zoomer វ៉ាគេវ៉ាឯងយ៉ាងលឿន ដែលធ្វើឲ្យអ្នកទស្សនាឃើញហើយស្រៀវសាច់ជំនួសបំផុតតែម្តង ។ ប៉ុន្តែ នៅទីបំផុត ក្មេងស្រីទាំងពីរនេះដែលគេពុំដឹងថាអាចស្ថិតក្រោមឥទ្ធិពលនៃសារជាតិស្រវឹង ឬក៏គ្រឿងញៀន បានជិះទៅបុកខឿនចិញ្ចើមផ្លូវដួលប្រកាច់ប្រកិនយ៉ាងសាហាវ ៕ ចន្ទី