ទាហ៊ានអ៊ីស្រាអ៊ែលបានសម្លាប់ជនជាតិប៉ាឡេស្ទីនយ៉ាងតិចចំនួន ៥៨នាក់ នៅក្នុងការប៉ះទង្គិចបង្ហូរឈាមនៅតំបន់ព្រំដែនហ្គាសា (Gaza) កាលពីថ្ងៃច័ន្ទម្សិលមិញនេះ ក្រោយពេលសហរដ្ឋអាមេរិចបានបើកស្ថានទូតថ្មីរបស់ខ្លួននៅទីក្រុងទីក្រុងជេរ៉ូសាឡឹម ចំងាយប្រមាណ ៨០គីឡូម៉ែត្រពីតំបន់ព្រំដែន។ នេះបើតាមការចេញផ្សាយរបស់ CNN នៅថ្ងៃអង្គារនេះ។
បើតាមក្រសួងសុខាភិបាលប៉ាឡេស្ទីន ក៏មានប្រជាជនប៉ាឡេស្ទីនជាង ២.៧០០នាក់ផងដែររងរបួស។អំពើហឹង្សាបានផ្ទុះឡើង ដើម្បីធ្វើការតវ៉ាប្រឆាំងនឹងការផ្លាស់ប្តូរស្ថានទូតរបស់សហរដ្ឋអាមេរិចពីទីក្រុង Tel Aviv ទៅកាន់ទីក្រុងជេរ៉ូសាឡឹម (Jerusalem)។ ការផ្លាស់ប្តូរស្ថានទូតរបស់អាមេរិចនេះត្រូវបានសារទរដោយភាគីអ៊ីស្រាអ៊ែល ប៉ុន្តែមានការប្រឆាំងពីសំណាក់ប៉ាឡេស្ទីន។
ជនរងគ្រោះដែលស្លាប់ភាគច្រើន គឺស្លាប់ដោយសារគ្រាប់កាំភ្លើងរបស់កងកំលាំងអ៊ីស្រាអ៊ែលនៅក្បែរតំបន់ព្រំដែន។
មន្ត្រីប៉ាឡេស្ទីនបានចោទប្រកាន់ប្រទេសអ៊ីស្រាអ៊ែលថា បានប្រព្រឹត្តការសម្លាប់រង្គាល និងបានស្នើឲ្យសហ គមន៍អន្តរជាតិឲ្យមានការអន្តរាគមន៍ជាបន្ទាន់។
ទោះយ៉ាងណា ប្រទេសអ៊ីស្រាអ៊ែលបានចេញសេចក្តីប្រកាស ដោយកងកំលាំងការពារជាតិរបស់អ៊ីស្រាអ៊ែលបានចោទប្រកាន់ក្រុមសកម្មប្រយុទ្ធអ៊ីស្រាលអ៊ែលឈ្មោះក្រុម Hamas ដែលជាអ្នកគ្រប់គ្រងតំបន់ហ្គាសា ថាបានដឹកនាំប្រតិបត្តិការភវរកម្ម និងបានញុះញង់ឲ្យមនុស្សប្រហែល ៣៥.០០០នាក់ធ្វើការតវ៉ា ដែលសកម្មភាពរបស់ពួកគេត្រូវបានអ៊ីស្រាអ៊ែលហៅថា ជាការវាយប្រហារភវរកម្ម។
សូមបញ្ជាក់ថា ប៉ាឡេស្ទីន និងអ៊ីស្រាអ៊ែលកំពុងមានជំលោះជាមួយគ្នាយ៉ាងខ្លាំងជុំវិញការទទួលស្គាល់ទីក្រុងជេរ៉ូសាឡឹមជារដ្ឋធានីរបស់ប្រទេសអ៊ីស្រាអ៊ែល ដែលប៉ាឡេស្ទីនក៏ចង់បានតំបន់ដ៏ពិសិដ្ឋនេះដែរធ្វើជារដ្ឋនាពេលអនាគត៕ សុភ័ក្ត្រ