ក្រសួងឯកភាពកូរ៉េខាងត្បូង ដែលដកស្រង់សេចក្តីប្រកាសថ្ងៃទី ១៥ ខែឧសភា របស់កូរ៉េខាងជើងឲ្យដឹងថា ៖ “បណ្តាអ្នកសារព័ត៌មានត្រូវបានអញ្ជើញ និងទទួលបានទិដ្ឋាការពីស្ថានទូតកូរ៉េខាងជើង នៅប្រទេសចិន រួចធ្វើដំណើរពីប៉េកាំងនៅថ្ងៃទី ២២ ខែឧសភា ទៅ កាន់អាកាសយានដ្ឋាន Kalma នៅ Wonsan រួមជាមួយបណ្តាអ្នកសារព័ត៌មានបរទេសដទៃទៀត ។
ច្រកចូលល្អាងភ្នំសាកល្បងនុយក្លេអ៊ែរមួយនៅ Punggye-ri ។
ពី Wonsan ទីក្រុងភាគខាងកើតកូរ៉េខាងជើង បណ្តាអ្នកសារព័ត៌មាននឹងធ្វើដំណើរទៅកាន់ទីលានសាកល្បងនុយក្លេអ៊ែរ Punggye-ri ដោយនារវា រួចវិលត្រឡប់មកវិញនៅថ្ងៃទី ២៦ ឬ ២៧ ខែឧសភា តាមជើងហោះហើរមួយផ្សេង។ Punggye-ri គឺជាកន្លែងដែលកូរ៉េខាងជើងបានដំណើរការសាកល្បងនុយក្លេអ៊ែរ ៦លើក មកហើយ។
នៅថ្ងៃទី ១៣ ខែឧសភា Rodong Sinmun កាសែតផ្លូវការរបស់បក្សពលករកូរ៉េបានចុះផ្សាយសេចក្តីថ្លែងការណ៍របស់ក្រសួងការបរទេសប្រទេសនេះថា បំផ្លាញចោលមូលដ្ឋានសាកល្បងនុយក្លេអ៊ែរ Punggye-ri ពីថ្ងៃទី ២៣-២៥ ខែឧសភា ។ សេចក្តីប្រកាសនេះក៏ត្រូវបានស្ថានីយ៍វិទ្យុកូរ៉េខាងជើងប្រកាសផ្សាយដល់ទៅ ៣លើក ។
មុននោះ ទីភ្នាក់ងារសារព័ត៌មាន KCNA របស់កូរ៉េខាងជើង ឲ្យដឹងថា ព្យុងយ៉ាងនឹងបំបិទមាត់ច្រកទាំងអស់នៃទីលានសាកល្បងដោយប្រើរំសេវផ្ទុះ ហើយរុះរើចោលស្ថានីយ៍ឃ្លាំមើលមូលដ្ឋានស្រាវជ្រាវ និងប្រព័ន្ធសន្តិសុខក្នុងតំបន់ Punggye-ri ចំពោះមុខការពិនិត្យមើលរបស់អ្នកកាសែតបរទេស រួមមានកូរ៉េខាងត្បូង និងទាំងអាមេរិកផងដែរ ៕ សូយន
