កណ្តាល៖ បុរសម្នាក់ បានស្លាប់គួរឲ្យអនិច្ចា ដោយសារឆក់ចរន្ដអគ្គិសនី ដែលគេរាយខ្សែឆក់កណ្ដុរ។ ករណីដ៏រន្ធត់នេះ កើតហេតុថ្ងៃទី១៥ខែឧសភាឆ្នាំ២០១៨ វេលាម៉ោង១រំលងអធ្រាត្រ នៅចំណុចភូមិព្រែកតាសៅ ឃុំស្វាយប្រទាល ស្រុកស្អាងខេត្តកណ្តាល។
សេនាធិការ នគរបាលស្រុកស្អាង បានឲ្យដឹងថា ជនរងគ្រោះឈ្មោះ ម៉ៅ ចាន់ណារ៉ា ភេទប្រុស អាយុ ២៨ ឆ្នាំ មុខរបរកម្មករ មានទីលំនៅភូមិព្រែកតាតិន ឃុំស្វាយប្រទាល ស្រុកស្អាង ខេត្តកណ្តាល ។ វត្ថុតាងចាប់យក រួមមាន ១.អាគុយម៉ាកJP កម្លាំង៧០អំពែចំនួន ១គ្រឿង អាំងវែកទរ័ចំនួន១គ្រឿង ដង្គៀបចាប់អាគុយចំនួន២ (ក្រហមខ្មៅ) និងខ្សែលួសប្រវែង ៣២៧ ម៉ែត្រ។
ប្រភពដដែល បានបន្តថា នៅយប់ថ្ងៃទី១៤ខែឧសភាឆ្នាំ២០១៨ វេលាម៉ោង ១៩.៣០នាទី ជនរងគ្រោះបាននាំគ្នាទៅផឹកស្រា នៅចំណុចខ្នងព្រែកចំក្បាលដីរបស់ឈ្មោះប៉ិច ដាវុធ ចុងព្រែកទាហ៊ានសៅ ដែលម្ចាស់ចំការបានរាយខ្សែភ្លើងឆក់កណ្តុរ កុំឲ្យចូលស៊ីដំណាំសណ្តែកគួរ ដោយមានគ្នា ៥នាក់ ក្នុងនោះមានឈ្មោះសុង ហា ភេទ ប្រុស អាយុ២៩ឆ្នាំ ឈ្មោះរស់ ធារៈ ភេទប្រុស អាយុ ២២ឆ្នាំ ឈ្មោះឡូត សុភ័ណ្ឌ ភេទប្រុស អាយុ ៣៨ ឆ្នាំ និងឈ្មោះប៉ិច ដាវុធ ភេទប្រុស អាយុ ២៨ ឆ្នាំ(ជាម្ចាស់ចំការ)។ អ្នកទាំង៥ មានទីលំនៅភូមិឃុំជាមួយគ្នា។
លុះដល់ម៉ោង ១រំលងអធ្រាត្រ ឈានចូលថ្ងៃទី ១៥ខែឧសភាឆ្នាំ២០១៨ ជនរងគ្រោះបានដើរទៅក្នុងរោងចាំចំការ ក៏បានទាក់នឹងខ្សែភ្លើង ដែលមានចរន្ដអគ្គិសនី ឆក់ចំទ្រូងឆ្វេង ដួលផ្កាប់មុខទៅលើដី បណ្ដាលឲ្យស្លាប់ភ្លាមៗតែម្តង ។
បន្ទាប់ពីហេតុការណ៍នេះកើតឡើងភ្លាមកម្លាំងជំនាញបច្ចេកទេសខេត្ត ផ្នែកពិនិត្យហេតុស្រុក ពេទ្យឃុំ កម្លាំងប៉ុស្តិ៍ ក្រុមប្រឹក្សាឃុំនិង មេភូមិ បានធ្វើការពិនិត្យសព ឃើញមានស្លាកស្នាមដូចដូចខាងក្រោម ស្នាមរោលខ្មៅក្រៀមចំណុចឆ្អឹងដងកាំបិតពាត់ពីលើស្មាដល់ចំណុចឆ្អឹងស្លាបប្រជៀវខាងឆ្វេងប្រវែង៣០សង់ទីម៉ែត្រ ។
ស្នាមដាច់មុតចុងចិញ្ចើមខាងស្ដាំប្រវែង ២,៥សង់ទីម៉ែត្រគុណនឹង០,៥សង់ទីម៉ែត្រ។ ស្នាមខ្មៅក្រៀមលើស្មាខាងឆ្វេងប្រវែង០,៣សង់ទីម៉ែត្រ តូចឆ្មារ ។ ក្រៅពីនេះពុំមានស្នាកស្នាមអ្វីទៀតទេ ។
នគរបាលមូលដ្ឋានបានសន្និដ្ឋានថា ជនរងគ្រោះស្លាប់ដោយសាឆក់ចរន្តអគ្គិសនី ប្រាកដមែន៕ ដោយ៖បញ្ញាស័ក្តិ