កោះកុង៖ អធិការដ្ឋាននគរបាលក្រុងខេមរភូមិន្ទ បានឲ្យដឹងថា កម្លាំងអធិការដ្ឋាននគរបាលក្រុងខេមរភូមិន្ទ សហការជាមួយកម្លាំងអធិការដ្ឋាននគរបាលស្រុកមណ្ឌលសីម៉ា ដឹកនាំ ដោយលោកវរសេនីយ៍ត្រី ត្រី ហេង លាង អធិការនគរបាលក្រុងខេមរភូមិន្ទ ចុះចាប់មុខសញ្ញាឃាតកម្ម ដោយឃាត់ជនសង្ស័យម្នាក់ នៅវេលាម៉ោង១៣:៣០ ថ្ងៃទី១៥ ខែឧសភា ឆ្នាំ២០១៨នៅ ចំណុចកូនព្រែក ស្ថិតក្នុងភូមិតាចាត ឃុំទួលគគី ស្រុកមណ្ឌលសីម៉ា ។
ក្នុងដំណាល់កាលនេះ អធិការដ្ឋាននគរបាលក្រុងខេមរភូមិន្ទ មិនទាន់បង្ហាញអត្តសញ្ញាណជនសង្ស័យ និងមូលហេតុពិត នៃអំពើឃាតកម្មនេះនៅឡើយទេ។
សូមបញ្ជាក់ថា ក្មេងប្រុសអាយុ១២ឆ្នាំម្នាក់ បានស្លាប់ ខណៈពេលបញ្ជូនទៅសង្គ្រោះនៅឯមន្ទីរពេទ្យ បន្ទាប់ពីនាំគ្នាដើរទៅទិញនំក្បែរផ្ទះ ជាមួយមិត្តភ័ក្ដ២-៣ទៀត តែត្រូវបានជនមិនស្គាល់មុខ លួចចាក់សម្លាប់ចំក្រោមដោះខាងឆ្វេង ដែលបង្កការភ្ញាក់ផ្អើលទាំងយប់។ ករណីឃាតកម្មទាំងយប់នេះ បង្កការភ្ញាក់ផ្អើលយ៉ាងខ្លាំងនៅវេលាម៉ោង៧និង២០នាទីយប់ ថ្ងៃសៅរ៍ ទី១២ ខែឧសភា ឆ្នាំ២០១៨នេះ ត្រង់ចំណុចភូមិ៤ ស្ថិតក្នុងសង្កាត់ដងទង់ ក្រុងខេមរភូមិន្ទ ខេត្តកោះកុង។ ជនរងគ្រោះមានឈ្មោះ ចាន់ ហាក់ ភេទប្រុស អាយុ១២ឆ្នាំ មានទីលំនៅភូមិ២ សង្កាត់ដងទង់ ក្រុងខេមរភូមិន្ទ បានស្លាប់នៅពេលបញ្ជូនទៅសង្គ្រោះនៅមន្ទីរពេទ្យបង្អែកខេត្តកោះកុង។
សមត្ថកិច្ចឲ្យប៉ូលីស ក្រុងខេមរភូមិន្ទបានអោយដឹងថា ដំបូងឡើយ ក្មេងរងគ្រោះ និងមិត្តភ័ក្ដ២-៣នាក់ទៀត បាននាំគ្នាដើរទៅទិញនំនៅក្បែរផ្ទះមុខសញ្ញា (ជនដៃដល់) ហើយក៏ត្រូវជនមិនស្គាល់ មុខចេញមកចាក់បណ្ដាលឲ្យរងរបួសតែម្តង។ ភ្លាមៗនោះ ជនរងគ្រោះក៏ត្រូវបានគេជួយសង្គ្រោះដោយដឹកបញ្ជូនទៅកាន់មន្ទីរពេទ្យភ្លាមដែរ ប៉ុន្តែអកុសល្យដោយរបួសត្រង់ចំណុចសំខាន់ធ្វើឲ្យក្មេងរងគ្រោះស្លាប់ពេលបញ្ជូនដល់មន្ទីរពេទ្យ៕ ដោយ៖បញ្ញាស័ក្តិ