នៅថ្ងៃទី ១៥/៥ ម្សិលមិញនេះ កងកម្លាំងសន្តិសុខប្រឆាំងភេរវកម្ម នៅខេត្តស៊ូម៉ាត្រា ខាងជើង របស់ឥណ្ឌូណេស៊ី បានកម្ទេចខ្មាន់កាំភ្លើងពីររូប ក្នុងឆាកប្រយុទ្ធមួយនៅទីនោះ ។
ប៉ូលិសឥណ្ឌូណេស៊ីកំពុងបើកយុទ្ធនាការបោសសម្អាតពួកឧក្រិដ្ឋជន បន្ទុះគ្រាប់បែកនៅ Surabaya កាលពីថ្ងៃទី ១៤ ខែឧសភា។
ប្រព័ន្ធព័ត៌មាននៅតំបន់ឲ្យដឹងថា ហេតុការណ៍នេះកើតឡើងខណៈពេលដែលអង្គភាពប៉ូលិសប្រឆាំងភេរវកម្មធ្វើការឡោមព័ទ្ធដើម្បីចាប់មុខសញ្ញាទាំងនោះនៅមន្ទីរពេទ្យពហុព្យាបាល Tengku Mansyur នាកខេត្តស៊ូម៉ាត្រា ខាងជើង ។
ប្រភពពីស៊ីនហួរ ឲ្យដឹងថា តាមព័ត៌មានប្រមូលបានពីអ្នកកាសែតនៅតំបន់នោះឲ្យដឹងថា កងកម្លាំងប្រឆាំងភេរវកម្មថ្ងៃទី ១៥ ខែ ឧសភានេះដែរ បានរកឃើញគ្រាប់បែកមួយគ្រាប់នាមជ្ឈមណ្ឌលពាណិជ្ជកម្មនាតំបន់ Bandar Lampung នាខេត្ត Lampong ។
គ្រាប់បែកត្រូវបានរកឃើញនៅមជ្ឈមណ្ឌលពាណិជ្ជកម្ម Transmart លើវិថី Arif Rahman Hakim ។ គ្រាប់បែកនេះត្រូវបានក្រុមប្រឆាំងភេរវកម្មធ្វើការបំផ្លាញចោលនៅខាងក្រៅមជ្ឈមណ្ឌល ពាណិជ្ជកម្មនេះតែម្តង។
គួររំលឹកថា រឿងរ៉ាវកើតឡើងថ្មីៗនេះ ខណៈពេលប្រទេសនេះនៅរងការភ័យខ្លាចការបន្ទុះគ្រាប់បែកជាបន្តបន្ទាប់នាទីក្រុង Surabaya ដែលសំដៅទៅលើព្រះវិហារគ្រិស្តចំនួន ៣ បណ្តាលឲ្យមនុស្ស ១៨នាក់ស្លាប់ និងរាប់សិបនាក់ទៀតរងរបួស ហើយជនដៃដល់គឺជាគ្រួសារមួយមានគ្នា ៦នាក់ គឺ ៖ ឪពុកម្តាយ និងកូន៤នាក់ ដែលមានអាយុពី ៨ឆ្នាំដល់ ១៨ឆ្នាំ ៕ សូយន