បន្ទាយមានជ័យ ៖ បុរសពីរនាក់ បានយកក្បាលគ្រាប់ ប្រភេទ៦០ មិល្លីម៉ែត្រទៅវាយដំដោះប្រលូញកន្លឹះរ៉ឺម៉កគោយន្តចេញពីគោយយន្តដើម្បីយកទៅភ្ជួរស្រែ បណ្តាលឲ្យផ្ទុះកក្រើកដី ស្លាប់ម្នាក់នៅកន្លែងកើតហេតុ ចំណែកម្នាក់ទៀតទទួលរងរបួសធ្ងន់។
ហេតុការណ៍កើតឡើងកាលពី ថ្ងៃទី១៥ ខែឧសភា ឆ្នាំ២០១៨ នៅចំណុចភូមិខ្វាវ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ។
នគរបាលប៉ុស្តិ៍រដ្ឋបាលឃុំបុស្បូវ ប្រាប់ឱ្យដឹងថា ជនរងគ្រោះដែលស្លាប់មានឈ្មោះ ឈឿន សាម៉ន អាយុ៣២ឆ្នាំ ជាម្ចាស់គោយន្ត ដោយឡែក អ្នករងរបួសមានឈ្មោះ វ៉ាត សាមេត អាយុ៤៧ឆ្នាំ ជាអ្នកជិតខាង រស់នៅភូមិកើតហេតុ។ មុនពេលកើតហេតុគេឃើញជនរងគ្រោះ ម្ចាស់គោយន្តបានដោះរ៉ឺម៉កគោយន្តចេញពីក្បាលគោយន្ត ដើម្បីទៅភ្ជួរស្រែ នៅពេលនោះមានអ្នកជិតខាងម្នាក់បានទៅឈរមើល។ ប៉ុន្តែនៅពេលដោះប្រលូញកន្លឹះរ៉ឺម៉កវាមិនចេញ ទើបជនរងគ្រោះក៏យកម៉ូទ័រឆាបផ្តាច់ប្រលូញកន្លឹះរ៉ឺម៉កគោយន្ត បន្ទាប់មកជនរងគ្រោះក៏យកក្បាលគ្រាប់៦០មីល្លីម៉ែត្រ មិនដឹងជនរងគ្រោះរើសយកពីតំបន់ណានោះទេ ហើយយកមកដំវាយដើម្បីយកប្រលូញកន្លឹះគោយន្តនោះចេញ ខណៈនោះក៏ស្រាប់តែផ្ទុះគ្រាប់នោះតែម្តង បណ្តាលឱ្យម្ចាស់គោយន្តស្លាប់ចំណែកអ្នកជិតខាងទៅឈរមើលទទួលរងរបួសធ្ងន់៕