កំពង់ស្ពឺ ៖ រឿងរ៉ាវមិនគួរជឿ ក្នុងពិធីចូលរោង ថ្លៃមង្គលការក្មួយ បងប្អូនបង្កើតឈ្លោះគ្នា បង្កជាហឹង្សា ដោយប្អូនប្រុស ដាល់បងប្រុសមួយដៃ បណ្តាលឱ្យស្លាប់នៅហ្នឹងកន្លែង នៅស្រុកសំរោងទង។
បើតាមរបាយការណ៍របស់ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា ថ្ងៃអង្គារ ទី១៥ខែឧសភា ឆ្នាំ២០១៨ ម៉ោង១៦.៣០ នាទី បុរសម្នាក់ស្លាប់ភ្លាមៗ ដោយជម្លោះរវាងបងប្អូនបង្កើត ស្ថិតនៅភូមិអន្លង់ពពាយ ឃុំក្រាំងអំពិល ស្រុកសំរោងទង ក្នុងកម្មវិធីមង្គលការមួយកន្លែង នៅផ្ទះឈ្មោះ លឹម មុំ ភេទស្រី អាយុ 48ឆ្នាំ ហើយឈ្មោះ លឹម ពឺន ភេទប្រុស អាយុ 46ឆ្នាំ នឹងឈ្មោះ លឹម ពៅ ភេទប្រុស អាយុ35ឆ្នាំ ត្រូវជាប្អូនម្ចាស់ដើមការ បានទាស់ពាក្យសម្ដីគ្នា ហើយត្រូវបានឈ្មោះ លឹម ពៅ វាយទៅលើឈ្មោះលឹម ពឺន ដោយដាល់មួយដៃចំផ្ទៃមុខដួលផ្ងាក្រោយបោកក្បាលទៅលើរទេះគោរយន្ត ទុកក្បែរនោះ បណ្ដាលឲ្យ ឈ្មោះ លឹម ពឺន ស្លាប់ភ្លាមនៅកន្លែងកើតហេតុ ។
ចំណែកជនបង្ក ត្រូវបាននគរបាល ឃាត់ខ្លួនបញ្ជូនមកកាន់អធិការដ្ឋាននគរបាលស្រុក កសាងសំណុំរឿងចាត់ការតាមនីតិវិធី៕ ដោយ៖បញ្ញាស័ក្តិ
