មនុស្សយ៉ាងហោចណាស់ចំនួន ១៨នាក់បានស្លាប់ និងជាច្រើននាក់ទៀតកំពុងជាប់ខ្លួន បន្ទាប់ពីស្ពានអាកាសបានបាក់ នៅទីក្រុង Varanasi ប្រទេសឥណ្ឌា។ នេះបើតាមការចេញផ្សាយរបស់ BBC នៅព្រឹកថ្ងៃពុធ ទី ១៦ ខែឧសភានេះ។
ស្ពានអាកាសនោះកំពុងស្ថិតក្រោមការសាងសង់នៅឡើយ តែស្រាប់តែមានបំណែកស្ពានដ៏ធំបានបាក់ធ្លាក់មកក្រោម បណ្តាលឲ្យ សង្កត់រថយន្តដែលកំពុងធ្វើដំណើរនៅខាងក្រោមជាច្រើនគ្រឿង។
ក្រុមជួយសង្គ្រោះកំពុងបន្តប្រតិបត្តិការជួយអ្នកដែលនៅជាប់នៅខាងក្រោម ប៉ុន្តែស្ថានភាពអ្នកដែលជាប់ទាំងនោះ មិនត្រូវបានគេដឹងនៅឡើយទេ។
បើតាមប្រព័ន្ធផ្សព្វផ្សាយឥណ្ឌា NDTV បានរាយការណ៍ថា មនុស្សភាគច្រើនដែលជាប់នៅខាងក្រោមបំណែកស្ពានគឺជាកម្មករដែលធ្វើការសាងសងស្ពាននោះ។
មូលហេតុនៃការបាក់ស្ពានដ៏រន្ធត់នេះមិនទាន់ត្រូវបានគេដឹងនៅឡើយនោះទេ ហើយអាជ្ញាធរឥណ្ឌាបញ្ជាឲ្យមានការស៊ើបអង្កេត៕ សុភ័ក្ត្រ