ស្ត្រីសញ្ជាតិចិនម្នាក់ គិតថាខ្លួនទិញបានពូជឆ្កែទីបេ មកចិញ្ចឹម ប៉ុន្តែពីមួយថ្ងៃទៅមួយថ្ងៃវាធំធាត់យ៉ាងលឿន រហូតដល់ពេលវាមានទម្ងន់ជាង ១០០គីឡូ ទើបដឹងថា វាពុំមែនជាឆ្កែឡើយ ។
តាម RT អ្នកស្រី Su Yun រស់នៅខេត្ត វូណាន ប្រទេសចិន បានទិញកូនឆ្កែតូចមួយ នៅផ្សារណាត់តំបន់ភ្នំកាលពីឆ្នាំ ២០១៦ ហើយដាក់ឈ្មោះវាថា ស៊ាវ ហេង អ្នកស្រី Su និយាយថា ពេលខ្ញុំយកវាមកផ្ទះវាពិតជាដូចកូនឆ្កែពូជទីបេបេះបិទ ប៉ុន្តែចិញ្ចឹមវាយូរៗទៅវាបែរជាស្រដៀងនឹងខ្លាឃ្មុំទៅវិញ ប្រការនេះធ្វើឲ្យខ្ញុំពិតជាមានអារម្មណ៍ភ័យខ្លាច ។
ងាកទៅកាន់អតីតកាលអ្នកស្រី Su Yun ឲ្យដឹងបន្ថែមថា ខ្ញុំបានចិញ្ចឹមបីបាច់វាយ៉ាងម៉ត់ចត់ ហើយពីមួយថ្ងៃទៅមួយថ្ងៃវាមានលក្ខណៈពុំដូចឆ្កែសោះ ។ វាពិតជាមានការរំញោចខ្លាំងណាស់ ប្រសិនបើម្ចាស់មិននៅ ម្យ៉ាងទៀតវាច្រើនតែធ្វើឲ្យខ្លួនវារងរបួស។ ក្នុងមួយថ្ងៃៗ វាស៊ីអស់ផ្លែឈើប្រហែល ១ធុង ហើយមី ២ឆ្នាំង ។
ថ្មីៗនេះអ្នកស្រី Yun បានឃើញខិត្តប័ណ្ណពីការចិញ្ចឹមសត្វព្រៃដោយគ្មានការអនុញ្ញាតជាទង្វើល្មើសច្បាប់ ហេតុនេះអ្នកស្រីក៏ទាក់ទងជាមួយមជ្ឈមណ្ឌលសង្គ្រោះសត្វព្រៃ ស៊ាវ ហេង ត្រូវបានបញ្ជូនទៅកាន់ “ផ្ទះថ្មី” បណ្តាវេជ្ជបណ្ឌិតពិនិត្យឃើញថា វាមានសុខភាពមាំមួនល្អ ហើយពុំមានរងការធ្វើបាប ។ រដ្ឋការខេត្តវូណាន សម្រេចមិនដាក់ពិន័យអ្នកស្រី Su Yun ព្រោះតែពុំបានដឹងថាវាជាកូនខ្លាឃ្មុំ ហើយគាត់បានចិញ្ចឹមបីបាច់វាយ៉ាងល្អ។
ឆ្កែពូជទីបេ មានរាងរៅខុសប្លែកពីខ្លាឃ្មុំ ។
គួររំលឹកថាខ្លាឃ្មុំសេះជាអម្បូរសត្វប្រឈមនឹងការផុតពូជនៅប្រទេសចិន ព្រោះតែការលួចប្រមាញ់ និងបរិស្ថានរស់នៅមានការប្រែប្រួល ៕ ចន្ទ្រា
