បុរសអាស៊ី៣នាក់ អាចប្រឈមជាប់ពន្ធនាគារ ៩ ឆ្នាំ ក្នុងករណីចោទប្រកាន់លួចដករុក្ខជាតិ succulent (ដែលគេហៅថាប្រទាលលុយ) នៅក្នុងរដ្ឋកាលីហ្វ័រញ៉ា ហើយដឹកយកទៅលក់នៅបណ្តាប្រទេសក្នុងអាស៊ី ។
បុរស២នាក់ឈ្មោះថា Tae Hun Kim អាយុ ៥២ ឆ្នាំ និងឈ្មោះ Tae Hyun Kim អាយុ ៤៦ ឆ្នាំ មកពីប្រទេសកូរ៉េខាងជើង និងម្នាក់ទៀតឈ្មោះ Liu Fengxia អាយុ ៣៧ ឆ្នាំ មកពីប្រទេសចិន ។
ព័ត៌មាននេះបានលេចចេញ បន្ទាប់ពីមន្ត្រីប៉ូលីសម្នាក់បានជូនដំណឹងទៅពួកមន្ត្រីសត្វព្រៃ ទាក់ទងនឹងប្រអប់កេសរាប់សិប ដែលកំពុងត្រូវបានគេដឹកចេញទៅកាន់ប្រទេសចិន ពីការិយាល័យប្រៃណីយ៍ នៅរដ្ឋកាលីហ្វ័រញ៉ាភាគខាងជើង ។
អាជ្ញាធរបានឆ្លើយតបចំពោះករណីនេះ ហើយបានដឹងថា បុរសទាំងនេះកំពុងដករំលើងរុក្ខជាតិ succulent យ៉ាងច្រើន នៅតាមបណ្តោយឆ្នេរសមុទ្រ Dudleya ។ ដែលរុក្ខជាតិនេះមានដើមកំណើតលូតលាស់នៅក្នុងទឹកដីកាលីហ្វ័រញ៉ា និងត្រូវបានប្រើប្រាស់ជាគ្រឿងតុបតែងលម្អក្នុងផ្ទះផងដែរ ។
លោក Patrick Foy ប្រធានក្រុមនាយកដ្ឋានជលផល និងសត្វព្រៃ បានឲ្យដឹងថា បុរសទាំងនេះបានចូលសហរដ្ឋអាមេរិក ក្នុងនាមជាភ្ញៀវទេសចរ គ្រាន់តែដើម្បីលួចដឹករុក្ខជាតិនេះវិលត្រឡប់ទៅស្រុកកំណើតរបស់ពួកគេ និងចែកចាយនៅក្នុងកូរ៉េ, ចិន និងជប៉ុន ប៉ុណ្ណោះ ។
លោក Foy បានប្រាប់ AFP ថា «បុរសទាំងនេះ កំពុងគាស់រំលើងរុក្ខជាតិដ៏ផូផង់នេះពីក្នុងទឹកដីកាលីហ្វ័រញ៉ា ដើម្បីយកទៅលក់ក្នុងតម្លៃចន្លោះពី ៤០ ដុល្លារ ទៅ ៥០ ដុល្លារ ក្នុង១ដុំ» ។
លោកបន្ថែមថា «ជនសង្ស័យទាំងនេះបានចូលអាមេរិកនៅពេលយប់ ឬ អំឡុងពេលថ្ងៃ… ហើយហាក់ពេញចិត្តទៅនឹងទីកន្លែងជាច្រើនដែល ពុំល្អក្នុងការធ្វើទេសចរ ។ ទីកន្លែងទាំងនោះពួកគេអាចចតរថយន្ត និងចុះដើរប្រហែលកន្លះម៉ៃល៍ និងពុំត្រូវបានមនុស្សជាច្រើនឃើញនោះទេ ។ ហេតុនេះ មនុស្សទាំងនេះបានកំពុងដករុក្ខជាតិដែលពួកគេអាចស្វែងរកបាន ហើយពួកគេនឹងដាក់ពួកវាចូលប្រអប់កេសរាប់រយនៅពេលនោះ» ។
សូមបញ្ជាក់ថា នេះមិនមែនជាលើកទី១ទេ ដែលពួកអ្នករត់ស្រដៀងគ្នានេះ ត្រូវបានចាប់ខ្លួននៅរដ្ឋកាលីហ្វ័រញ៉ា ។ នៅក្នុងខែមីនា បុរស២នាក់ត្រូវបានខ្លួនជាមួយរុក្ខជាតិ succulents ដាក់ក្នុងរថយន្ត ហើយកាលពីខែមុន មនុស្ស៣នាក់ផ្សេងទៀតក៏ត្រូវបានខ្លួនផងដែរ ៕ ចន្ទី