តាម Yonhap ដកស្រង់ព័ត៌មានមិនបញ្ចេញឈ្មោះឲ្យដឹងនៅថ្ងៃនេះថា “យន្តហោះប្រយុទ្ធ F-22 បានអនុវត្តវិញ្ញាសមយុទ្ធមួយចំនួន ខណៈពេលដែលយន្តហោះទម្លាក់គ្រាប់ B-52 នៅមិនទាន់ចូលរួមទេ។ យន្តហោះទម្លាក់គ្រាប់យុទ្ធសាស្ត្រទាំងនេះ អាចនឹងពុំត្រូវបានចូលរួមសមយុទ្ធ Max Thunder ឡើយ” ។
យន្តហោះទម្លាក់គ្រាប់បែក B-52 ត្រៀមចុះចតនៅមូលដ្ឋានទ័ពអាកាស Andersen
ព័ត៌មាននេះ ត្រូវបានផ្សាយចេញតែប៉ុន្មានម៉ោងបន្ទាប់ពីកូរ៉េខាងជើង ប្រកាសលុបចោលកិច្ចចរចាជាន់ខ្ពស់អន្តរកូរ៉េសំដៅស្តែងចេញការប្រឆាំងចំពោះសមយុទ្ធប្រចាំឆ្នាំរវាងកងទ័ពអាមេរិក និងកូរ៉េខាងត្បូង ។
ប្រព័ន្ធផ្សព្វផ្សាយកូរ៉េខាងជើង បានលើកឡើងថា មានចរិតហាត់សម សម្រាប់បម្រើឲ្យការឈ្លានពានមួយ ហើយជាកាយវិការញុះញង់ខណៈពេលដែលចំណងទាក់ទងរវាងកូរ៉េទាំងពីរ កំពុងត្រូវបានកែសម្រួលប្រសើរឡើង ។ ក្រុងព្យុងយ៉ាងក៏គំរាម និងលុបចោលជំនួបកំពូលជាមួយក្រុងវ៉ាស៊ីនតោន ដែលតាមផែនការនឹងប្រព្រឹត្តទៅនៅថ្ងៃទី ១២ ខែមិថុនា ព្រមទាំងព្រមានអាមេរិក គប្បីប្រយ័ត្នប្រយែងចំពោះកាយវិការ “បង្កការរំខាន” នេះ ។
ស្របពេលជាមួយគ្នានោះរដ្ឋមន្ត្រីក្រសួងការពារជាតិកូរ៉េខាងត្បូង Song Young-moo នៅថ្ងៃនេះដែរក៏បានបើកអង្គប្រជុំបន្ទាន់ជាមួយឧត្តមសេនីយ៍ Vincent Brooks ជាមួយមេបញ្ជាការកងកម្លាំងអាមេរិក ប្រចាំកូរ៉េខាងត្បូង ដើម្បីពិភាក្សាជុំវិញប្រតិកម្មរបស់កូរ៉េខាងជើង ជុំវិញការធ្វើសមយុទ្ធនេះ ៕ សូយន
