ភូមិគ្រឹះឯកជនរបស់អតីតនាយករដ្ឋមន្ត្រីម៉ាឡេស៊ី Najib Razak បានត្រូវឆែកឆេរដើម្បីបម្រើដល់ការស៊ើបអង្កេតទាក់ទិនដល់បទចោទប្រកាន់ទាំងឡាយពាក់ព័ន្ធនឹងការលាងលុយ។
នៅថ្ងៃទី ១៦ ខែឧសភា ម្សិលមិញនេះ ប៉ូលិសម៉ាឡេស៊ីបានដំណើរការឆែកឆេរភូមិគ្រឹះឯកជនរបស់អតីតនាយករដ្ឋមន្ត្រីប្រទេសនេះ Najib Razak ដើម្បីបម្រើឲ្យការស៊ើបអង្កេតពាក់ព័ន្ធដល់បទចោទប្រកាន់លាងលុយកខ្វក់ ។
មុននោះលោក Najib Razak និងភរិយាអ្នកស្រី Rosmah Mansor ក៏ត្រូវបានដាក់បញ្ចូលក្នុងបញ្ជីហាមឃាត់មិនឲ្យចេញទៅបរទេសពីសំណាក់នាយកដ្ឋានអន្តោប្រវេសន៍ម៉ាឡេស៊ី ។
អតីតនាយករដ្ឋមន្ត្រីម៉ាឡេស៊ី Najib Razak ។
អតីតនាយករដ្ឋមន្ត្រី Najib Razak បានបង្កើតមូលនិធិអភិវឌ្ឍន៍មួយនៅម៉ាឡេស៊ី នាឆ្នាំ ២០០៩ ដើម្បីជំរុញការអភិវឌ្ឍន៍សេដ្ឋកិច្ចតាមរយៈទំនាក់ទំនងដៃគូទូទាំងពិភពលោក និងការវិនិយោគផ្ទាល់ពីបរទេស ។ ប៉ុន្តែមូលនិធិនេះ បានក្លាយជាស្នូលរឿងអាស្រូវ លាងសំអាតលុយបង្កឲ្យមានការបាត់បង់ទឹកប្រាក់ ៣,៧ពាន់លានដុល្លារ ហើយក៏ជាមូលហេតុមួយបណ្តាលឲ្យមានការស៊ើបអង្កេតទីផ្សារហិរញ្ញវត្ថុនៅប្រទេសមួយចំនួនដូចជាអាមេរិក ស្វីស សិង្ហបុរី ម៉ាឡេស៊ី ចិន ។ល។
តាមនាយករដ្ឋមន្ត្រីម៉ាឡេស៊ី Mohathir mohamad នោះថ្វីត្បិតពុំទាន់កំណត់បានចំនួនលុយដែលអាចប្រមូលមកវិញក្តី ប៉ុន្តែគ្រាន់តែគិតដោយឡែកបរិមាណលុយកខ្វក់ ដែលហូរចេញពីម៉ាឡេស៊ីចូលទៅអាមេរិក គឺមានចំនួនដល់ទៅ ៤,៥ពាន់លានដុល្លារ ។
អាស្រ័យហេតុនេះ ការប្រមូលផ្តុំប្រឆាំងនឹងអំពើពុករលួយមានសារសំខាន់ណាស់ ហើយរដ្ឋាភិបាលម៉ាឡេស៊ី ក៏បាននិងសហប្រតិបត្តិការជាមួយបណ្តាប្រទេសអាមេរិក ស្វីស សិង្ហបុរី ដើម្បីប្រមូលលុយរបស់ម៉ាឡេស៊ីមកវិញ ៕ សូយន