ស្ត្រីម្នាក់ដែលមានជំងឺដំណាក់កាលចុងក្រោយទៅហើយ បានអះអាងថា ប្តីរបស់នាងជាមនុស្សញៀនស្រា និងស្រវឹងខួបជាប្រចាំថ្ងៃ ដែលជាហេតុធ្វើឲ្យគាត់ពុំអាចមានពេលវេលា ក្នុងការមើលថែកូនៗរបស់ពួកគេបានទេ ហេតុនេះ ធ្វើឲ្យនាងអស់សង្ឃឹមយ៉ាងខ្លាំង និងសម្រេចចិត្តរកប្រពន្ធឲ្យកូនប្រុសរបស់នាងអាយុ ១៣ ឆ្នាំ ។
ក្នុងការព្យាយាមយ៉ាងខ្នះខ្នែង ដើម្បីធានាឲ្យកូនៗរបស់នាងមានអ្នកជួយមើលថែដោយភាពកក់ក្តៅនោះ ស្ត្រីជាម្តាយម្នាក់នៅ Andhra Pradesh ប្រទេសឥណ្ឌា បានសម្រេចរកប្រពន្ធឲ្យកូនប្រុសរបស់នាងអាយុ ១៣ ឆ្នាំ និងទីបំផុត បានរកឃើញនារីអាយុ ២៣ ឆ្នាំ ម្នាក់ដែលអាចទុកចិត្តបាន ។
នាងសង្ឃឹមថា នារីរូបនោះដែលមានគំនិតចាស់ទុំជាងច្រើន នឹងអាចមើលថែកូនប្រុសរបស់នាងបានល្អ ព្រមទាំងប្អូនប្រុស និងប្អូនស្រី២នាក់របស់គេផងដែរ ។
មិត្តភក្តិ និងសាច់ញាតិ ក៏រីករាយចូលរួមក្នុងពិធីមង្គលការកូនប្រុសរបស់នាងផងដែរ ដែលធ្វើឡើងនៅក្នុងភូមិមួយនៅ Kurnool ។ ហើយបណ្តារូបភាព និងវីដេអូនៃពិធីមង្គលការគួរឲ្យភ្ញាក់ផ្អើលរបស់ពួកគេ ក៏ត្រូវបានចែករំលែកលើអ៊ីនធើរណេតយ៉ាងផុសផុល ។
បន្ទាប់ពីរូបភាពទាំងនោះបានរីករាលដាល អាជ្ញាធរបានចាប់ផ្តើមស៊ើបអង្កេតអាពាហ៍ពិពាហ៍កុមារដោយខុសច្បាប់នេះ ។ សមត្ថកិច្ចមូលដ្ឋានបានចុះទៅជួបឪពុកម្តាយទាំងសងខាង ដែលជាមនុស្សធ្វើការយ៉ាងយ៉ាប់យ៉ឺន ប៉ុន្តែ ប្តីប្រពន្ធរៀបការថ្មីថ្មោងនេះ បានលាក់ខ្លួនដោយសារគេចពីប្រតិកម្មខឹងរបស់មហាជន ។
ប៉ូលីសបានព្រមានប្តីប្រពន្ធមិនសមរម្យនេះ ត្រូវប្រញាប់បង្ហាញខ្លួនឲ្យបានឆាប់ ព្រោះអាពាហ៍ពិពាហ៍របស់ពួកគេពុំស្របច្បាប់នោះទេ ៕ ចន្ទី
