ប៉ូលីសបានបញ្ចេញវីដេអូឃ្លីបដ៏រន្ធត់មួយ ដែលបានបង្ហាញឲ្យបុរសម្នាក់ បានដើរចាក់សារធាតុកខ្វក់ និងលាមក ចូលទៅក្នុងម៉ាស៊ីន ATM ជាច្រើន ដែលធ្វើឲ្យមហាជនផ្ទុះកំហឹងយ៉ាងខ្លាំង ។
ប៉ូលីសនៅក្នុងប្រទេសចិន បានចាប់ផ្តើមបើកការស៊ើបអង្កេត បន្ទាប់ពីទូ ATM ជាច្រើនកន្លែង នៅក្នុង Sichuan ត្រូវបានរកឃើញថាត្រូវបានគេវាយកំទេច និងខូចខាត ។
វីដេអូឃ្លាំមើលពីទីតាំងទាំងអស់នោះ បានបង្ហាញឲ្យឃើញថា បុរសពាក់មូកសុវត្ថិភាពបិទបាំងមុខមាត់ម្នាក់ ស្ថិតនៅពីក្រោយហេតុការណ៍បំផ្លិចបំផ្លាញនេះ ។
តាមរយៈវីដេអូ បុរសដែលពាក់មូកសុវត្ថិភាពនោះ បានប្រេងប្តូរម៉ាស៊ីនម៉ូតូ (ប្រេងបាត) ទៅលើទូ ATM ជាច្រើនទីតាំង ដើម្បីបង្អាក់ប្រព័ន្ធឲ្យដំណើរការបាន ។ ជនខិលខូចនេះបន្ទាប់មក បានស្រាយថង់មួយដែលផ្ទុកទៅដោយលាមក ចូលទៅរន្ធរបស់ម៉ាស៊ីនជាច្រើន ។
បន្ទាប់ពីដើរបំផ្លាញទូ ATM អស់រយៈពេលប្រហែល១ខែ ចុងក្រោយ ប៉ូលីសបានចាប់ខ្លួនជនសង្ស័យដែលមានឈ្មោះ Lu ។
នៅពេលប៉ូលីសសួរ Lu ពីមូលហេតុដែលរូបគេប្រព្រឹត្តទង្វើដ៏កខ្វក់បែបនេះទៅលើទូ ATM រូបគេបានប្រាប់ថា ការធ្វើបែបនេះ រូបគេនឹងធ្វើឲ្យម៉ាស៊ីនមិនប្រក្រតី និងពុំអាចបញ្ចេញទឹកប្រាក់បាន ។
ទោះយ៉ាងណា ជនរូបនេះនឹងត្រូវតុលាការបង្គាប់ឲ្យបង់ប្រាក់សំណង សម្រាប់ការខូចខាតដ៏ធំធេងទាំងនេះ ដែលរូបគេបានបង្កឡើង ៕ ចន្ទី