ភ្នំពេញ៖ វេទិកាសន្ទនារវាងវេទិកាសម្ព័ន្ធសង្គមស៊ីវិលជាមួយអង្គការ សមាគម សហជីព និងសហគមន៍ត្រូវបានធ្វើឡើងកាលព្រឹកថ្ងៃទី១៧ ឧសភា នៅអគារ វិមាន សែនសុខ ស្ថិតក្នុងខណ្ឌសែនសុខ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ លោកកឹមរ័ត្ន វិសិដ្ឋ ប្រធានក្រុមប្រឹក្សាភិបាល វេទិកាសម្ព័ន្ធសង្គមស៊ីវិលនិងមានការចូលរួមពីអាជ្ញាធរខណ្ឌទាំង១២ មន្ទីរចំណុះឲ្យរដ្ឋបាលរាជធានី និងអង្គការសង្គមស៊ីវិលជាច្រើនទៀត ដែលមានមនុស្សប្រមាណជាង១០០០នាក់ចូលរួម។
គោលបំណងដែលបង្កើតឲ្យមានវេទិកាសន្ទនារវាងវេទិកាសម្ព័ន្ធសង្គមស៊ីវិលជាមួយអង្គការ សមាគម សហជីព និងសហគមន៍ គឺ ដើម្បីបង្កើតឲ្យមានភាពស្និទ្ធស្នាល រវាងសង្គមស៊ីវិល ថ្នាក់ជាតិ និងថ្នាក់ក្រោមជាតិ និយាយគ្នាត្រង់ទៅត្រង់មក ក្នុងការដោះស្រាយបញ្ហានានា រួមគ្នាធ្វើយ៉ាងណាឲ្យរាជធានីភ្នំពេញមានការអភិវឌ្ឍរីកចំរើន។
លោកកឹមរ័ត្ន វិសិដ្ឋ ប្រធានក្រុមប្រឹក្សាភិបាល វេទិកាសម្ព័ន្ធសង្គមស៊ីវិល បានមានប្រសាសន៍បញ្ជាក់ថា វេទិកាសម្ព័ន្ធសង្គមស៊ីវិល (វ.ស.ស) គឺជាអ្នកសម្របសម្រួលដ៏សំខាន់ ក្នុងការពង្រឹងនិងពង្រីកកិច្ចសហប្រតិបត្តិការ និងភាពជាដៃគូអភិវឌ្ឍន៍ រវាងរាជរដ្ឋាភិបាលជាមួយអង្គការសង្គមស៊ីវិល ក្នុងការអភិវឌ្ឍសង្គមជាតិឲ្យកាន់តែមានការរីកចម្រើន។ (វ.ស.ស) ចូលរួមលើកកម្ពស់តួនាទីរបស់អង្គការសង្គមស៊ីវិល ក្នុងការចូលរួមចំណែកផ្តល់ការគាំទ្រនិងជំរុញការអនុវត្តគម្រោងជាក់ស្តែង ដែលឆ្លើយតបទៅនឹងតម្រូវការពិតប្រាកដរបស់ប្រជាពលរដ្ឋមូលដ្ឋាន តាមរយៈអង្គការសង្គមស៊ីវិល ដែលជាដៃគូរបស់ វ.ស.ស.។ ទន្ទឹមនឹងនេះ រាជរដ្ឋាភិបាលតែងតែផ្តល់សារសំខាន់ខ្ពស់ចំពោះតួនាទី និងការចូលរួមចំណែករបស់អង្គការសង្គមស៊ីវិល ដែលបានបំពេញការងារយ៉ាងសកម្ម ជាមួយរាជរដ្ឋាភិបាល និងគ្រប់ភាគីពាក់ព័ន្ធ ដើម្បីលើកកម្ពស់សុខុមាលភាពប្រជាពលរដ្ឋ និងជំរុញការអភិវឌ្ឍសេដ្ឋកិច្ច សង្គមកិច្ចឲ្យមានការរីកចម្រើនប្រកបដោយចីរភាព។
លោកឃួង ស្រេង បានលើកឡើងថា បញ្ហាកកស្ទះចរាចរជាបញ្ហាប្រឈមរបស់យើងទាំងអស់គ្នា ហើយនៅពេលយើងរៀបចំសណ្តាប់ធ្នាប់ត្រូវបានអង្គការសង្គមស៊ីវិលមួយចំនួនរិះគន់អាជ្ញាធរថា អនុវត្តការងាររៀបចំសណ្តាប់នោះមានភាពសាហាវ ។ បញ្ហាសម្រាម បញ្ហាកកស្ទះចរាចរ ប្រទេសណាក៏ដូចប្រទេសណាដែរ ពោលគឺឲ្យតែមានការរីកចម្រើនគឺប្រឈមនឹងបញ្ហានេះហើយ ដូច្នេះយើងត្រូវគ្នាដើម្បីដោះស្រាយបញ្ហានេះ ។
លោកឃួង ស្រេងបានបន្តថា មកដល់ពេលនេះការរៀបចំសណ្តាប់ធ្នាប់នៅលើផ្លូវ១១ខ្សែទទួលបានជោគជ័យ៨០ទៅ៩០ភាគរយហើយ ហើយប្រជាពលរដ្ឋជាច្រើនលើសលប់ក៏បានយល់ដឹងនិងគាំទ្រចំពោះវិធានការរបស់រាជធានីនេះផងដែរ។
លោកបន្តថា បញ្ហារថយន្តក្រុង ចំពោះជនពិការដ្ឋបាលរាជធានីមិនបានយកលុយសេវានោះទេ យើងបាននិងកំពុងរៀបចំការងារនេះអោយបានកាន់តែល្អ ដោយជំហ៊ានដំបូងយើងរៀបចំឲ្យបានសិន និងធ្វើយ៉ាងណាឲ្យមានប្រជាជនគាំទ្រជាមុនសិន ក្នុងការជិះរថយន្តក្រុងដើម្បីកាត់បន្ថយការកកស្ទះចរាចរ គ្រោះថ្នាក់ចរាចរ និងកាត់បន្ថយភាពក្រីក្រផងដែរ។
លោក អភិបាលបន្តថា នៅខែខាងមុខនេះតាមរយៈជំនួយចិននិង ជប៉ុន យើងនឹងទទួលបានរថយន្តក្រុងប្រមាណជាង១០០គ្រឿងបន្ថែមទៀត។
លោកស្នើឲ្យប្រជាពលរដ្ឋនិងអង្គកាសង្គមស៊ីវិល មានបញ្ហាអ្វីត្រូវរាយការណ៍ជូនរដ្ឋបាលរាជធានីភ្នំពេញភ្លាមៗ កុំចាំមានវេទិកាសាធារណៈ ទើបរាយការណ៍នោះ លោកថា រាយការណ៍ភ្លាមយើងចុះជួយបង ប្អូនប្រជាពលរដ្ឋភ្លាម បើទោះបីតាមតាមហ្វេសប៊ុក ទូរស័ព្ទ ក៏ដោយ។
លោកឃួង ស្រេងបន្តថា សង្គមស៊ីវិល បើធ្វើអ្វីត្រូវគិតពីអារម្មណ៍រួមរបស់យើងទាំងអស់គ្នា ធ្វើអ្វីកុំឲ្យប៉ះពាល់ផលប្រយោជន៍សាធារណៈ ដើម្បីចំណេញអង្គការមួយក្តាប់តូចនោះទេ ។
លោកបន្តថា អង្គកាសង្គមស៊ីវិលនិងរដ្ឋបាលរាជធានីភ្នំពេញ គឺមានគោលដៅតែមួយទេ គឺបម្រើផលប្រយោជន៍សាធារណៈនិងផលប្រយោជន៍ប្រជាពលរដ្ឋ ដោយគ្រាន់តែដើរផ្លូវត្រង់និងផ្លូវវាងតែប៉ុណ្ណោះ ៕ ដោយ ៖ បញ្ញាស័ក្តិ