រឿងរ៉ាវគួរឲ្យចម្លែកចិត្តមួយកំពុងចែករំលែកយ៉ាងទូលំទូលាយតាមទំព័រកាសែតអាមេរិក ហើយធ្វើឲ្យទឹកភ្នែកស្រក់មិនតិចឡើយក្រោយពេលឃើញរឿងនេះ ។ នោះជារឿងពិតនៃថ្ងៃដំបូងក្នុងដំណើរចូលសិក្សារបស់កុមារា វ័យ ៥ ឆ្នាំម្នាក់ ហើយខុសប្លែកពីសិស្សដទៃទៀត។
ប៉ូលិស ៧០នាក់ ក្នុងកងម្លាំងសន្តិសុខរដ្ឋ Indiana អាមេរិក បានរង់ចាំ Dakota ដើម្បីជូនពរប្អូន ព្រមទាំងកាដូអាវ SWAT ដែលជាអាវរបស់កងកុម្មង់ដូរប៉ូលិសអាមេរិក ។
ដំណើររឿងនាំឲ្យមានព្រឹត្តិការណ៍នេះ គឺឪពុករបស់ Dakota គឺជាប៉ូលិសម្នាក់ ទើបពលិកម្មកាលពីសប្តាហ៍មុនគ្រាកំពុងបំពេញបេសកកម្ម។ ម្តាយរបស់ Dakota ឲ្យដឹងថា កូនប្រុសខ្លួនបានសួរថា តើមានមិត្តភក្តិណារបស់ឪពុកអាចជូនប្អូនទៅកាន់សាលាបានដែរឬទេ? ស្មានពុំដល់ថា ប៉ូលិស ៧០នាក់ បានឆ្លើយយល់ព្រម ។ ដោយពាក់ឥស្សរយសរបស់ឪពុក កុមារា Dakota បានដើរចូលសាលាដោយក្តីមោទនៈ អមសងខាងដោយកងប៉ូលិសជាច្រើននាក់ ។ ប៉ូលិសទាំងនោះឲ្យដឹងថា គេមិនចង់ឲ្យ Dakota មានអារម្មណ៍ឯកោ ហើយសន្យាថា ពួកគេនឹងមានមុខ ពេលដែលកុមារានេះ ត្រូវការពេញមួយឆាកជីវិត ៕