នៅថ្ងៃទី ១៧ ខែឧសភា ម្សិលមិញនេះ ព្រឹទ្ធសភាអាមេរិកបានបញ្ជាក់ថា អ្នកស្រី Gina Haspel នឹងក្លាយជានាយកស្ថាប័នចារកម្មអាមេរិក CIA ស្រីដំបូងបង្អស់ ហើយប្រការនេះ គឺជាការបញ្ចប់នូវជម្លោះជុំវិញតួនាទីរបស់អ្នកស្រីទាក់ទិននឹងទណ្ឌកម្មសួរចម្លើយយ៉ាងឃោរឃៅចំពោះភេរវជន ដែលស្ថាប័ន CIA បានអនុវត្តនៅអំឡុងឆ្នាំ ២០០០ ។
បេក្ខភាពនាយក CIA, អ្នកស្រី Gina Haspel នៅក្នុងសវនាការជាមួយគណៈកម្មាធិការចារកម្មព្រឹទ្ធសភាអាមេរិក នៅវ៉ាស៊ីនតោន ឌីស៊ី កាលពីថ្ងៃទី ៩ ខែឧសភា កន្លងមក ។
អ្នកស្រី Gina គឺជាចារកិច្ចជើងចាស់ម្នាក់របស់ស្ថាប័ននេះ ហើយបច្ចុប្បន្នកំពុងកាន់តួនាទីជានាយក CIA ស្តីទី ។
តាមរយៈសន្លឹកឆ្នោតអនុម័តគាំទ្រចំនួន ៥១សន្លឹក និងប្រឆាំង ៤៥សន្លឹក អ្នកស្រី Haspel ទទួលបានសន្លឹកឆ្នោតគាំទ្រភាគច្រើន ក្នុងចំណោមព្រឹទ្ធសភាដែលមាន ១០០កៅអី របស់អាមេរិក ។
ការតែងតាំងអ្នកស្រី Haspel បានរងទទួលនូវការប្រឆាំងយ៉ាងខ្លាំងក្លា ដោយហេតុថា អ្នកស្រីមានទាក់ទិនដល់ការដែល CIA ប្រើប្រាស់ទណ្ឌកម្មយកចម្លើយយ៉ាងសាហាវ ក្រោយមហន្តរាយកើតឡើងនៅអាមេរិកនាថ្ងៃទី ១១ ខែកញ្ញា ឆ្នាំ ២០០១ ដែលពួកភេរវជនបានប្រើប្រាស់យន្តហោះបើកបំបុកវិមានភ្លោះ ៕ សូយន