តាមកាសែត Asahi ចុះផ្សាយថ្ងៃទី ១៧ ខែឧសភា ដែលដកស្រង់ប្រភពច្បាស់ការណ៍ឲ្យដឹងថា ហាក់ដូចជាប្រមុខការទូតអាមេរិក Mike Pompeo បានលើកបញ្ហានេះឡើងក្នុងជំនួបជាមួយមេដឹកនាំ គីម ជុងអ៊ុន នៅដើមខែនេះ ។
មេដឹកនាំ គីម ជុងអ៊ុន កំពុងសង្កេតមើលការបាញ់បង្ហោះសាកល្បងកាំជ្រួច Hwasong-12 កាលពីឆ្នាំ ២០១៧ ។
តាមនោះក្រុងវ៉ាស៊ីនតោន អាចដកកូរ៉េខាងជើងចេញពីបញ្ជីរាយនាមបណ្តាប្រទេសគាំទ្រភេរវកម្ម ប្រសិនបើប្រទេសនេះ យល់ព្រមបញ្ជូនវត្ថុធាតុនុយក្លេអ៊ែរមួយចំនួនទៅក្រៅប្រទេសក្នុងអំឡុងពេល ៦ ខែ ។ ការដឹកជញ្ជូនអាចធ្វើតាមរយៈកប៉ាល់សមុទ្រ ។
ប្រសិនបើកូរ៉េខាងជើងយល់ព្រមរំសាយនុយក្លេអ៊ែរទាំងស្រុង ដែលអាចត្រួតពិនិត្យ និងមិនប្រែប្រួល នោះនៅក្នុងជំនួបកំពូលអាមេរិក-កូរ៉េខាងជើង នៅប្រទេសសិង្ហបុរីនៅថ្ងៃទី ១២ ខែមិថុនាខាងមុខ ក្រុងវ៉ាស៊ីនតោននឹងធានាមិនឲ្យមានការផ្លាស់ប្តូររបបដឹកនាំនៅក្រុងព្យុងយ៉ាង ហើយនឹងដាក់ខ្លឹមសារសន្យានេះទៅក្នុងសេចក្តីថ្លែងការណ៍រួមនាពេលបញ្ចប់សន្និសីទ។
ទោះយ៉ាងណានៅថ្ងៃទី ១៦ ខែឧសភា កូរ៉េខាងជើងបានផ្ទុះកំហឹង ហើយព្រមានថា ៖ “ប្រសិនបើអាមេរិក បន្តច្រានឲ្យកូរ៉េខាងជើងទាល់ច្រកតាមរយៈការបោះបង់នុយក្លេអ៊ែរចោល ដោយឯកតោភាគី យើងខ្ញុំនឹងមិនចាប់អារម្មណ៍ទៀតឡើយ ចំពោះការចរចាបែបនេះ” ។
អនុរដ្ឋមន្ត្រីការបរទេសកូរ៉េខាងជើង Kim Kye Gwan នៅបានរិះគន់ត្រង់ចំពោះទីប្រឹក្សាសន្តិជាតិអាមេរិក John Bolton ហើយលើកឡើងថា ការដែលលោក Bolton ចង់អនុវត្តទម្រង់ រំសាយនុយក្លេអ៊ែរ បែបលីប៊ី នៅកូរ៉េខាងជើង គឺជារឿង “ភ្លីភ្លើ ” ទាំងស្រុងមួយ ។ អនុរដ្ឋមន្ត្រីការបរទេសរូបនេះ នៅបាននិយាយត្រង់ៗថា ៖ “យើងខ្ញុំមិនអាចលាក់បាំងបាននូវការខ្ពើមរអើមចំពោះលោក Bolton ។
ព័ត៌មានដែលត្រូវបានចុះផ្សាយលើកាសែត Asahi ថ្ងៃទី ១៧ ខែឧសភា អាចបកស្រាយបានពីឥរិយាបថខឹងសម្បាររបស់កូរ៉េខាងជើង និងចំពោះអាមេរិក ៕ សូយន
