ទីភ្នាក់ងារព័ត៌មានកណ្តាលរបស់កូរ៉េខាងជើង (KCNA) នៅថ្ងៃទី ១៧ ខែឧសភា ឲ្យដឹងថា កូរ៉េខាងជើងនឹងមិនអង្គុយចរចាជាមួយកូរ៉េខាងត្បូង ដរាបណាពុំទាន់ដោះស្រាយបានបញ្ហាទាំងឡាយដែលនាំឲ្យមានការផ្អាកជំនួបកំពូលនៅសប្តាហ៍នេះ ។ មូលហេតុត្រូវបានប្រធានគណៈកម្មាធិការនេះ លើកឡើងថា ៖ កូរ៉េខាងជើង ថ្កោលទោសចំពោះការធ្វើសមយុទ្ធប្រចាំរបស់អាមេរិក-កូរ៉េខាងត្បូង ហើយស្តីបន្ទោសប្រធានរដ្ឋសភាកូរ៉េខាងត្បូង ថាបានរៀបចំកិច្ចចរចាជាមួយ “ពពួកអសីលធម៌ ” ប៉ុន្តែពុំបានបញ្ជាក់ច្បាស់ថានោះជានរណា ។ លោក Ri Son-gwon ក៏បានវាយតម្លៃថា រដ្ឋអំណាចកូរ៉េខាងត្បូងបច្ចុប្បន្នគឺ “ទន់ខ្សោយ” ។
ប្រធានគណៈកម្មាធិការឯកភាពសន្តិភាពកូរ៉េខាងជើង លោក Ri Son-gwon ។
ទោះបីជាកូរ៉េខាងជើង បានលុបចោលជំនួបថ្នាក់ជាន់ខ្ពស់ក្តី ពលរដ្ឋកូរ៉េខាងត្បូង នៅតែសង្ឃឹមលើបរិយាកាសដែលកំពុង “បន្ថយកម្តៅ” នៅលើឧបទ្វីបកូរ៉េ ពិសេសក្រោយជំនួបកំពូលអន្តរកូរ៉េលើកទី ៣ កន្លងមក ហើយគ្រានោះមេដឹកនាំកូរ៉េទាំងពីរ បានព្រមព្រៀងរំសាយនុយក្លេអ៊ែរ ហើយចុះកិច្ចសន្ធិសញ្ញាសន្តិភាព នៅក្នុងឆ្នាំនេះ ។
គួរកត់សម្គាល់ថា ថ្វីត្បិតតែកិច្ចចរចាថ្នាក់ជាន់ខ្ពស់ ត្រូវបានកូរ៉េខាងជើងលុបចោល ជាឯកតោភាគីក្តី ប៉ុន្តែអត្រាគាំទ្រចំពោះប្រធានាធិបតី Moon Jae-in ស្ថិតនៅកម្រិតខ្ពស់ដដែល ។ បើតាមការស្ទាបស្ទង់មតិរបស់ Realmeter ប្រកាសជាសាធារណៈនៅថ្ងៃទី ១៧ ខែឧសភា លោក Moon Jae-in នៅតែទទួលបានការគាំទ្រពីប្រជាជន ៧៤,៥% ៕ សូយន
