បុរសទេសចរជនជាតិអាល្លឺម៉ង់ម្នាក់ បានទទួលរងការឈឺចាប់យ៉ាងដំណំ បន្ទាប់ពីអ្នករត់ម៉ូតូឌុបម្នាក់ស្ទុះទៅធាក់១ជើងចំកណ្តាលមុខ ដោយបាននិយាយថា គាត់ធ្វើបែបនេះដើម្បីជួយប៉ូលីសចាប់បុរសបរទេសរូបនោះ ដែលបានព្យាយាមអូសម៉ូតូចេញ ដើម្បីគេចពីការផាកពិន័យរបស់ប៉ូលីសចរាចរ ។
វីដេអូឃ្លីបបានបង្ហាញឲ្យឃើញបុរសជនជាតិអាល្លឺម៉ង់ម្នាក់ ព្យាយាមអូសម៉ូតូទាំងជាប់សោ.កយ៉ាងត្រដាបត្រដួស ចេញពីហ្វូងមនុស្ស មុនពេលបុរសពាក់អាវពណ៌ទឹកក្រូចម្នាក់ ស្ទុះចូលមកធាក់១ជើងចំកណ្តាលមុខ ។
អ្នករត់ម៉ូតូឌុបឈ្មោះ Soonthorn Sangkham អាយុ ៤៨ ឆ្នាំ បានអះអាងថា មន្ត្រីប៉ូលីសបានចាក់សោ.កម៉ូតូរបស់បុរសអាល្លឺម៉ង់នោះ ព្រោះតែម៉ូតូរបស់គាត់ពុំមានស្លាកលេខត្រឹមត្រូវ ប៉ុន្តែ បន្ទាប់មក បុរសរូបនេះបានធ្វើ «ល្មើស» នឹងការអនុវត្តច្បាប់របស់មន្ត្រី ដែលពុំអាចបញ្ឈប់សកម្មភាពរបស់គាត់ដែលនៅតែរឹងទទឹងអូសម៉ូតូចេញ ហេតុនេះ គាត់ចូលជួយ «អន្តរាគមន៍» ប៉ូលីសតែម្តងទៅ ។
ទោះយ៉ាងណា ប៉ូលីសបានធ្វើកំណត់ពីហេតុការណ៍នេះ ប៉ុន្តែ ពុំមានវិធានការផ្លូវច្បាប់ណាមួយបន្ថែមទេ ខណៈបុរសអាល្លឺម៉ង់នោះក៏មិនចង់រករឿងប្តឹងផ្តល់ ហើយគាត់ក៏បានបង់ប្រាក់ផាកពិន័យទៅតាមច្បាប់ចរាចរណ៍ ប៉ុន្តែ គាត់បាននិយាយថា គាត់ចង់ត្រឡប់ទៅអាល្លឺម៉ង់វិញ ៕ ចន្ទី
