ប្រធានាធិបតីត្រាំ នៅថ្ងៃទី ១៧ ខែឧសភា បានចេញសេចក្តីថ្លែងការណ៍ ដែលបំបោសអង្អែលផង គំរាមផងចំពោះកូរ៉េខាងជើង ។
ប្រធានាធិបតីអាមេរិក ដូណាល់ ត្រាំ នៅថ្ងៃទី ១៧ ឧសភា បានប្រាប់អ្នកសារព័ត៌មានថា ប្រសិនបើជំនួនកំពូលជាមួយកូរ៉េខាងជើងទទួលបានជោគជ័យ នោះលោក គីម ជុងអ៊ុន ទទួលបាន “ការការពារដ៏ខ្លាំងខ្លា” ហើយថា “លោកគីម នឹងបន្តដឹកនាំប្រទេស ហើយប្រទេសរបស់គាត់នឹងមានបានខ្លាំងណាស់” ។
ប៉ុន្តែប្រសិនបើទំនាក់ទំនងការទូតបរាជ័យ លោកគីម អាចនឹងមានជោគវាសនាស្រដៀងនឹងវរៈសេនីយ៍ឯក ហ្គាដាហ្វី របស់លីប៊ី អ្នកដែលត្រូវបានផ្តួលរំលំ ហើយសម្លាប់បន្ទាប់ពីរដ្ឋប្រហារមួយ គាំទ្រដោយ NATO ។
យ៉ាងនេះក្តី លោកត្រាំ ក៏នៅសង្កត់បន្ថែមថា លោកមិនដើរតាមទម្រង់បែបលីប៊ីទេ ចំពោះដំណើរការរំសាយនុយក្លេអ៊ែរនៅឧបទ្វីបកូរ៉េ ៖ “ទម្រង់លីប៊ី ជាប្រភេទមួយផ្សេងទាំងស្រុង យើងបានបំផ្លិចបំផ្លាញទឹកដីនោះ” ។
សេចក្តីថ្លែងការណ៍ខាងលើត្រូវបានចាត់ទុកថា ជាការ “គំរាម” ខ្លាំងបំផុតរបស់ម្ចាស់សេតវិមាន គិតចាប់ពីពេលដែលក្រុងព្យុងយ៉ាង បានធ្វើការផ្អាកភ្លាមៗនូវកិច្ចចរចាជាន់ខ្ពស់ ជាមួយកូរ៉េខាងត្បូងកាលពីថ្ងៃទី ១៦ ខែឧសភា ហើយគំរាម និងលុបចោលសន្និសីទកំពូលជាប្រវត្តិសាស្ត្ររវាងអាមេរិក-កូរ៉េខាងជើង ។
តាម CNN នៅពេលនិយាយអំពីកូរ៉េខាងជើង លោកត្រាំនៅបានពោលថា ៖ ពួកគេកំពុងចរចាប្រៀបដូចជាពុំធ្លាប់មានរឿងអ្វីកើតឡើង ទោះបីជាលោកបានអានព័ត៌មានពីការប្រកាសថ្មីបំផុតរបស់កូរ៉េខាងជើង ក៏ដូចជាបានស្តាប់ព័ត៌មានពីកូរ៉េខាងត្បូង ប៉ុន្តែដោយឡែកកូរ៉េខាងជើង ពុំទាន់មានផែនការបោះបង់ចោលជាផ្លូវការនូវសន្និសីទកំពូលខាងមុខនាប្រទេសសិង្ហបុរី ៕ សូយន
