ភ្នំពេញ៖ ទំនាក់ទំនងមិត្តភាព និងភាពជាដៃគូយុទ្ធសាស្ត្រ គ្រប់ជ្រុងជ្រោយ រវាងកម្ពុជា-ចិន បានចូលរួមគាំទ្រដល់ដំណើរការ នៃការអភិវឌ្ឍវិស័យទេសចរណ៍កម្ពុជា ប្រកបដោយការទទួលខុសត្រូវ។ ជាក់ស្តែង ក្នុងចំណោមភ្ញៀវទេសចរអន្តរជាតិចំនួន ៥,៦ លាននាក់ ដែលមកទស្សនាកម្ពុជានៅឆ្នាំ២០១៧ កន្លងទៅនេះ មានភ្ញៀវទេសចរចិនប្រមាណជាង ១,២ លាននាក់ កើនឡើង ៤៥,៩ភាគរយ និងឈរក្នុងលំដាប់ទី១។
លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងក្នុងពិធីលៀងសាយភោជន កាលពីរាត្រីថ្ងៃទី១៧ខែឧសភា បន្ទាប់ពីបញ្ចប់កិច្ចប្រជុំវេទិកាកំពូលទេសចរណ៍កម្ពុជា-ចិន ថា ដើម្បីបន្តត្រៀមទទួលបដិសណ្ឋារកិច្ច ស្វាគមន៍ ចំពោះភ្ញៀវទេសចរចិន ឱ្យកាន់តែប្រសើរឡើង ស្របជាមួយនឹងយុទ្ធនាការផ្សព្វផ្សាយ “កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ ”កិច្ចសហប្រតិបត្តិការ ជាដៃគូរវាង (រដ្ឋ-រដ្ឋ) រវាង (រដ្ឋ និងឯកជន) គឺជាកត្តាគន្លឹះជាយុទ្ធសាស្ត្រ ដូចបានគូសបញ្ជាក់ក្នុងវេទិកាកំពូលទេសចរណ៍កម្ពុជា-ចិន នារសៀលនេះ។ ក្នុងស្មារតីនេះ វេទិកាកំពូលកម្ពុជា-ចិនលើកទី១ នេះគឺពិតជាមានសារសំខាន់ជាយុទ្ធសាស្ត្រ ចូលរួមទ្រទ្រង់ដល់ការអនុវត្តផែនការសកម្មភាព និងវិធានការចាំបាច់នានា ដូចមានចែងក្នុងផែនការអនុវត្តអនុស្សារណៈយោគយល់ស្តីពីកិច្ចសហប្រតិបត្តិការទេសចរណ៍ រវាងរដ្ឋបាលទេសចរណ៍ជាតិចិន និងក្រសួងទេសចរណ៍កម្ពុជា (២០១៧-២០២០) ឱ្យកាន់តែមានប្រសិទ្ធិភាព សំដៅជំរុញលំហូរទេសចររវាងប្រទេសទាំងពីរឱ្យកាន់តែខ្លាំងក្លា ពិសេសគាំទ្រដល់ឧស្សាហកម្មទេសចរណ៍កម្ពុជា ឱ្យមានលក្ខណៈសម្បត្តិគ្រប់គ្រាន់ ក្នុងការទាក់ទាញ និងទទួលភ្ញៀវទេសចរចិនបន្ថែមច្រើនទៀតមកកម្ពុជា។
តាមរយៈស្មារតីនៃអង្គវេទិកាកំពូលទេសចរណ៍កម្ពុជា-ចិន យើងបន្តប្តេជ្ញាចិត្តអនុវត្តផែនការយុទ្ធសាស្ត្រ ចំនួន ៤ចំណុចដូចខាងក្រោម៖
ទី១. យើងត្រូវការចាំបាច់នៃកិច្ចសហការភាពជាដៃគូរដ្ឋ-រដ្ឋ និងភាពជាដៃគូរដ្ឋ-ឯកជន (PPP) ដើម្បីអភិវឌ្ឍ និងវិនិយោគផលិតផលទេសចរណ៍៖ ដើម្បីធានាជោគជ័យនៃការអនុវត្តផែនការសកម្មភាពអនុស្សរណៈយោគយល់ស្តីពីកិច្ចសហប្រតិបត្តិការទេសចរណ៍ រវាងរដ្ឋបាលទេសចរណ៍ជាតិចិន និងក្រសួងទេសចរណ៍។
ខណៈដែលអត្តចរិករបស់ភ្ញៀវទេសចរចិន ត្រូវបានឆ្លុះបញ្ចាំងតាមរយៈអង្គវេទិកានារសៀលនេះ មានលក្ខណៈពិសេស ដែលគោលដៅទេសចរណ៍នីមួយៗត្រូវស្វែងយល់អំពីអត្តចរិក ដូចខាងក្រោម៖ (១). ភ្ញៀវទេសចរចិន មានលក្ខណៈទាន់សម័យ តែប្រកាន់ទំនៀមទម្លាប់ (និយមប្រើប្រាស់អនឡាញ (Online) ក្នុងការស្វែងរកគោលដៅទេសចរណ៍ និងអាចផ្តល់នូវបទពិសោធន៍ល្អៗ (Experiences) ដល់ពួកគាត់ក្នុងដំណើរកម្សាន្ត ដែលចាំបាច់ត្រូវមានផលិតផលទេសចរណ៍ប្រកបដោយគុណភាព។ (២). ភ្ញៀវទេសចរចិន ត្រូវការសេវាកម្មមានគុណភាពខ្ពស់ គោលដៅប្រកបដោយសុវត្ថិភាព (Safe) (៣). ភ្ញៀវទេសចរចិនមានលទ្ធភាពចំណាយខ្ពស់ (៤). ចូលចិត្តធ្វើដំណើរជាឯកជន តែនិយមប្រើភាសាកំណើត។
លោករដ្ឋមន្ត្រី បានថ្លែងអំណរគុណចំពោះស្ថាប័នពាក់ព័ន្ធ វិស័យឯកជន ក្នុងការចូលរួមធ្វើឱ្យកម្ពុជា ក្លាយជាគោលដៅទេសចរណ៍ទាក់ទាញ សម្រាប់ទេសចរចិន រាប់ទាំងចាប់ពីសេវាលើយន្តហោះ ច្រកចូល ស្នាក់នៅ ហូបចុក និងកម្សាន្ត។ល។ ទន្ទឹមនឹងនោះ យើងត្រូវការចាំបាច់នូវការវិនិយោគ និងការអភិវឌ្ឍផលិតផលទេសចរណ៍សម្រាប់ទេសចរចិនប្រកបដោយភាពច្នៃប្រឌិត និង
នវានុវត្តភាព (រួមទាំងសណ្ឋាគារលំដាប់ផ្កាយ៤ និងផ្កាយ៥ រមណីយដ្ឋានទេសចរណ៍កម្រិតខ្ពស់ដែលជាតម្រូវការរបស់ទេសចរចិន)។ យើងក៏គាំទ្រការជំរុញវិនិយោគចិនក្នុងវិស័យទេសចរណ៍កម្ពុជាតាមរយៈការបង្កើតតំបន់ទេសចរណ៍ពិសេស (អាចគម្រោងគំរូទី១ នៅខេត្តព្រះសីហនុ) អមជាមួយគោលនយោបាយលើកទឹកចិត្តមួយចំនួនសម្រាប់គម្រោងវិនិយោគទេសចរណ៍ផងដែរ។ ឆ្លៀតឱកាសនេះ
ទី២. បន្តពង្រឹងគុណភាពឧស្សាហកម្មទេសចរណ៍៖ យើងបន្តគាំទ្រដាក់ចេញ និងអនុវត្តប្រព័ន្ធវាយតម្លៃបញ្ជាក់គុណភាព (China Ready Accreditation System) ដល់ផ្នែកឯកជនក្នុងឧស្សាហកម្មទេសចរណ៍កម្ពុជាដែល Ready ក្នុងការទទួលភ្ញៀវទេសចរចិន។ ទន្ទឹមនឹងនេះ ដើម្បីសម្រេចបានការអនុវត្ត “សេវាមួយ ស្តង់ដាមួយ” ក៏ទាមទារឱ្យមានការបណ្តុះបណ្តាលធនធានមនុស្ស និងការប្រើប្រាស់បច្ចេកវិទ្យា។
យើងក៏បន្តកិច្ចខិតខំបណ្តុះបណ្តាលផ្នែកបដិសណ្ឋារកិច្ចល្អសម្រាប់ទទួលស្វាគមន៍ចិន ការបន្តពង្រឹងជំនាញភាសាចិនដល់អ្នកផ្គត់ផ្គង់សេវាកម្មក្នុងឧស្សាហកម្មទេសចរណ៍ដែលផ្នែកឯកជនត្រូវយកចិត្តទុកដាក់ ការរៀបចំសិក្ខាសាលាជាប់ជាប្រចាំអំពីនិន្នាការ និងបច្ចុប្បន្នភាព China Ready និងការបញ្ជ្រាបការយល់ដឹងជាសាធារណៈ (Do and Don’t) ដល់ភ្ញៀវទេសចរចិនឱ្យបានជាប់ជាប្រចាំ។ ឆ្លៀតឱកាសនេះ ខ្ញុំសូមថ្លែងអំណរគុណស្ថានទូតចិន ដែលផ្តល់កិច្ចសហការក្នុងការរៀបចំការប្រឡងជ្រើសរើសអ្នកនិយាយភាសាចិនឆ្នើមក្នុងវិស័យទេសចរណ៍ជារៀងរាល់ឆ្នាំ និងក៏សូមស្នើបន្តកិច្ចសហការ និងគាំទ្រក្រសួងទេសចរណ៍ក្នុងការបណ្តុះបណ្តាលភាសាចិន និងវប្បធម៌ចិនដល់ប្រតិបត្តិករទេសចរណ៍កម្ពុជា និងគាំទ្រដល់ការបណ្តុះបណ្តាលប្រព័ន្ធ China Ready Accreditation System ដល់ប្រតិបត្តិករទេសចរណ៍កម្ពុជាផងដែរ។ មជ្ឈមណ្ឌលកម្ពុជា-ចិន China Ready នឹងដើរតួនាទីគន្លឹះក្នុងការជំរុញការអនុវត្តប្រព័ន្ធវាយតម្លៃបញ្ជាក់គុណភាព ការបណ្តុះបណ្តាលធនធានមនុស្ស ការសិក្សាស្រាវជ្រាវ និងការប្រើប្រាស់បច្ចេកវិទ្យាសម្រាប់អភិវឌ្ឍទេសចរណ៍នៅកម្ពុជា។
ទី៣. បន្តពង្រឹងការផ្សព្វផ្សាយទេសចរណ៍រួមគ្នា៖ យើងបន្តរួមគ្នាធ្វើការផ្សព្វផ្សាយឱ្យបានទូលំទូលាយតាមគ្រប់រូបភាព និងគ្រប់មធ្យោបាយ នៅលើទីផ្សារទេសចរណ៍នៃប្រទេសទាំងពីរដោយបន្តចូលរួមពិព័រណ៍ទេសចរណ៍ ព្រឹត្តិការណ៍ទេសចរណ៍ ការផ្សព្វផ្សាយតាម ប្រព័ន្ធ Online បណ្តាញទំនាក់ទំនងសង្គម Social Media ការផ្សព្វផ្សាយតាមរយៈស្ថានអគ្គកុងស៊ុលកម្ពុជា ស្ថានតំណាងនៅប្រទេសចិន ការអភិវឌ្ឍគេហទំព័រទេសចរណ៍ជាភាសាចិន ជាដើម។
ទី៤.បន្តរួមគ្នា បើកចំហរឱ្យកាន់តែទូលំទូលាយថែមទៀតផ្តើមចេញពីផ្លៃផ្កានៃការតភ្ជាប់ និងការសម្រួលការធ្វើដំណើរទេសចរណ៍នៅក្នុងក្របខណ្ឌនៃគំនិតផ្តួចផ្តើម “ខ្សែក្រវ៉ាត់ និងវិថី” ៖ ស្មារតីផ្លូវសូត្រគឺជាស្មារតីនៃវិស័យទេសចរណ៍ (Spirit of the Silk Road is the Spirit of Tourism) ពោលគឺជាស្មារតីនៃសន្តិភាព និងកិច្ចសហប្រតិបត្តិការ ការបើកទូលាយ និងបរិយាប័ន្ន ការរៀនសូត្រពីគ្នាទៅវិញទៅមក និងការបែងចែកផលប្រយោជន៍ទាំងអស់គ្នា។ ទន្ទឹមនឹងនេះ យើងនឹងរួមគ្នាបន្តជំរុញការសម្រួលការធ្វើដំណើរ និងដឹកជញ្ជូនទេសចរណ៍ តាមរយៈការកាត់បន្ថយរបាំងមិនចាំបាច់នានា បន្តពង្រឹងបដិសណ្ឋារកិច្ចសេវាកម្មពេលមកដល់ (Arrival Services) តាមរយៈការអនុវត្តការសម្រួលទិដ្ឋាការរវាងប្រទេសទាំងពីរ (ដូចជាការអនុវត្តទិដ្ឋាការអេឡិចត្រូនិច E-visa Visa-on-Arrival ការដាក់ចេញនូវទិដ្ឋាការចូល-ចេញច្រើនដងរយៈពេលវែង Multiple Entries Visa T1T2T3) និងការសម្រួលដល់ចំណាយចុះចតនានារបស់ក្រុមហ៊ុនអាកាសចរពីប្រទេសចិនមកកម្ពុជាផងដែរ៕ ដោយ៖បញ្ញាស័ក្តិ