ភ្នំពេញ ៖ ប្រជាពលរដ្ឋរងគ្រោះជាង ៣០០ គ្រួសារ ពីខេត្តកោះកុង តវ៉ារឿងដីធ្លីជាថ្មីនៅភ្នំពេញ ដែលក្រុមហ៊ុនរបស់ឧកញ៉ា លី យ៉ុងផាត់ រឹបអូសប្រមាណ ១០ ឆ្នាំមក។ នេះជាថ្ងៃទី២ នៃការតវ៉ារបស់ពួកគាត់ នាថ្ងៃទី ១៨ ឧសភា ២០១៨។
រហូតមកដល់ពេលនេះ ពលរដ្ឋដែលមានជំលោះដីធ្លីនៅខេត្តកោះកុង នៅតែបន្តទាមទាររកដំណោះស្រាយ បើទោះបីជាដឹងថាគ្មានសង្ឃឹមក៏ដោយ។
កាលពីថ្ងៃទី១៧ខែឧសភា ពលរដ្ឋមានជំលោះដីធ្លីនៅខេត្តកោះកុង ជួបជុំនៅក្រសួងដែនដី ដើម្បីរកអន្តរាគមន៍ តែត្រូវបានមន្ត្រីនៃក្រសួងនេះស្តីបន្ទោសបន្ថែម ហើយនៅព្រឹកថ្ងៃទី១៨ខែឧសភា កងសន្តិសុខ ខណ្ឌមានជ័យ រារាំងក្បួនតវ៉ាប្រជាពលរដ្ឋរងគ្រោះដីធ្លី ជាមួយក្រុមហ៊ុន លីយ៉ុងផាត់ មកពីខេត្តកោះកុងមុខវត្តសាមគ្គីរស្សី។
ក្នុងការតវ៉ាទាមទារនោះ មានទារកអាយុ៣ខែម្នាក់ បានសន្លប់នៅពេលដែលស្ត្រីជាម្តាយ បានចូលរួមដើរក្បួនជាមួយអ្នកមានជម្លោះដីធ្លីមួយចំនួនទៀតមកពី ខេត្តកោះកុង ហើយបានប៉ះទង្គិចជាមួយសមត្ថកិច្ច នៅក្នុងខណ្ឌមានជ័យ រាជធានីភ្នំពេញ។
នៅម៉ោងប្រមាណ៨ព្រឹកនេះប្រជាពលរដ្ឋមានជម្លោះដីធ្លីជាង៣០០នាក់មកដែលស្នាក់នៅវត្តសាមគ្គីរង្សី បាននាំគ្នាដើរចេញពីវត្តដោយបញ្ជាក់គោលបំណងថា ទៅក្រសួងរៀបចំដែនដីដើម្បីស្វែងរកដំណោះស្រាយបញ្ហារបស់ពួកគាត់ ហើយក៏មានការរារាំងពីកម្លាំងសមត្ថកិច្ច។
ក្នុងពេលប៉ះទង្គិចគ្នានោះ ពលរដ្ឋអះអាងថា បណ្តាលឲ្យទារកអាយុ៣ខែធ្លាក់ពីដៃម្តាយហើយក៏សន្លប់ ចំណែកស្ត្រី៣នាក់និងបុរសម្នាក់ទៀតរងរបួស។ រហូតដល់ម៉ោងជិត១២ថ្ងៃត្រង់នេះ ពលរដ្ឋទាំងនោះផ្អាកធ្វើដំណើរនៅត្រង់ចំណុចស្ពានស្ទឹងមានជ័យ ហើយគ្រោងបន្តដំណើរទៀតទៅក្រសួងរៀបចំ ដែនដី បើទោះបីជាប្រឈមមុខជាមួយសមត្ថកិច្ច។
ប្រជាពលរដ្ឋជាង៣០០គ្រួសារមកពីខេត្តកោះកុង ដែលអះអាងថា មិនទាន់ទទួលបានសំណង នៅថ្ងៃនេះ បាននាំគ្នាមកតវ៉ានៅមុខក្រសួងដែនដីជាថ្មីទៀត ដើម្បីឲ្យស្ថាប័នមួយនេះ ពន្លឿនការដោះស្រាយសំណងជូនពួកគេឲ្យបានឆាប់។
ប្រជាពលរដ្ឋរស់នៅឃុំចំនួន៤ ក្នុងស្រុកស្រែអំបិល ខេត្តកោះកុង ដែលអះអាងថា មានបញ្ហាវិវាទដីធ្លីជាមួយក្រុមហ៊ុន Koh kong Plantation Co.,Ltd និង Koh Kong Sugar Industry Co., Ltd. បាននាំគ្នាក្នុងគោលបំណងទៅតវ៉ាប្រមូលផ្តុំនៅមុខក្រសួងដែនដី ដើម្បីជំរុញឲ្យស្ថាប័ននេះ ពន្លឿនការបញ្ហាដីធ្លីរបស់ពួកគាត់ ។
ពលរដ្ឋម្នាក់ រស់នៅឃុំដងពែង ស្រុកស្រែអំបិល ខេត្តកោះកុង លើកឡើងថា ពួកគាត់ជម្លោះដីធ្លីជាមួយក្រុមហ៊ុនស្ករអំពៅចាប់តាំងពីឆ្នាំ២០០៦មកម្លេះ។ អ្នកស្រីបន្តថា កន្លងមក ពួកគាត់មិនបាននាំ គ្នាធ្វើការតវ៉ា ដោយសារអាជ្ញាធរខេត្តអះអាង ថានឹងដោះស្រាយឲ្យពួកគាត់ ប៉ុន្តែមកដល់បច្ចុប្បន្ននេះ អាជ្ញាធរមិនបានដោះស្រាយនោះទេ។
ពួកគាត់ឡើងមកនេះ ដើម្បីឲ្យក្រសួងពន្លឿនការដោះស្រាយបញ្ហាដីធ្លីឲ្យពួកគាត់ ខណៈជម្លោះដីនេះបានអូសបន្លាយជាង១០ឆ្នាំមកហើយនោះ។
ការផ្ទុះការតវ៉ារបស់ពលរដ្ឋទាំងនោះ ធ្វើឡើងក្រោយពីក្រសួងរៀបចំដែនដី បានសម្រេចកាត់ដីទំហំប្រមាណ៨២៥ហិចតា ចេញពីក្រុមហ៊ុនស្ករអំពៅក្នុងខេត្តកោះកុង យកទៅឲ្យប្រជាពលរដ្ឋមួយក្រុមផ្សេងទៀត ចំនួន៣៧៥គ្រួសារ និងសម្រចឲ្យក្រុមហ៊ុនផ្តល់សំណងជាទឹកប្រាក់ ២៥០០ដុល្លារក្នុងមួយគ្រួសារ ដល់ពលរដ្ឋចំនួន១៧៥គ្រួសារ ដើម្បីបញ្ចប់រឿងកាលពីថ្ងៃទី២២ខែមីនាឆ្នាំ២០១៨។
នៅខែសីហាឆ្នាំ២០០៦ ក្រសួងកសិកម្មបានសម្រេចផ្តល់ដីសម្បទានសេដ្ឋកិច្ចឲ្យក្រុមហ៊ុនកោះកុងផ្លេនថេសិន និងកោះកុងស៊ូហ្គ័រ ធ្វើឧស្សាហកម្មស្ករអំពៅនៅលើដីជិត២ម៉ឺនហិកតា ក្នុងស្រុកបុទុមសាគរ និងស្រុកស្រែអំបិលក្នុងខេត្តកោះកុង៕ ដោយ៖បញ្ញាស័ក្តិ