ស្វាយរៀង ៖ ប្រជាពលរដ្ឋប្រមាណជាង១០០គ្រួសារដែលរស់នៅភូមិបាវិតកណ្តាលសង្កាត់បាវិតក្រុងបាវិតបានសម្តែងការមិន សប្បាយចិត្តចំពោះមេផ្សារអន្តរជាតិបាវិតនិងអាជ្ញាធរនិងមន្ត្រីជំនាញដែលអនុញ្ញាតិអោយសាងសង់ផ្ទះល្វែងចូលចំណីផ្លូវរបស់រដ្ឋពិបាកក្នុងការធ្វើដំណើរដោយបន្សល់ទុកគ្រឿងសំណង់រាយប៉ាយពេញផ្លូវសុំបទអន្តរាគមន៍ពីសម្តេចតេជោហ៊ុនសែនអោយជួយដោះស្រាយនូវទុក្ខលំបាកនេះផង។ការប្រតិកម្មនិងរកបទអន្តរាគមន៍នេះបានធ្វើឡើងនៅព្រឹកថ្ងៃទី១៨ខែឧសភាឆ្នាំ២០១៨។
ប្រជាពលរដ្ឋរស់នៅភូមិបាវិតកណ្តាលបានថ្លែងប្រាប់អោយដឹងនៅព្រឹកនេះថាពួកគាត់ទាំងអស់គ្នាប្រមាណជាង១០០គ្រួសារបានផ្តិតមេដៃប្តឹងមេផ្សារអន្តរជាតិបាវិតដែលផ្លើមធំបានរំលោភយកដីចំណីផ្លូវរបស់រដ្ឋមកសាងសង់ផ្ទះល្វែងយ៉ាងរំភើយគឺតាំងតែពីខែមេសាឆ្នាំ២០១៨មកម្លេះ។
ប្រភពពីប្រជាពលរដ្ឋបានអោយដឹងទៀតថាមេផ្សារអន្តរជាតិបាវិតនេះពិតជាមានអំណាចខ្លាំងណាស់ហ៊ានសាងសង់ផ្ទះរំលោភចំណីផ្លូវរដ្ឋធ្វើអោយប៉ះពាល់ដល់ការធ្វើដំណើររបស់ពលរដ្ឋផ្លូវមានភាពតូចចង្អៀតនិងអាចបង្ករអោយមានគ្រោះចរាចរណ៍ផងដែរ។ដោយរយះកាលកន្លងមកប្រជាពលរដ្ឋក៏ធ្លាប់ប្តឹងទៅអាជ្ញាធរដែរ ហើយអាជ្ញាធរបានចុះមកណែនាំដល់ម្ចាស់ផ្សារនេះក៏ផ្អាកការសាសង់បណ្តោះអាសន្នហើយទុកសម្ភារៈសំណង់ កាកសំណល់គ្រឿងសំណង់ដាក់លើផ្លូវសាធារណៈនាំអោយពិបាកដល់ការធ្វើដំណើរ។
ពលរដ្ឋរស់នៅភូមិបាវិតកណ្តាលសូមសំណូមពរដល់អាជ្ញាធរដែនដីជាពិសេសប្រមុខរាជរដ្ឋាភិបាលដែលមានសម្តេចតេជោហ៊ុនសែនជាប្រមុខដឹកនាំសូមជួយអន្តរគមន៍និងមានចំណាត់ការចំពោះការសាងសង់រំលោភផ្លូវសាធារណៈរបស់រដ្ឋពីមេផ្សារអន្តរជាតិបាវិតនេះផងដើម្បីដុះក្អែលមន្ត្រីពុករលួយថ្នាក់ក្រោមដែលហ៊ានអនុញ្ញាតិអោយមេផ្សារអន្តជាតិបាវិតសាសង់បំពានយ៉ាងនេះ។
ពាក់ព័ន្ធនិងករណីខាងលើនេះភ្នាក់ងារយើងបានធ្វើការទំនាក់ទំនងតាមទូរស័ព្ទទៅ លោក គង់ ចំរើន ដែលអ្នកមើលការខុសត្រូវផ្សារអន្តរជាតិបាវិតបានអោយដឹងថាចំពោះបញ្ហាដែលប្រជាពលរដ្ឋចោទខាងផ្សារបស់លោកធ្វើចូលចំណីផ្លូវរបស់រដ្ឋឥឡូវលោកកំពុងធ្វើការជាមួយសុរិយោដីហើយព្រោះការធ្វើនេះមានប្លង់ត្រឹមត្រូវដោយសារមួយរយះនេះសម្តេចមកបាវិតមន្ត្រីរាជការរវល់អញ្ចឹងកំពង់តែធ្វើការងារនេះជាមួយសុរិយោដីហើយ។លោកគង់ចំរើនបានបញ្ជាក់ថាការសាងសង់ផ្ទះល្វែងនេះវាហ៊ាចេញសំយ៉ាបមួយម៉ែត្រមែនតែសុរិយោដីគេរវល់ទើបមិនទាន់ដោះស្រាយ។
ចំណែកលោក សាញ់ សុខុន ចៅសង្កាត់បាវិតបានអោយដឹងថាចំពោះបញ្ហាសាងសង់រំលោភផ្លូវសាធារណៈពីក្រុមហ៊ុនផ្សារអន្តរជាតិបាវិតនេះគឺខាងអាជ្ញាធរធ្លាប់បានចុះទៅណែនាំនិងហៅក្រុមជាងសំណង់ទៅសាលាក្រុងដើម្បីសាកសួរដែរតែលទ្ធផលយ៉ាងណានោះមិនទាន់ដឹងទេគឺខាងក្រុងនិងមន្ត្រីជំនាញរបស់គេទើបដឹងរឿងនេះ។
ចំណែក សេងសីលា អភិបាលក្រុងបាវិតនៅរសៀលថ្ងៃទី១៨ខែឧសភាឆ្នាំ២១០៨នេះបានប្រាប់តាមបណ្តាញទំនាក់ទំនងសង្គមឱ្យដឹងថាៈរឿងនេះលោកបានដឹងនឹងបានធ្វើការទប់ស្កាត់មិនឱ្យសាងសង់បន្តទៀតនោះទេ ហើយដោយសារជាប់រវល់ទទួលសម្តេចដូច្នេះទើបមិនទាន់បានគិតគូរអំពីបញ្ហានេះហើយលោកនឹងដោះស្រាយនាពេលឆាប់ៗនេះ ៕ វ៉ៃកូ